Read Yucateco 1 Crónicas 16 Bible Online

1 Crónicas 16 - Yucateco bible

1 Crónicas 16

¹U ba'asche' Yuumtzile', j bisa'abe' ca j dzaab ichil jun p'éel chuybil naj u beetmaj ca'ach David u ti'al lelo'. Tu séeblaquil tu kubajo'ob tóocbil ba'alche'ob yéetel quíimsbil ba'alche'ob u ti'al ca'a bisajbáil tu táan Ku,

²le ca j dzo'oc u beetic David tuláacal lelo', tu qui' t'antaj le caajo' tu kaaba' Yuumtzil,

³ti' tuláacal le j israelitaob, j xiibo'ob yéetel co'olelo'obe', tu dzaj ti'ob jun p'éel waaj yéetel jun p'éel u pimpim waajil, datilo'ob bey xan jun p'éel u pimpim waajil pasaob.

⁴Davide' tu ya'alaj máaxo'ob ichil ti' le j levitaob bíin meyajnaco'ob tu táan u ba'asche' Yuumtzil, u ti'al u beetico'ob u kultajil qui'imac óolal yéetel u ti'al u qui'iqui' t'anto'ob Yuumtzil u Ku Israel.

⁵U nojochilo'obe', Asaf, cu dzo'ocole' Zacarías; cu dzo'ocole', Jeiel, Semiramot, Jehiel, Matatías, Eliab, Benaía, Obed-edom yéetel Jeiel, leti'obe' yaan ca'ach u nu'uculo'ob u paaxo'ob, u salteriob yéetel u arpaob. Asaf ca'ach paxic platillo'ob,

⁶aj kiino'ob Benaía yéetel Jahaziele', leti'ob ca'ach jóopsic paaxo'ob tu táan u ba'asche'il u nup t'aan Ku.

⁷Ti' jach le kiinac túuno', Davide' tu yáax a'alaj ti' Asaf yéetel u yéet aj meyajo'ob ca u kayo'ob ti' Yuumtzil le nib óolala':

⁸¡Dza'ex nib óolal ti' Yuumtzil! ¡Ka'ayte'ex u kaaba'! Tzicbalte'ex ti' caajo'ob ba'axo'ob cu beetic

⁹Kaaynene'ex ti' u nojbe'enil. ¡Tzicbalte'ex u nucuch meyajo'ob!

¹⁰Ca'analchajac a wiche'ex tu yo'olal u kaaba'. ¡Qui'imacchajac u yóol u pucsi'ikalo'ob máaxo'ob caxtic Yuumtzil!

¹¹Nadzaba'ex ti' Yuumtzil yéetel ti' u páajtalil; nadzaba'ex ti' Yuumtzil sáamsamal.

¹²Ka'ajac ti' te'ex u nucuch jakbe'en óolalil u meyajo'ob, ka'ajac xan ti' te'ex ba'axo'ob u ya'almaj:

¹³ti' te'ex, u ch'i'ibale'ex Israel u palitzil, ti' te'ex, u ch'i'ibale'ex Jacob, máaxe'ex u yéeymaje'ex.

¹⁴Leti'e' Yuumtzil, leti'e' c Ku; ¡leti' méektáantic tuláacal yóokolcaab!

¹⁵Quex máanac mil ch'i'ibalo'obe', ma' tu tu'ubsic u séeb chi'il u nup t'aan,

¹⁶le nup t'aan tu beetaj yéetel Abraham, le jalach t'aan tu beetaj ti' Isaac

¹⁷ca tu jedz t'antaj u ya'almaj t'aan ti' Jacob, bey u mina'an xu'ulul nup t'aanil ti' Israele',

¹⁸le ca tu ya'alaj: Bin in ca'aj in dzáatech u lu'umil canaán a ti'alinte.

¹⁹Quex tumen chéen jun p'íito'ob ca'ache', chéen wa jay túulo'ob beyo'ob j táanxel lu'umilo'obe'

²⁰quex chéen táan ca'ach u máano'ob ti' jejeláas lu'umo'ob yéetel ti' jejeláas caajo'obe',

²¹Kue', ma' tu cha'aj u loobilta'alo'ob tumen mix máaqui'; tac ti' ajawo'ob tu jach a'alaj:

²²Ma' a beetique'ex kaas ti' máaxo'ob in yéeymaj, ma' a loobiltique'ex in aj bóobato'ob.

²³U cajnáalile'ex tuláacal yóokolcaab, kaaynene'ex ti' Yuumtzil; dza'ex sáamsamal u péectzilil u tocsajil.

