Read Yucateco 1 Crónicas 28 Bible Online

1 Crónicas 28 - Yucateco bible

1 Crónicas 28

¹Davide' tu much'quintaj Jerusalén tuláacal u méektáanilo'ob Israel: u nuuquilo'ob u múuch' cajtalil láaktzililo'ob, u nuuquilo'ob u múuch'ul u aj ba'atelo'ob ajaw, tuláacal u jejeláasil u nuuquil aj ba'atelo'ob, u nuuquil máaxo'ob canantic tuláacal u lu'umo'ob yéetel u wacaxo'ob le ajawo' bey xan le u ti'al u paalalo'ob, tuláacal máaco'ob jach ma'alob yanilo'obe', yéetel tuláacal aj xiixib aj ba'atelo'ob.

²David túune' j wa'alaje' ca tu ya'alaj: In láaktzile'ex yéetel in wéet caajale'ex, u'uyene'exi': tene' tin tucultaj ca'ach in beetic jun p'éel cúuchil u ti'al u ba'asche'il u nup t'aan Yuumtzil u ti'al ca p'áatac jun puli', u cúuchil xan u dzáic u jalach káanche' Ku, tin nu'ucbesaj xan ca'ach u nu'uculo'ob u ti'al in beetic.

³Ba'ale' Kue' tu ya'alaj teen: Ma' teech bíin beetic jun p'éel kulnaj in ti'alti', tumen teche' aj ba'atel máaquech yéetel dzo'oc a wequic ki'ik.

⁴Ba'ale' Yuumtzil u Ku Israele', tu yéeyajen ichil tuláacal in láaktzililo'ob u ti'al u dzáen u ajawil Israel u ti'al tuláacal ja'abo'ob. Leti'e' tu yéeyaj u ch'i'ibalo'ob Judá u ti'al méektáanil; ti' u ch'i'ibalo'ob Judae' tu yéeyaj in láaktzililo'ob; ichil in láako'obe' tu yéeyajen u ti'al u ajawil Israel.

⁵Bejela'a' túune', ichil tuláacal in paalal, le ya'abcach paalal tu dzaj ti' teen le Yuumtzilo', Yuumtzile' tu yéeyaj in paal Salomón u ti'al ca culac ti' le jalach káanche' tu'ux cu méektáan Yuumtzil tu yóokol Israel.

⁶Yuumtzile', tu ya'alaj xan ti' teen: A paal Salomón bíin beet in ti'alt jun p'éel kulnaj, bíin u beet xan u suyemilo'ob,[2] tumen dzooc in yéeyic bey in paale', teen bíin in beetajinbáa u taata,

⁷bíin in jedzcunt u ajawil u ti'al mix bikin bíin xu'uluc, wa cu dzáic u yóol u dzo'ocbes in wa'almaj t'aano'ob yéetel tuláacal ba'axo'ob quin wa'alic je'el bix tac bejela'e'.

⁸Bejela'a' túune', tu táan tuláacal Israel u múuch' caajal Yuumtzil, yéetel tu táan c Ku cu ch'en xiquintico'ona', dzo'ocbese'ex tu jaajil a wóole'ex tuláacal u ya'almaj t'aano'ob Yuumtzil, a Kuex, tu yo'olal ca xi'ic u bin a ti'alintique'ex jun puli' le j qui'ichquelem lu'umo'oba', cu dzo'ocole' bíin páatac a p'atique'ex u ti'alint a paalale'ex.

⁹Teche' Salomón in paal, táan óolt u Ku a taata, meyajt yéetel tuláacal a pucsi'ikal yéetel jaj óolal, tumen Yuumtzile' cu xakal ilic tuláacal tuuculo'ob yéetel tuláacal ba'axo'ob cu yóolta'al beetbil. Bey túuno', wa teech ca caxtique', bíin u cha'a a nuptáantic, ba'ale' wa ca xúunp'atique', bíin u xúun p'ajtech jun puli'.

