Read Yucateco 1 Crónicas 17 Bible Online

1 Crónicas 17 - Yucateco bible

1 Crónicas 17

¹Cu dzo'ocol u culquinta'al David tu jalach káanche', tu ya'alaj ti' aj bóobat Natán; Ilej, tene' cajacbalen ti' jun p'éel jalach naj beeta'an yéetel póolbil kuulche', ba'ale' u ba'asche'il u nup t'aan Yuumtzile' chéen tu yáanal u nooko'ob yaan.

²Natane' tu núucaj: Beet tuláacal le ba'ax dzo'oc a tucultico', tumen ca xooc tu yéetel u yáantaj Ku.

³Ba'ale' ti' le áakabo', Kue' tu t'aana' Natane' ca tu ya'alaj ti':

⁴Xeen j t'aan tu yéetel in palitzil Davide', ca a wa'al ti', teen Yuumtzile' dzo'oc in wa'alic: Ma' teech bíin beetic jun p'éel kulnaj u ti'al in cajtali'.

⁵Líikbal ti' le kiin ca tin jóokesaj Israel tac bejela'e', mix jun téen cajlaquen ti' kulnajo'ob, chéen ti' quin wantal ich chuybil najo'ob cu dza'abalo'ob ti' jejeláas cúuchilo'ob.

⁶Ti' le buca'aj kiino'ob j máanen yéetelo'obe', mix jun téen tin káataj ti' u nuuquilo'ob le máaxo'ob tin dzajo'ob u ti'al u méektáanilo'ob in caajal, ca u beeto'ob in ti'al jun p'éel kulnaj beeta'an yéetel póolbil kuulche'.

⁷Let o'olale', a'al ti' in palitzil David, teen le Yuumtzil máax ti' yaan tuláacal páajtalilo', quin wa'alic ti': teen jóokesech ichil j tamano'obo', ca tin lukesajech tu paacho'ob, u ti'al in dzáiquech ca a beet u nojochil in caajal Israel;

⁸tin láakintajech tuláacal tu'ux j máanech, dzo'oc in láaj xu'ulsic a aj p'eeco'ob le máaxo'ob tu yóoltajo'ob u beeto'ob teech loobe', dzo'oc in beetic nojoch ba'altal je'el bix u nucuch cajnáalilo'ob yóokolcaabe'.

⁹U láak ba'ale' dzo'oc in nu'ucbesic jun p'éel cúuchil u ti'al in caajal Israel, dzo'oc in dzáico'ob cajtal tu lu'umo'ob u ti'al ma' u chi'ichnaccunta'alo'ob tumen mix máac, mix tumen máaxo'ob yedzmajilo'ob ca'ach,

¹⁰le kiinac tin dzaj máaxo'ob méektáantic in caajal israel. Tene' bíin in t'onquint tuláacal a aj p'eeco'ob. Quin dzáic xan a wojéelt bíin in dzáa ti' teech ch'i'ibalo'ob,

¹¹le quéen kuchuc xan u kiinil a quíimile', tene' bíin ch'a'a jun túul a ch'i'ibal u ti'al in jéedz culquíint ta ajawil.

¹²Leti' bíin beet in ti'alt jun p'éel kulnaj, tene' bíin in jedzcúunt u ajawil u ti'al ja'abo'ob mina'an u xuul.

¹³Teen bíin in beetimbáa u taata, leti'e' bíin u beetubáa in paal. Ma' bíin in lukes in yaacunaj ti'i' je'el bix tin beetaj ti' le ajawnaj táanil ti'o',

¹⁴ba'ale' bíin in utzil jedzcunt tuláacal ja'abo'ob tin wotoch yéetel ti' in ajawil. U jalach káanche'e' bíin p'áatac jedzecnac u ti'al ja'abo'ob mina'an u xuul.

¹⁵Natane' tu tzicbaltaj ti' David jach je'el bix tu yilajique' yéetel tu yu'ubajilaque'.

¹⁶Ajaw David túune', j ooc t'aan tu táan Yuumtzile', ca tu ya'alaj ti': Yuumtzil in Ku, ¿Máaxen teen yéetel máaxo'ob in láaktzililo'ob u ti'al ca a beet in taal tac waye'?

¹⁷¡Yuumtzil in Ku, jach jun p'íit ba'al a wilic le ba'ala', dzo'oc tac a tzicbaltic ti' teen bix bíin xi'ic ti' u ch'i'ibal a palitzil yéetel xan ca pactiquen bey nojoch ba'ale'!

¹⁸¿Ba'ax je'el u páajtal in wa'alic ti' teech tu yo'olal le tziiquil dzo'oc a dza'ic ti' teen, wa ma'alob a kaj óoltmail a palitzila'?

¹⁹Yuumtzil, tuláacal le jak óol ba'alo'oba' dzo'oc a beetic tumen a yabiltmaj a palitzil je'el bix ta wóoltaj ca ojéeltaco'.

²⁰Yuumtzil mix máac yaan je'el bix teche', mina'an u láak ku je'el bixeche', je'el bix dzo'oc c u'uyique'.

²¹Wa tu yo'olal Israel a caajale', ¡mina'an u láak je'el bix leti'e', tumen mina'an u láak múuch' caaj je'el bix leti' way tu yóokolcaabe'! Teche' Ku, ta jáanpaytaj u ti'al a caajalte, ta nojochquintaj a péectzilil yéetel a nucuch jak óol máactzilo'ob. Teche' ta wáalcabansaj u láak múuch' caajo'ob tu táan a caajal ta jóokesaj Egiptoo',

²²tumen ta ch'a'aj Israel u ti'al a caajalt mantadz, tumen teche' Yuumtzil bíin u Kuintech.

²³Bey túuno' Yuumtzil, béeycunt le séeb chi' dzo'oc a beetic ti' a palitzil yéetel u ch'i'ibalo'obo', dzo'ocbes ba'ax dzo'oc a wa'alic.

²⁴¡Ca béeyac a séeb chi', je'el bix a wa'almajilo', nojochquinta'ac xan a kaaba', ca a'ala'ac xane' Yuumtzile' yaan tuláacal páajtalil ti' u Ku Israel, tu jaajil leti' u Ku Israel! ¡Jéedz ajawnac u ch'i'ibal a palitzil David tu yéetel a wáantaj!

²⁵Teche' in Ku, dzo'oc a beetic in wojéeltic bin a ca'aj a jun puli' culquint in ch'i'ibal; tu yo'olal lelo', quex tumen a palitzilene', bin in ca'aj in beet ti' teech jun p'éel káat óolal.

²⁶Teche' Yuumtzil, Kuech, yéetel dzo'oc a séeb chi'itic ya'abcach yaacunaj ti' a palitzil;

²⁷cu dzo'ocole' bejela'e', ta beetaj utz a qui' t'antic u ch'i'ibal a palitzil u ti'al ca p'áatac tuláacal ja'abo'ob tu yéetel a wáantajil. Teche' Yuumtzil dzo'oc a qui' t'antic, bíin p'áatac mantadz qui' t'anta'anil.