Read Yucateco 2 Crónicas 1 Bible Online

2 Crónicas 1 - Yucateco bible

2 Crónicas 1

¹Salomón, u paal Davide', páatchaj u mu'uka'anquintic u ajawil tu yéetel u yáantaj Yuumtzil, ca j sen ya'abchaj u páajtalil.

²Ca túun tu t'anaj tuláacal Israel: u nuuquilo'ob u aj ba'atelo'ob, u nuuquil u aj meyajilo'ob u jalach naj yéetel tuláacal u nuuquil u láaktxililo'ob yaan u páajtalilo'ob tu yóokol Israelo'.

³Leti'e' tu ch'a'aj tuláacal le máaco'ob j much'lajo'obo', ca j bin tu yéetelo'ob te j quili'ich naj yaan Gabaono', tumen ti' yaan u noj Paselil u yúuchul much'tal tu yéetel Ku le j beeta'ab tumen Moisés u palitzil Junab Ku te x tocoy lu'umo'.

⁴Ba'ale' Davide', tu bisaj ca'ach u ba'asche' Ku líikbal Quiria-jearim tac ti' le cúuchil u nu'ucbesmajo', tumen tu líiksaj jun p'éel chuybil naj u ti'al u caajil Jerusalén.

⁵Le u multuunil kultaj bronce u ca'aj tu beetaj Bezaleel, u paal Uri u yáabil Hure', ti' yaan xan ca'ach Gabaón tu táan u chuybil naj Yuumtzile'. Salomón yéetel tuláacal le caajo', j bino'ob j káat chi' te'elo'.

⁶J ooc Salomón tu yicnal le u multuunil kultaj beeta'an tu yéetel bronceo', tu táan u noj Paselil u yúuchul much'tal tu yéetel Ku, ca tu kubaj mil tóocbil ba'alche'ob tu yóokol.

⁷Ti' le áakabo' j chíicpaj Ku ti' Salomone' ca tu ya'alaj ti': káat ti' teen je'el ba'alaque', ca in dzáa ti' teech.

⁸Salomone' tu núucaj ti' Ku: teche', ta sen beetaj utz ti' David in taata, tumen dzo'oc a beetic in cutal tu jalach káanche'.

⁹Bejela'a' túune' Ku Yuumtzil, dzo'ocbes ba'ax ta wa'alaj ti' David in taata, tumen teche' dzo'oc a beetiquen ajaw ti' jun p'éel caaj sen ya'ab u cajnáalilo'ob.

¹⁰Dzáa ti' teen na'atil yéetel ojéelajil u ti'al in nu'ucbesic le caaja'; tumen ¿máax bíin páatac u nu'ucbesic le a caajal sen nojocha'?

¹¹Kue' tu núucaj ti' Salomón: Bey tumen dzo'oc a wa'alic ba'ax a káat, yéetel bey ma' ta káataj taakin mix ayikalilo'ob, mix tziiquilo'ob, mix u quíimil a aj p'eeco'ob, mix chowac cuxtal, tumen ta káataj ti' teen na'atil yéetel ojéelajil u ti'al a méektáantic in caajal tu'ux tin dzáajech a beet a ajawo',

¹²quin dzáic ti' teech na'atil yéetel ojéelajil, chéen ba'ale' bíin in dzáa ti' teech xan taakin, ayikalilo'ob yéetel tziiquilo'ob je'el bix le ma' j yanchaj ti' le ajawo'ob yanchajo'ob táanil ti' techo', mix xan ti' le bíin yanaco'ob cu dzo'ocol techo'.

¹³Cu dzo'ocole', Salomone' j luk te j quili'ich naj yaan Gabaón tu táan u noj Paselil u yúuchul much'tal tu yéetel Kuo', ca j suunaj tu caajil Jerusalén, cu dzo'ocol u bin u xíimbalt tu noj Paselil u yúuchul much'tal tu yéetel Kue' ajawnaj Israel.

¹⁴Salomone' tu ya'abcuntaj u bolano'ob bey xan u aj nat' tzíimino'ob, yanchaj mil cuatrocientos u bolano'ob yéetel doce mil u aj nat' tzíimino'ob, ca tu dzajo'ob u cananto'ob u cúuchilo'ob u bolanilo'ob ba'atel yéetel ichil u aj cananilo'ob u jalach najil Jerusalén.

¹⁵Ajawe', tu beetaj u yantal tu caajil Jerusalén ya'abcach plata, oro yéetel jadzut tuunicho'ob; bey xan sen ya'abchaj kuulche'ob je'el bix u ya'abilo'ob u x ko'ochilo'ob káax ti' le táax lu'umo'.

¹⁶U tzíimino'ob ca'ach Salomone', cu ma'analo'ob Muzri yéetel Cicilia, tumen aj man coonolo'ob u jalach naj.

¹⁷Cu manico'ob ca'ach Egipto jun p'éel bolan tu yo'olal u seicientos u taakinilo'ob plata yéetel jun túul tzíimin tu yo'olal ciento cincuenta. tuláacal le ajawo'ob j hititaob yéetel j siriobo', cu mano'ob tu kab u aj coonolo'ob Salomón.