Read Yucateco 1 Crónicas 21 Bible Online

1 Crónicas 21 - Yucateco bible

1 Crónicas 21

¹Satanase', j líik u beet loob ti' u cajnáalilo'ob Israel, ca tu yocsaj tu pool David ca u xoc jay túul u cajnáalilo'ob Israel.

²David túune' tu ya'alaj ti' Joab yéetel ti' u nuuquilo'ob le caajo': Xene'ex a xooque'ex jay túul u cajnáalilo'ob Israel líikbal Beerseba tac Dan, cu dzo'ocole' ca suute'ex a wa'ale'ex ti' teen jay túulo'ob.

³Ba'ale' Joabe' tu núucaj: U ya'abcunt Yuumtzil cien u téenel ya'abil u caajal ti' le buca'aj yaan bejela'a'; ¿ba'ale' ma' wa tuláacalo'ob u palitzilo'ob a Tzicbe'enili'? ¿Ba'axteen cu dzíibolaj bey a Tzicbe'enilo'? ¿Ba'axteen bíin beeta'ac u si'ipil Israel?

⁴Ba'ale' le ba'ax tu ya'alaj le ajawo', yanchaj u dzo'ocbesa'al tumen Joab, leti'e' jóok tu yicnale' ca tu xíimbaltaj tuláacal Israele' ca j suunaj Jerusalén.

⁵Joabe' tu kubaj ti' David u ju'unil buca'aj kuchic u xooquil le caajo', tu pa'ate'il u lu'umil Israele', yanchaj jun p'éel millón ca'a tac cien mil j xiibo'ob nu'ucano'ob u ti'al j ba'atel, yéetel cuatrocientos sesenta mil tu lu'umil Judá.

⁶Ba'ale' ma' xo'oc ichilo'ob u cajtalilo'ob u yototchnáalo'ob Leví yéetel Benjamini', tumen Joabe' ma' utz tu yu'ubajilac u túuchi' ajawi'.

⁷Ku xane' kaas tu yilajilac tuláacal le ba'ala' ca tu túuchi'itaj jun jáay quíimil tu yóokol u caajilo'ob Israel.

⁸Ba'ale' Davide' tu cáantaj ti' Ku: Dzo'oc in beetic jun p'éel talam keban úuchic in beetic le ba'ala'. Ba'ale' bejela'e', quin káatic ti' teech ca a sa'ats u keban a palitzila', tumen tin beetaj ba'ax cu beetic jun túul ma' na'at wíinic.

⁹Yuumtzil túune' tu ya'alaj ti' Gad, ti' máax cu káat chi' David:

¹⁰Xeen a wil Davide' ca a wa'al ti' quin dzáic óox p'éel ba'alo'ob u yéeyej, u tucult ma'alob ba'ax u káat ca in beete.

¹¹Gade' j bin u yila'a Davide', ca tu ya'alaj ti': Je'el ba'ax cu ya'alic Yuumtzila': yéey ichil le óox p'éel ba'alo'oba',

¹²óox p'éel ja'abo'ob wi'ijil, wa óox p'éel winalo'ob u pa'abal a muuk tumen a aj p'eeco'ob u ti'al u ch'a'apachtiquecho'ob yéetel máascab, wa óox p'éel u kiinilo'ob báan quíimil, tu yáanal u máascab Yuumtzil u ti'al u beetic u yantal yaayaj sat óolal ti' tuláacal u lu'umilo'ob Israel. A'al ti' teen jun puli' ba'ax unaj in wa'alic ti' máax túuchi'iten.

¹³Davide' tu núucaj ti' Gad: Juupulen ichil jun p'éel talam ba'al. Ba'ale' asab ma'alob ca lúubuquen tu kab Yuumtzil, tumen sen nojoch u ch'a'a óotzilil, ma' bey wa ca lúubuquen tu kab wíinico'obi'.

¹⁴Yuumtzil túune' tu túuchi'itaj jun p'éel báan quíimil tu caajilo'ob Israel, ca j quíim sesenta mil j israelitaob.

¹⁵Kue' tu túuchitaj jun túul ángel u ti'al xu'ulsic Jerusalén, ba'ale', ca'aliquil táan u xu'ulsique', Yuumtzile' tu yilaje' ca j yaachaj tu yóol le báan quíimilo', ca tu ya'alaj ti' le ángel cu quíimsajo': ¡Xot' le ba'ax ca beetico', ch'en a quíimsaj! Ti' le súutuco', u ángel Yuumtzile' ti' yaan ca'ach tu cúuchil tu'ux yaan Ornán le jebuseo táan ca'ach u p'uchic u trigoo'.