¹⁰Ka'ajac ti' teech ma'alob, dzo'oc u yéeyiquech Yuumtzil u ti'al a beetic u najil u quili'ich naj. Le t o'olale', ¡yanac a wóol yéetel beet le meyajo'!

¹¹David túune' tu kubaj ti' Salomón u paal u ju'unil tu'ux dzíibta'an bix unaj u beeta'al u máacanil le kulnajo', u najilo'ob, u cúuchilo'ob u líikesa'al ba'alo'ob, u káasabilo'ob u ca'anal najilo'ob, bix bíin p'áatac u najilo'ob ichil, yéetel le sen quili'ich cúuchilo'.

¹²Tu kubaj xan ti' u ju'unil, je'el bix u tucultmajil u beeta'al u suyemilo'ob kulnajo', le x káasabilo'ob bíin xi'ico'ob tu bakpacho', u co'ocoj ba'alilo'ob yéetel u nu'ucul u dza'abal le quili'ich ti'ibil óolalo'ob,

¹³bey xan u x káasabilo'ob tu'ux u yantal le aj kiino'ob yéetel le j levitaob cu t'oxláanticuba'ob ti' u kiinilo'ob u meyajo'ob, yéetel tuláacal u nu'uculilo'ob u beeta'al le kultaj te j kulnajo'.

¹⁴Tu kubaj xan ti'e' ya'abcach oro yéetel plata u ti'al le ba'axo'ob kabéet u beeta'al yéetel oro bey xan yéetel plata u ti'al le kultajo';

¹⁵u ti'al le x t'uchub sáaso'ob yéetel u sáaso'ob je'el bix le oro u ca'ajo'obo' bey le plata u ca'ajo'obo', tu ya'alaj buca'aj kabéet u aalil tu jujun p'éelilo'ob;

¹⁶bey xan tu beetaj yéetel tu jujun p'éelil le x táasche'ob je'el bix le beeta'ano'ob tu yéetel oroo', bey le beeta'ano'ob tu yéetel platao', le tu'ux u najmal u dza'abal u tzoolil le quili'ich waajo'ob.

¹⁷Tu dzaj xan oro ti', u ti'al le x li'itzibo'obo', u ti'al le laco'obo', le pichelo'ob, bey xan oro yéetel plata u ti'al u beeta'al u nu'uculo'ob u yu'ukul vino, je'el buca'aj aalil tu jujun p'éelile'.

¹⁸Tu kubaj xan ya'abcach máaytbil oro u ti'al u beeta'al u multuunil kultaj u ti'al poom, bey xan tu dzaj oro u ti'al u beeta'al le bolano', lelo', u ti'al le aj xiknalo'ob u je'emaj u xiiko'ob u ti'al u balico'ob u ba'asche'il u nup t'aan Yuumtzil.

¹⁹Tuláacal lela' dzíibt'aan ca'ach ti' jun p'éel ju'un je'el bix dza'abic tumen Yuumtzil tu tuucul Davide', cu láaj tzolic ca'ach bix u najmal u beeta'al le meyaj je'el bix dzíibta'anil tu láak u ju'unil le meyajo'.

²⁰David túune' tu ya'alaj ti' Salomón: ¡Xiixib máacchajquech ma' u lúubul a wóol, chokaba te j meyajo'! ¡Yanac a wóol, mix a ch'a'ic sajaquil, tumen Yuumtzil in Kue' ti' yaan ta wéetele'! Leti'e' ma' bíin náachchajac ti' techi', mix bíin u xúunp'ajteech tac u dzo'ocbal a beetic le meyaj u ti'al u meeyjul le kulnajo'.

²¹Way yano'ob le aj kiino'ob yéetel le j levitaob cu t'oxicuba'ob nu'ucano'ob u ti'al u meeyjul le kulnajo'; u ti'al tuláacal le meyajo', bíin yanac xan máaco'ob taac u yáatajo'ob, u yojelo'ob tuláacal u jejeláasilo'ob meyajo'ob; cu dzo'ocole' tuláacal u nuuquilo'ob le caaj yéetel tuláacal le caajo' bíin u yáantecho'ob.