Read Yucateco 1 Crónicas 18 Bible Online

1 Crónicas 18 - Yucateco bible

1 Crónicas 18

¹Cu dzo'ocol lela' Davide' tu pa'aj u muuk le j flilsteobo', tu t'onquintajo'ob, ca tu tocaj tu kabo'ob u caajil Gat yéetel u x péet caajilo'ob.

²Tu pa'aj xan u muuk le j moabitaob, beyo' leti'obe' j t'onquinta'abo'ob tumen Davide' ca j yanchaj u bo'otico'ob páatan ti' leti'.

³Davide' tu pa'aj xan u muuk Hadad-ezer, u ajawil Soba, le yaan tu tojil Hamato', tu súutuquil bin u ca'aj ca'ach u t'onquint tuláacal u yáalcab ja'il Éufrates.

⁴Ti' leti'obe' Davide' tu tocaj cien u bolanilo'ob ba'atel, tu machaj cuxa'an siete mil aj ba'atelo'ob cu nat' tzíimino'ob, yéetel veinte mil cu ba'atelo'ob xíimbal oquil; cu dzo'ocole', tu láaj ca'acachaj u yooco'ob u tzíimnilo'ob le bolano'obo', chéen u tzíiminilo'ob cien bolano'ob tu p'ataj.

⁵Cu dzo'ocole', j kucho'ob le j siriob j luko'ob Damasco j taalo'ob u ti'al u yáanto'ob Hadad-ezer u ajawil Sobao', ba'ale' Davide' tu pa'aj u muuk le j siriobo', tumen tu quíimsaj veinti dos mil ti'obi'.

⁶Cu dzo'ocole', Davide' tu p'ataj aj ba'atelo'ob canantic Siria le yaan Damascoo', ca tu t'onquintaj le j siriob u bo'oto'ob páatan. Bey túuno' Yuumtzile', cu dzáic páajtalil ti' David u ti'al ca béeyac tuláacal tu'ux ca'ach cu bin.

⁷Cu dzo'ocole', Davide' tu ch'a'aj le chimalo'ob oro u ca'ajo'ob, cu meyaj ca'ach ti' u nuuquilo'ob u aj ba'atelo'ob Hadad-ezere', ca tu bisláantaj Jerusalén.

⁸Tu ch'a'aj xan ya'abcach u bronceil u caajil Tibhat yéetel u caajil Cun, caajo'ob cu méektáantic ca'ach Hadad-ezer. Cu dzo'ocole', Salomone' tu beetaj yéetel le bronceo', u nojoch nu'ucul u dza'abal ja', u yocomilo'ob yéetel u nu'uculo'ob kulnaj bronce u ca'ajo'ob.

⁹Le ca tu yojéeltaj Toi u ajawil Hamat, dzo'oc u pa'abal u muuk Hadad-ezer u ajaw Soba tumen Davide',

¹⁰tu túuchi'itaj Adoram u paal yéetel tuláacal jejeláas ba'alo'ob beeta'ano'ob yéetel oro, plata bey xan yéetel bronce, u ti'al u te'escuntic yéetel u dzíiboltic utz ti' David úuchic u ba'ateltic yéetel úuchic u pa'ic u muuk Hadad-ezer, tumen Toie' táan xan u ba'atel ca'ach tu yéetel.

¹¹Davide' tu jun páaycuntaj u ti'al Yuumtzil tuláacal le ba'alo'obo', pa'ate' yéetel le oro bey xan le plata tu tocaj ti' tuláacal le múuch' caajo'obo', leti' lelo'oba': Edom, Moab, ti' j amonitaob, ti' j filisteob yéetel ti' j amalecitaob.

¹²Cu dzo'ocole', Abisai u paal x Sarviae', tu pa'aj u muuk diesiocho mil j edomitaob tu táax kóom lu'umil ta'ab.

¹³Cu dzo'ocole', Davide' tu dzaj aj ba'atelo'ob canantic Edome', tuláacal le j edomitaobo' j p'áato'ob yáanal u páajtalil; tuláacal tu'ux cu bin ca'ache', cu beeta'al u béeytal tumen Yuumtzil.

¹⁴Davide' tu méektáantaj u caajilo'ob Israel jach tu beel, bey tu beetaj ba'ax toj ti' tuláacal wíinic.

¹⁵U náacomil ca'ach u aj ba'atelo'obe', Joab u yaal x Sarvia, Josafat u paal Ahilude', u aj dzíib ca'ach le ajawo'.

¹⁶Sadoc, u paal Ahitob yéetel Ahimelec u paal Abiatare', leti'ob ca'ach aj kiino'ob; Savsae', leti' dzíibtic ca'ach ba'axo'ob cu yúuchul,

¹⁷Benaía, u paal Joiadae', leti' ca'ach u nojochil le aj canano'ob j cereteob yéetel j peleteob. U paalalo'ob Davide' leti'ob u nadza'an áantajo'ob ca'achi.