¹⁶Le ca tu líikesaj u yich Davide', tu yilaj u ángel Yuumtzil chúumuc ti' ca'an yéetel ti' lu'um, u machmaj u máascab u jóokesmaj tu piix táan u tojtáantic Jerusalén. David yéetel u nuuquilo'ob Israel túun u búuquintmajo'ob to'och nooko'obe', j noclajo'ob j lu'ume',

¹⁷ca tu ya'alaj David ti' Ku: ¡Teen j túuchi'it xocbil u cajnáalilo'ob le lu'umo'oba'! ¡Ten tin kebancuntajinbáa u ti'al in beetic le kaasa'! ¿Ba'ale' ba'ax u beetmaj le ma' j si'ipilo'oba'? Yuumtzil in Ku quin káat óoltic ti' teech ca lúubuc le jaadz tin wóokol yéetel tu yóokol in láaktzililo'oba', ba'ale' p'at a beetic loob ti' a caajal.

¹⁸U ángel Yuumtzile', tu ya'alaj ti' Gad ca u ya'al ti' David ca u líikes jun p'éel u multuunil kultaj ti' Yuumtzil tu'ux ca'ach cu p'u'uchul le trigo tumen Ornán le jebuseo'.

¹⁹David túune' j bin u beet tu kaaba' Yuumtzil le ba'ax a'ala'ab ti' tumen Gado'.

²⁰Ornane' táan ca'ach u p'uchic trigo, le ca tu sutaj u yiche' tu yilaj u ángel Ku, ba'ale' u can túul paalalo'ob yano'ob tu yicnal ca'ache', j bino'ob u ta'acbesuba'ob.

²¹Le ca j náadz David tu'ux yaan Ornane', leti'e' j paacatnaji, le ca tu yilaj Davide', jóok tu'ux cu p'uchic le trigoo', ca j chinlaj tu táan David.

²²David túune' tu ya'alaj ti' Ornán: Dzáa ti' teen le cúuchil tu'ux ca p'uchic le trigoo' u ti'al in beetic jun p'éel u multuunil kultaj ti' Yuumtzil. Con ti' teen le jach bajux u tojole', u ti'al ca lukuc le báan quíimil ti' le caaja'.

²³Ornane' tu núucaj ti': U ch'a'a a Tzicbe'enile' ca u beet tu yéetel le ba'ax utz cu tucultique'. Teene' quin dzáic le wacaxo'ob u ti'al le tóocbil ba'alche'obo', le u nu'ucul le p'uucha' meyajnac u ti'al si' yéetel le trigo' u ti'al ti'ibil óolal. ¡Tuláacal lelo' quin dzáic ti' a Tzicbe'enil!

²⁴Ba'ale' ajawe' tu núucaj: Quin nib óoltic ti' teech, ba'ale' bíin in man ti' teech jach tu tojol, tumen ma' bíin in lukes ba'al a ti'al u ti'al in kub ti' Yuumtzil u tóocbil ba'alche'il jun p'éel ba'al ma' u tojoltmaj ti' teen mix ba'ali'.

²⁵Bey túuno' Davide' tu bo'otaj ti' Ornán seicientos u taakinilo'ob oro tu yo'olal le cúuchilo',

²⁶te'elo' tu beetaj jun p'éel u multuunil kultaj u ti'al Yuumtzil, ca tu kubaj tóocbil ba'alche'ob yéetel u quíimsbil ba'alche'ilo'ob ca'a bisajbáil. Cu dzo'ocole', tu ch'a'achi'itaj u kaaba' Yuumtzil, leti'e' tu núucaj yéetel jun p'éel káak tu túuchi'itaj líikbal tu ca'anil tu yóokol le tóocbil ba'alche'obo'.

²⁷Yuumtzil túune' tu túuchi'itaj ti' u ángel ca u ca'a yoques u máascab tu piix.

²⁸Ti' le súutuco', le ca tu yilaj David dzo'oc u yu'uba'al u payalchi' tumen Yuumtzil te j cúuchil tu'ux cu p'uch trigo Ornán jebuseo', tu táanbesaj quíimsbil ba'alche'obi'.

²⁹Quex tumen ti' ca'ach yaan Gabaón le chuybil naj tu beetaj ca'ach Moisés u ti'al Yuumtzil te x tocoy lu'um pa'ate' yéetel u multuunil kultaj u ti'al le tóocbil ba'alche'obo',

³⁰Davide' ma' j páatchaj u bin tac te j cúuchil u ti'al j káat chi' ti' Kui', tumen sen ja'ak u yóol le ca tu yilaj u máascab u ángel le Yuumtzilo'.