²⁴Tzicbalte'ex bix u nojbe'enil yéetel bix u jak óolbe'en óolalil u meyajo'ob tu táan tuláacal caajo'ob yéetel tu táan nucuch caajo'ob,

²⁵tumen Yuumtzile', nojoch yéetel cu jach najmatic u qui'iqui' t'anta'al, yéetel asab sajbe'entzil ti' u láak kuob.

²⁶U kuob u láak caajo'obe', mix ba'al u biilalo'ob, ba'ale', Yuumtzile', leti' j beet ca'ano'ob.

²⁷¡Yaan nojoch qui'ichquelmil tu táan! ¡Yaan páajtalil yéetel qui'imac óolal tu quili'ich naj!

²⁸U cajnáalile'ex le caajo'obo', dza'ex nojbe'enil ti' Yuumtzil chíinpolte'ex u páajtalil;

²⁹dza'ex ti' Yuumtzil le tziiquil cu najmatico'; nadzaba'ex tu táan yéetel ti'ibil óolo'ob; kulte'ex Yuumtzil tu qui'ichquelem quili'ich naj.

³⁰¡Tuláacal wíinic quiquilanquinac tu táan! Leti' utzi t'alcunt le yóokolcaab u ti'al ma' u péec.

³¹¡Qui'imachajac u yóolo'ob u cajnáalilo'ob ca'an, qui'imacchajac xan u cajnáalilo'ob lu'um! A'ala'ac ichil tuláacal le múuch' caajo'obo': ¡Yuumtzile', ajaw!

³²¡Áacamnac ka'anab yéetel tuláacal ba'ax yaan ichil! ¡Qui'imacchajac yóol káaxo'ob yéetel ba'axo'ob yani'!

³³¡Awatnac yéetel qui'imac óolal u che'ilo'ob le káax tu táan Yuumtzil máax táan u taal u méektáant u cajnáalilo'ob lu'um!

³⁴Dza'ex nib óolal ti' Yuumtzil tumen leti'e' utz, tumen mina'an xu'ulul ti' u yaacunaj.

³⁵A'ale'ex ti': ¡Toco'oni' c Ku, teech c tocsajil! ¡Molo'on, toco'on xan ti' u cajnáalilo'ob le caajo'obo', u ti'al ca c qui'iqui' t'ant a quili'ich kaaba', tu yo'olal c qui'iqui' t'antiquech yéetel qui'imac óolal!

³⁶¡Qui'iqui' t'anta'ac Yuumtzil u Ku Israel, u ti'al ya'abcach ja'abo'ob! Tuláacal le caajo' tu núucaj: ¡Béeyac, ca tu qui'iqui' t'antaj Yuumtzil.

³⁷Bey túuno', Davide' tu p'ataj Asaf yéetel u yéet aj meyajo'ob tu táan u ba'asche' Yuumtzil u ti'al ca u meyajto'ob mantadz le ba'ax kabéet u beeta'al sáamsamale'.

³⁸Tu p'ataj xan Obed-edom yéetel u yéet aj meyajo'ob, sesenta yéetel ocho máaco'ob, yéetel Obed-edom, u paal Jedutún, yéetel Hosa, u aj canan jool najo'ob.

³⁹Sadoc yéetel u yéet aj meyajo'ob aj kiino'obe', tu p'atajo'ob tu táan u chuybil naj Yuumtzil, tu quili'ich najil Gabaón,

⁴⁰u ti'al ca u kubo'ob mantadz le tóocbil ba'alche'ob ti' Yuumtzil ti' le multuunil kultaj jóokesa'an u ti'alo', ja'atzcab kiin yéetel ocnaj kiin jach je'el bix dzíiba'anil tu ju'unil u ya'almaj t'aan Yuumtzil, tu p'ataj u ti'al dzo'ocbesbil tumen Israelo'.

⁴¹Tu p'ataj xan tu yicnalo'ob Hemán, Jedutún yéetel tuláacal u yalab le máaxo'ob j yéeya'abo'obo' a'ala'ab xan u kaaba'obo', u ti'al ca kaaynaco'ob beya': Dza'ex nib óolal ti' Yuumtzil, tumen mina'an xu'ulul ti' u yaacunaj.

⁴²Lelo'oba' cu jóopsico'ob ca'ach trompetaob, cu paxico'ob ca'ach platillo'ob, yéetel u láak u jejeláasil u nu'ucul paaxo'ob, u ti'al u yáantico'ob u yúuchul kaay ti' Ku. U paalal jedutune', leti'ob ca'ach aj ilaj jool naj.

⁴³Cu dzo'ocole', tuláacalo'ob j suunajo'ob tu yotocho'ob, j suunaj xan David tu yotoch u ti'al u qui' t'ant u láaktzililo'ob.