Read Yucateco 2 Crónicas 10 Bible Online

2 Crónicas 10 - Yucateco bible

2 Crónicas 10

¹Roboame', j bin tu lu'umil Siquem, tumen tuláacal Israele', j bin Siquem u ti'al u beeto'ob u ajawtal.

²Ba'ale' Jeroboam u paal Nabat cajnáal Egipto tumen j púudz ca'ach ti' ajaw Salomón, ca j bin u ta'acbesubáe', j luk Egiptoe' ca j suunaji.

³Le ca j túuchi'ita'ab cha'abile', Jeroboam yéetel tuláacal Israele', j bino'ob j t'aan tu yéetel Roboame', ca tu ya'alajo'ob ti':

⁴A taatae' tu sen yedzajo'on; p'íitcunt le sen bo'ol u dzaamaj t óokolo', ca c meyajtech.

⁵Roboame', tu núucaj ti'ob: Suunaque'ex a wilene'ex tu yóox p'éel kiin. Le caajo' j bini,

⁶Roboam túune', j bin u káat chi'it ti' u nuuquilo'ob le caaj meyajtic ca'ach Salomón u taata ca'aliquil cuxa'ano'. Ca tu káat chi'itaj ti'ob: ¿Ba'ax ca tzoolxiquintique'ex ti' teen ca in núuc ti' le caaja'?

⁷Leti'obe' tu ya'alajo'ob ti': Wa ca wutzul t'antic le caaj u ti'al a beetic ba'ax u káato'ob yéetel ma' ta kakat núuctic u t'aano'obe', leti'obe', bíin u puli' meyajtecho'ob.

⁸Ba'ale' Roboame', ma' tu táan óoltaj u tzol xiquin u nuuquilo'ob le caajo, ba'ale', j bin u káat chi'it ti' le xi'ipalal u yéet kiinilo'ob máaxo'ob meyajtico'ob ca'acho',

⁹ca tu káat chi'itaj ti'ob: ¿Ba'ax ca tzoolxiquintique'ex ca in núuc ti' le caaj, cu káatic ti' teen ca in jun p'íitcunt le bo'olal dza'an u beeto'ob tumen in taatao'?

¹⁰Le xi'ipalal u yéet líikaco'obo', tu núucajo'ob ti': Le caaj káatic ti' teech ca a jun p'íitcunt le bo'ol dza'an ti'ob tumen a taatao', unaj a núuquic ti'ob: Wa in taata tu yedzaje'exe', tene', bíin in asab yedze'ex;

¹¹wa tu dzaj ti' te'ex ya'ab bo'olal a beete'exe', tene', bíin in asab ya'abcunt ti' te'ex; wa tu jadzaje'ex yéetel kéewelo'obe', tene', bíin in jadze'ex yéetel ba'alo'ob yaan u yaacho'ob fierro u ca'ajo'ob.

¹²Tu yóox p'éel kiine', j suunaj Jeroboam yéetel tuláacal le caaj tu táan Roboam je'el bix a'alabic ti'ob tumen le ajawo'.

¹³Ba'ale' le ajaw Roboamo', ma' tu yutzul núucaj u t'aano'obi', tu dzaj jun tzéelil u tzol xiquin u nuuquilo'ob le caajo',

¹⁴ca tu ya'alaj ti'ob le ba'ax a'ala'ab ti' tumen u yéet paalalilo': wa bin u taata tu dzáa jun p'éel páatan ya'ab u bo'olale', leti'e' bíin u asab nojochquinte, bey xan wa bin u taata jaadznaj tu yéetel kéewelo'obe', leti'e', bíin jaadznac yéetel ba'alo'ob yaan u yaacho'ob fierro' u ca'ajo'ob

¹⁵le ajawe' ma' tu táan óoltaj u káat óol le caajo', tumen Yuumtzil óolt ca úuchuc beyo', tu yo'olal u dzo'ocpajal ba'ax tu séeb chi'itaj Yuumtzil ti' Jeroboam tu chi' Ahías j siloil.

¹⁶Le ca tu yilaj tuláacal u caajil Israel ma' j táan óolta'abo'ob tumen le ajawo', tu núucajo'ob beya': ¡Mix ba'al yaan c ila'a tu yéetel David! ¡Mix jun p'éel kamba'albáil yaan to'on tu yéetel u paal Isaí! ¡J israelitaex, suunaque'ex tu jujun túulile'ex ta wotoche'ex! ¡David xane', u canant u yotochnáalo'ob! Ti' le súutuco', tuláacal le j israelitaob j suunajo'ob tu yotocho'ob.

¹⁷Ba'ale' le j israelitaob cajnáalo'ob tu caajilo'ob Judao', Roboam ajawtico'ob.

¹⁸Cu dzo'ocole', le ajaw Roboamo', tu túuchi'itaj Adoram u aj kam meyajo'ob x ma' bo'olale', ca j quíimsa'ab tu yéetel ch'iin tumen le j israelitaobo'. Le ajaw Roboam túune' séeb j na'ac tu bolane', ca j púudz u bimbal Jerusalén.

¹⁹Bey úuchic u líikil u yóol Israel tu yóokol u chi'ibal David tac bejela'o'.