Read Yucateco 1 Crónicas 5 Bible Online

1 Crónicas 5 - Yucateco bible

1 Crónicas 5

¹U paalal Rubén u yáax paal Israele', tu kaaba'intajo'ob Hanoc, Falú, Hezrón, yéetel Carmi. Rubene' leti' jach yáax paal, ba'ale' tu yo'olal yanchaj ba'al u yila'a yéetel u x keech u taatae', u qui' t'aanil le yáax paalile', j dzaab ti' u paalal José, u láak u paal Israel. Chéen ba'ale', tu yo'olal j kuch u beet Judá nojoch ba'alil ichil u láako'ob, ti' leti' jóokesa'ab jun túul máax cu bin u beet u nojchil; ba'ale' u qui' t'aanil yáax paalile', u ti'al ca'ach José.

⁴U ch'i'ilancab Joel tu tzoolole', Tu kaaba'intajo'ob Semaías, Gog, Simei, Micaía, Reaía, Baal yéetel Beera, u j nojoch le j rubenitaobo', le máax j ma'ach cuxa'an u ti'al j bisbil tumen Tiglat-pileser, u ajawil Asiria.

⁷U sucu'ucno'ob Beerae' je'el bix u tzoolol dzíibtabic u kaaba'ob u láaktzililo'obe', tu kaaba'intajo'ob: u nojochile' Jeiel, Zacarías

⁸yéetel Bela, u paal Asaz, u yáabil Sema, u paal Joel. Belae', j cajlaj Aroer, u lu'ume' cu kuchul tac Nebo yéetel Baal-meón.

⁹J cajlaj j lakin tac tu jáal x tocoy lu'um cu kuchul tac tu yáalcab ja'il Éufrates, tumen sen ya'abchaj u wacaxo'ob tu lu'umil Galaad.

¹⁰Tuláacal u kiinilo'ob ajawnajic Saule', le j rubenitaobo', yanchaj ba'atel ti'ob yéetel le j agareno'obo', ba'ale' tu pa'ajo'ob u muuko'obe', ca j cajlajo'ob tu lakin Galaad.

¹¹U ch'i'ibalo'ob Gade' j cajlajo'ob ca'ach actáan ti' le j rubenitaob tu lu'umilo'ob Basán tac tu caajil Salcae', tu kaaba'intajo'ob

¹²Joel u nojochil, cu dzo'ocole', Safán, Cu dzo'ocole', Jaanai, cu dzo'ocole' Safat.

¹³U láaktzilo'ob tu tzoolol u láaktzililo'obe', tu kaaba'intajo'ob Micael, Mesulam, Seba, Jorai, Jacán, Zía yéetel Heber, sieteob tu pa'ate'ilo'ob.

¹⁴Lelo'oba' u paalal ca'ach Abihail, u paal ca'ach Huri, Hurie', u paal Jaroa, Jaroae', u paal Galaad, Galaade', u paal Micael, Micaele', u paal Jesisai, Jesisaie', u paal Jahdo, Jahdoe', u paal Buz.

¹⁵Ahí u paal Abdiel u yáabil Gunie', leti' ca'ach u nojochil u láaktzililo'ob.

¹⁶Tuláacalo'obe' j cajlajo'ob ca'ach tu lu'umil Galaad, bey xan tu lu'umil Basán yéetel tu x péet caajilo'ob, bey xan ti' tuláacal u káaxilo'ob Sarón u cúuchil u tzéenta'al wacaxo'ob.

¹⁷Tuláacalo'obe', j dzíibta'ab u kaaba'ob ti' u ju'unil u láaktzililo'ob tu kiinilo'ob Jotam u ajawil Judá yéetel Jeroboam u ajawil Israel.

¹⁸U ch'i'ibalo'ob Rubén yéetel Gad yéetel táancoch u múuch' cajtalil u láaktzililo'ob Manasese', j xiixib aj ba'atelo'ob ca'achi, u ch'a'amajo'ob ca'ach u chimalo'ob, u máascabo'ob yéetel u x p'úunche'ob, Ma'alob ca'anbesa'anilo'ob j ba'atel. U xooquilo'ob ca'ache', cuarenta yéetel cuatro mil seicientos sesenta nu'uca'ano'ob u ti'al j ba'atel.

¹⁹J ba'atelnajo'ob yéetel j agareno'ob, yéetel Jetur, Nafis bey xan yéetel Nodab;

²⁰ba'ale' j áanta'abo'ob tumen Junab Ku, tumen le j agareno'ob yéetel máaxo'ob áantico'obe' j lúubo'ob tu kabo'ob, tumen tu chúumuc le ba'atelo' tu káatajo'ob áantaj ti' Ku. Tumen tu yocsajo'ob u yóolo'ob ti' Junab Kue', j áanta'abo'ob.

²¹Cu dzo'ocole' tu ch'a'ajo'ob u wacaxo'ob le aj p'eeco'ob, tu pa'ate'ile', cincuenta mil camello'ob, docientos cincuenta mil j tamano'ob yéetel dos mil burro'ob. Tu machajo'ob xan cien mil aj ba'atelo'ob cuxa'ano'ob.

²²Ya'ab aj p'eeco'ob j quíimo'ob, tumen Ku j beet le ba'atelo'. Ca j p'áato'ob cajtal te j cúuchilo'ob tac ca j kuchul u kiinil u tojolch'inta'alo'obo'.

²³U ch'i'ibalo'ob u táancoch ch'i'ibalo'ob Manasese', ti' u taalo'ob ca'ach tu lu'umilo'ob Basán tac Baal-hermón, Senir yéetel u pu'uquil Hermón, tumen sen ya'abo'ob ca'achi.

²⁴U nuuquil u láaktzililo'obe' tu kaaba'intajo'ob Efer, Isi, Eliel, Azriel, Jeremías, Hodavías yéetel Jahdiel, tuláacalo'ob láaj xiixib aj ba'atelo'ob, yéetel nucuch ba'alo'ob ichil u láaktzililo'ob.

²⁵Ba'ale' tu dzu'uyquintajo'ob u pucsi'ikalo'ob ti' u Ku u máanja'an ch'i'ibalo'obe', ca tu sutajuba'ob x ma' ocsaj óolo'ob tumen tu kultajo'ob u kuob le caajo'ob j xu'ulsa'abo'ob tu táano'ob tumen Ku.

²⁶Tu yo'olal lelo', u Ku Israele', tu líiksaj u yóol j Pul, u ajawil Asiria cu kaaba'intic Tiglad-pilesere', ca tu tojolch'intaj ti' le lu'umo'ob le j rubenitaob, le j gaditaob yéetel u táancoch múuch' cajtalil u láaktzililo'ob Manasese', ca tu bisajo'ob Halah, Habor, Hara yéetel tu yáalcab ja'il Gozán tu'ux yano'ob tac bejela'e'.