Read Yucateco 1 Crónicas 19 Bible Online

1 Crónicas 19 - Yucateco bible

1 Crónicas 19

¹Cu dzo'ocol u máan dze'edzec kiino'obe', j quíim Nahas, u ajawil j amonitaob, ca j culaj u paal tu jalach káanche'.

²David túune' tu tucultaj unaj u yutzil bisicubáa tu yéetel Hanún, u paal Nahas, tumen u taata Hanune' tu bisajubáa utz tu yéetel leti', le t o'olale' tu túuchi'itaj dze'edzec aj bisaj t'aano'ob u ti'al u qui'imaccuntico'ob u yóol Hanún úuchic u quíimil u taata. Ba'ale' le ca j kuch u nuuquil u aj ba'atelo'ob David tu lu'umo'ob le j amonitaobo',

³u nuuquil u caajil le j amonitaobo' tu ya'alajo'ob ti' Hanún: ¿Táan wa u tucultic a Tzicbe'enil chéen túuchi'ita'ab le máaco'ob tumen David u ti'al u taaso'ob ti' teech u t'aanil yaj óol u ti'al u tziquico'ob u taata a Tzicbe'enilo'? ¡Leti'obe' míin j taalo'ob naana' ichil u xakal ilo'ob le lu'umo'oba'!

⁴Hanún tu'une' tu beetaj u ma'achal u nuuquil u aj ba'atelo'ob Davide', ca tu beetaj u dzi'iquilo'ob bey xan tu beetaj u ja'atal u nooko'ob tac tu x bak ito'obe', ca tu ya'alaj ti'ob ca xi'ico'ob.

⁵Le ca j bin a'albil ti' David le ba'ax dzo'oc u yúuchul ti' le j xiibo'obo', tu túuchi'itaj kambilo'ob, tumen sen sublaco'ob ca'ach, ca tu ya'alaj ti'ob ca p'áataco'ob Jericó u p'ato'ob u nuuctal u me'exo'ob u ti'al ca suunaco'ob.

⁶Le j amonitaobo', tu na'atajo'ob dzo'oc u sen lúubulo'ob kaasil ti' David tu yo'olal ba'ax tu beetaj Hanún yéetel le j amonitaobo', ca túuchi'itajo'ob treintitres mil kilos plata u ti'al u bo'otico'ob u bolanilo'ob ba'atel, yéetel máaco'ob u yojelo'ob ba'atelo'ob u nat'majo'ob u tziimino'ob, tu lu'umilo'ob Mesopotamia, Siria, Maaca yéetel Soba,

⁷ca tu bo'otajo'ob u yáantalo'ob tumen treintidos mil u bolanilo'ob ba'atel, tu bo'otajo'ob xan u ajawil Maaca yéetel u aj ba'atelo'ob. Lelo'oba' j kucho'obe' ca je'elo'ob actáan ti' Medeba. Cu dzo'ocole', le j amonitaob xano' jóoko'ob ichil u caajalo'obe' ca tu much'ajuba'ob u ti'al ba'atel.

⁸Ba'ale' tu yojéeltaj Davide', ca tu túuchi'itaj Joab yéetel tuláacal u aj ba'atelo'ob.

⁹Le j amonitaobo', tu nadzajuba'obe', ca tu nu'ucbesajuba'ob u ti'al j ba'atel tu jool le caajo'. Le ajawo'ob taalaja'ano'obo', j p'áato'ob tu cúuchil le ba'atelo'.

¹⁰Le ca tu yilaj Joab bin u ca'aj j ba'atelbil táanil yéetel paachile', tu yéeyaj u asab ma'alobil u aj ba'atelilo'ob le j israelitaobo', ca tu nu'ucbesajubáa u ba'atelt le j siriobo'.

¹¹Cu dzo'ocole' tu túuchi'itaj u yalab u aj ba'atelo'ob tu paach Abisai u sucu'un, u ti'al j ba'atel tu yéetel le j amonitaobo',

¹²ca tu ya'alaj ti': Wa ca wilic taal u pa'abal in muuk tumen le j siriobo', ca taal a wáanten, ba'ale', wa quin wilic táan u pa'abal a muuk tumen le j amonitaobo', quin bin in wáantech.

¹³Yanac a wóol, co'ox j ba'atel yéetel chuca'an óol tu yo'olal c lu'umo'ob yéetel tu yo'olal u caajalo'ob c Ku. ¡Yuumtzil bíin u beet le ba'ax ma'alob u tucultmaj u beetique'!

¹⁴Joabe' tu nadzajubáa u ba'atelt le j siriobo', ba'ale', j púudzo'ob tu táan.

¹⁵Le ca tu yilaj le j amonitaob táan u púudzul le j siriobo', j púudzo'ob xan tu táan Abisai u sucu'un Joabe', ca j ooco'ob ichil le caajo'. Joab túune' j suunaj Jerusalén.

¹⁶Le ca tu yilaj le j siriob dzo'oc u pa'abal u muuko'ob tumen Israele', tu túuchi'itajo'ob aj bisaj t'aano'ob u ti'al ca u beeto'ob u taal le j siriob yano'ob tu táanxel tzéelil u yáalcab ja'il Éufrateso'. Tu táano'ob ca'ach yaan Sofac u náacomil u aj ba'atelo'ob Hadad-ezer.

¹⁷Chéen ba'ale', j tzicbalta'ab ti' David, leti'e' tu séeblaquil tu láaj péecsaj Israele', ca tu ch'actaj u áalcab ja'il Jordane', ca tu nadzajubáa u nu'ucbesubáa j ba'atel tu yéetelo'ob. Davide' tu nu'ucbesaj u aj ba'atelo'ob u ti'al a ba'atel tu táan le j siriobo', lelo'oba' ba'atelnaj tu yéetelo'ob,

¹⁸ba'ale' tu dzooque', j púudzla'ajo'ob tu táan le j israelitaobo', tumen Davide' tu quíimsaj cuarenta mil xíimbal ooc aj ba'atelo'ob yéetel tu kascuntaj siete mil u bolanilo'ob ba'atel, cu dzo'ocole' Davide' tu quíimsaj xan Sofac u náacomil u aj ba'atelo'ob le j siriobo'.

¹⁹Le ca tu yilaj u yéet aj ba'atelo'ob Hadad-ezer dzo'oc u pa'abal u muuko'ob tumen Davide', tu dzajo'ob u t'aanil jéedzel ti' Davide', ca t'onlajo'ob tu táan. Líikbal ti' le kiino', le j siriobo', ma' tu yóoltajo'ob u ca'a áanto'ob le j amonitaobo'.