Read Yucateco 1 Crónicas 23 Bible Online

1 Crónicas 23 - Yucateco bible

1 Crónicas 23

¹Le ca j sen nuxibchaj Davide', tu dzaj Salomón u paal u beet u ajawil Israel,

²tu much'quintaj tuláacal u nuuquilo'ob Israel, bey xan le aj kiino'ob yéetel j levitaob.

³Ca j xo'oc jay túul j levitaob chunbal yéetel le yaan treinta ja'abo'ob ti'obo' tac u ch'ija'anilo'ob, ca j ila'ab yaan treinta yéetel ocho mil j xiibo'ob.

⁴Ti' leti'obe' jóokesa'ab veinticuatro mil u ti'al ilic u beeta'al u meeyjul le kulnajo', seis mil u nuuquilo'ob u ti'al ilaj meyaj, yéetel u aj ilaj tacpoolo'ob,

⁵cuatro mil u ti'al canan jool naj, yéetel u láak cuatro mil u ti'al u qui'iqui' t'anto'ob Yuumtzil yéetel u nu'uculo'ob paax le j túuchi'ita'abo'ob beetbil tumen David u ti'al le qui'iqui' t'aano'.

⁶Davide', tu t'oxla'antaj jujun múuch'ul je'el jay túul u paalalo'ob Levie': Gersón, Coat yéetel Merari.

⁷U paalal Gersone', Laadán yéetel Simei.

⁸U paalal Laadane', óox túulo'ob ca'achi: Hehiel, u yáax paal, Zetam yéetel Joel.

⁹U paalal Simeie', óox túulo'ob xan ca'achi: Selomit, Haziel yéetel Harán. Lelo'oba' u nuuquilo'ob u láaktzililo'ob Laadán.

¹⁰U paalal Simeie' can túulo'ob: Jahat, Ziza, Jeús yéetel Bería.

¹¹U yáax paale' Hahat, u ca'a túule' Ziza; ba'ale' bey Jeús yéetel Bería ma' j yanchaj ya'ab u paalalo'ob, u ti'al le meyajo', j xo'oco'ob bey chéen jun p'éelili' naje'.

¹²U paalal Coate' can túulo'ob ca'achi: Amram, Izhar, Hebrón yéetel Uziel.

¹³U paalal Amrame', leti'ob ca'ach Aarón yéetel Moisés. Aarone', j yéeya'ab tumen Ku u ti'al u kub le asab quili'ich ti'ibil óolalo'obo', u ti'al tóoc poom tu táan Yuumtzil, u ti'al u meyajt yéetel u dzáa qui' t'aano'ob, lelo' unaj u beetico'ob Aarón yéetel u paalal mantadz.

¹⁴Moisés u palitzil Ku yéetel u paalalo'obe', j xo'oco'ob xan ichil u ch'i'ibal u ch'i'ibalo'ob Leví.

¹⁵U paalal Moisese' leti'ob ca'ach Gersón yéetel Eliezer.

¹⁶Ti' u paalal Gersone', u yáax paale' tu kaaba'intaj Sebuel.

¹⁷U yáax paal Eliezere' tu kaaba'itaj Rehabías, cu dzo'ocole' ma' yanchaj u láak u paalalo'obi'; ba'ale' Rehabíase', j yanchaj ya'ab u paalal.

¹⁸U yáax paal Izhare' tu kaaba'intaj Selomit.

¹⁹U paalal Hebrone' tu kaaba'intajo'ob: Jeraías, u j yáax paal; Amarías u ca'a túul; Jahaziel, u yóox túul; yéetel Jecamán, u can túul.

²⁰U paalal Uziele' tu kaaba'intajo'ob: Micaías, u yáax paal; yéetel Isías u ca'a túul.

²¹U paalal Merarie' tu kaaba'intajo'ob Mahli yéetel Musi. U paalal Mahlie' tu kaaba'intajo'ob Eleazar yéetel Cis.

²²Eleazare' j quíim x ma' j xibil paalal: chéen u x ch'upul paalal j yanchaji, dzo'oc u beelo'ob yéetel u paalal Cis u dzeyuumo'ob.

²³U paalalo'ob Musie' óox túulo'ob ca'achi: Mahli, Edar yéetel Jeremot.

²⁴Lelo'oba', u ch'i'ibalo'ob ca'ach Leví, tu tzoolol u láaktzililo'ob, je'el bix dzíibta'anil u kaaba'ob ti' u xooquil u nuuquil u láaktzililo'ob chunbal yéetel le veinte u ja'abilo'obo' tac u asab ch'ija'anilo'ob, leti'obe' jun páaycunta'ano'ob u ti'al u meeyjul u najilo'ob Kulnaj.

²⁵Davide' dzo'oquili' u ya'alic ca'ache': Yuumtzil u Ku Israele', dzo'oc u dzáic jéedzel ti' u caajal, yéetel dzo'oc u jedzcuntic u cajtalil u kaaba', Jerusalén.

²⁶Tu yo'olal beyo' le j levitaobo', bíin jáawac u cúuch queléembaltco'ob u chuybil naj Yuumtzil, bey xan le nu'uculo'ob cu meyaj ti' le kultajo'.

²⁷Bey túuno' j xo'oc u ch'i'ibalo'ob Leví chúunbal veinte u ja'abilo'ob tac u asab nuuquilo'ob je'el bix le dzo'oc nu'uc t'aano'ob tu dzaj Davido',

²⁸ca j p'áat tu yáanal u tusbelo'ob aj kiino'ob u ch'i'ibalo'ob Aarón, u ti'al u meeyjulo'ob kulnaj, u ti'al u canáanto'ob u káasab najilo'ob yéetel u yutzquinta'al u yanil le quili'ich ba'alo'ob, yéetel tuláacal u meeyjulo'ob le kulnajo'.

²⁹Leti'ob beetic u meeyjul le waajo'ob jun páaycuna'ano'ob cu dza'abalo'ob ti' tzoolilo'obo', le juuch' u ti'al u ti'ibil óolalil jejeláas janalbe'en neeko'obo', le j oop'il waajo'ob x ma' levadurao', le ti'ibil óolalo'ob takancunta'ano'ob ti' x jáaycab cuumo', bey xan le juuch' yéetel tuláacal u nu'uculo'ob u yúuchul p'is.

³⁰Cu dzo'ocole' sáamsamal unaj u bino'ob j kulnaj ja'atzcab kiin yéetel u yocbal kiin u ti'al u dza'ob nib óolal yéetel u ti'al ca u qui'iqui' t'anto'ob Yuumtzil,

³¹bey xan u ti'al u ku'ubul tóocbil ba'alche'ob ti' Yuumtzil tu kiinilo'ob sábado'ob, u kiinbesajilo'ob chichaan uj yéetel tuláacal kiinbesajo'ob, mantadz bíin u meyajto'ob Yuumtzil je'el bix a'ala'anil ti'obe'.

³²Leti'ob xan canantic u noj Paselil u yúuchul much'tal yéetel Ku yéetel quili'ich naj, u ti'al u múul meyajo'ob tu yéetel u láako'ob ti' u ch'i'ibalo'ob, ti' u ch'i'ibalo'ob Aarón.