Read Yucateco 1 Crónicas 22 Bible Online

1 Crónicas 22 - Yucateco bible

1 Crónicas 22

¹Let o'olale' tu ya'alaj David: Way bíin yanac u kulnaj Ku Yuumtzile', bey xan u multuunil kultaj u ti'al u kubic tóocbil siibalo'ob Israel.

²Cu dzo'ocole', Davide', tu túuchi'itaj ca u much'quintubáa le j táanxel lu'umilo'ob cajnáalo'ob Israelo', ca tu ya'alaj máax bíin u beeto'ob u j póol tuunichilo'ob u ti'al u kulnaj Ku.

³Cu dzo'ocole' tu nu'ucbesaj ya'ab fierro u ti'al u clavoilo'ob u jool najilo'ob yéetel u grapailo'ob; bey xan ya'abcach bronce,

⁴yéetel sen ya'ab kuulche' mina'an u xooquil, tumen u cajnáalilo'ob Sidón yéetel Tiroe' tu taasajo'ob ca'ach ya'ab kuulche'.

⁵Davide' táan ca'ach u tucultic: In paal Salomone', bejela'e' chéen jun túul paal, ba'ale' le kulnaj bíin beeta'ac u ti'al Yuumtzilo', ka'ana'an asab nojoch ma' bíin yanac u láak beyo'ob, u asab qui'ichquelmil xan ti' u láako'ob yaan tuláacal u yóokolcaab; Bey túuno', yaan in láaj nu'ucbesic ti' tuláacal ba'ax kabéet. Le t o'olale', Davide' tu nu'ucbesaj ya'abcach ba'alo'ob ca'aliquil cuxa'an.

⁶Cu dzo'ocole', tu t'anaj Salomón u paale', ca tu ya'alaj ti' ca u beet u kulnaj Yuumtzil u Ku Israel,

⁷ca tu ya'alaj ti': In paal, tene' taac ca'ach in beetic jun p'éel kulnaj u ti'al Yuumtzil in Ku.

⁸Ba'ale' Yuumtzile' dzo'oc u ya'alic ti' teen: Tene' in wilmaj a wecmaj ya'abcach ki'ik, a beetmaj xan ya'abcach ba'atelo'ob; let o'olale', ma' teech bíin beetic ti' teen jun p'éel kulnaji'.

⁹Ba'ale' bíin yanac jun túul a paal ma' j ba'atel wíiniqui'; teen xan bíin in beet ma' u ba'atelta'al mix tu'ux tumen u aj p'eeco'ob. Let o'olal bíin u kaaba'int Salomón.[1] Tu kiinilo'obe', bíin in dzáa jéedzel yéetel x ma' sajaquilil tu caajil Israel.

¹⁰Leti' bíin u beet jun p'éel kulnaj in ti'alinte. Leti'e' bíin u beetubáa in paal, tene' bíin in beetimbáa u taata, yéetel bíin in jedz jun puli' u ajawil tu yóokol Israel.

¹¹In paal, bejela'e' ti' yanac Yuumtzil ta wéetele' u ti'al ca páatchajac a beetic u kulnaj Yuumtzil a Ku, je'el bix tu séechi'itilaque' teech bíin a beete.

¹²Yuumtzil bíin u dzáa ti' teech na'atil yéetel kaj óolalil, tu yo'olal le quéen u kub ti' teech u méektáanil Israele', ca a dzo'ocbes u ya'almaj t'aan Yuumtzil a Ku.

¹³Tuláacal ba'al bíin jóokoc utzil ti' teech, wa ca táan óoltic a dzo'ocbes u ya'almaj t'aano'ob yéetel tuláacal le ba'axo'ob tu ya'alaj Yuumtzil ti' Moisés u ti'al Israel. ¡Xiixib máacchajquech yéetel yanac a wóol; ma' u lúubul a wóol mix a ch'a'ic sajaquil!

¹⁴Ilej, tene' yéetel ya'abcach meyaje', páajtchaj in nu'ucbesic u ti'al u kulnaj Yuumtzil tres millones trescientos mil kilos oro, treinta y tres millones plata, yéetel sen ya'abcach bronce, yéetel fierro ma' tu páajtal u p'i'isil. Dzo'oc xan in nu'ucbesic che' yéetel tuunich, teech xane' unaj a nu'ucbesic u láako'ob ichil.

¹⁵Cu dzo'ocole' quin p'atic ta kab ya'abcach aj meyajo'ob, j póol tuunicho'ob, j pakbalo'ob yéetel j póol che'ob, bey xan ya'abcach máaco'ob cu beetico'ob u jejeláas meeyjulo'ob oro, plata, bronce yéetel fierro. Bey túuno' ¡chokabáa te j meyajo', Yuumtzil bíin u yáantech!

¹⁷Cu dzo'ocole' Davide' tu ya'alaj ti' tuláacal u nuuquilo'ob Israel ca u yáanto'ob Salomón u paal ca'aliquil ca tu ya'alaj ti'ob:

¹⁸Yuumtzil a Junab Kuexe', ti' yaan ta wéetele'exe', dzo'oc u dzáic ti' te'ex jéedzel tuláacal tu'ux, tumen leti'e' dzo'oc u dzáic tu yáanal in méektáan tuláacal u cajnáalilo'ob u yóokolcaab, dzo'oc u t'ontalo'ob ti' Yuumtzil yéetel ti' u caajal.

¹⁹Bejela'a' túune', caxte'ex Yuumtzil a Kuex tu jaajil a wóole'ex. Dzáa a wóole'ex a beetique'ex u quili'ich naj Ku, le Yuumtzilo', u ti'al ca taasa'ac u ba'asche'il u nup t'aan Yuumtzil yéetel u quili'ich nu'uculo'ob Ku yéetel tu kulnaj cun j beetbil u ti'al Yuumtzilo'.