Read Yucateco 2 Crónicas 11 Bible Online

2 Crónicas 11 - Yucateco bible

2 Crónicas 11

¹Le ca j kuch Roboam Jerusalene', tu much'quintaj ciento ochenta mil u asab ma'alobil u aj ba'atelo'ob ti' u yotochnáalo'ob judá yéetel Benjamín u ti'al ca xi'ic u ba'atelt Israel tu yo'olal u ca'a toquic u ajawil.

²Ba'ale' Yuumtzile' tu t'anaj Semaías, u palitzil Kue', ca tu ya'alaj ti':

³A'al ti' Roboam, u paal Salomón, u ajawil Judá, yéetel ti' tuláacal u j israelitailo'ob Judá yéetel Benjamín,

⁴quin wa'alic ti'ob ma' u ba'atelo'ob tu yéetel u láaktzilo'ob. Láaj suunaco'ob tu yotocho'ob, tumen bey in káat ca úuchuco'. Le ca tu yu'ubajo'ob ba'ax tu ya'alaj Yuumtzile', j suunajo'ob, tu p'atajo'ob u bino'ob u ba'atelto'ob Jeroboam.

⁵Roboame', j cajlaj Jerusalene', ca tu tuulumtaj u caajilo'ob Judá.

⁶Tu mu'uka'anquintaj Belén, Etam, Tecoa,

⁷Bet-sur, Soco, Adulam,

⁸Gat, Maresa, Zif,

⁹Adoraim, Laquis, Azeca,

¹⁰Zora, Ajalón yéetel Hebrón, u tuulum caajilo'ob ca'ach Judá yéetel Benjamín.

¹¹Tu mu'uka'anquintaj xan le tulu'umo'obo', ca tu dzaj u nuuquilo'ob máaxo'ob canantic ba'al u ti'al jaanta'al, aceite yéetel vino.

¹²Cu dzo'ocole', tu dzaj chimalo'ob yéetel x lóomte'ob, ti' tuláacal u jujun p'éelil le caajo'obo', ca tu sen mu'uka'anquintajo'ob. Bey p'áatic Roboam u méektáant Judá yéetel Benjamín.

¹³U aj kiinilo'ob yéetel u j levitailo'ob tuláacal Israele', j taalo'ob ti' jejeláas caajo'ob u nupjuba'ob tu yéetel,

¹⁴le j levitaobo' tu xúunp'attajo'ob u cúuchil u tzéen ba'alche'ob yéetel u chuucáan ba'al u ti'alo'ob u ti'al u bino'ob Jerusalén yéetel tu láak u caajilo'ob Judá, tumen Jeroboam yéetel u paalalo'obe', tu wet'ajo'ob ti'ob u beetico'ob u aj kiinilo'ob u ti'al Yuumtzil.

¹⁵Jeroboame' tu dzaj u aj kiino'ob ti' le manba'al kulnajo'obo', u ti'al u kultico'ob kasilba'alo'ob, yéetel le mejen wacaxo'ob tu beetajo'.

¹⁶Cu dzo'ocole', le máaxo'ob yaan u tuuculil ti'ob u caxtico'ob Yuumtzil, u Ku Israele', j bino'ob tu paach le aj kiino'ob yéetel j levitaobo', ca j bino'ob Jerusalén u ti'al u kubo'ob quíimsbil ba'alche'ob ti' Yuumtzil, u Ku u máanja'an ch'i'ibalo'ob.

¹⁷Beyo' tu mu'uka'anquintajo'ob u ajawil Judá, tu yáantajo'ob Roboam bul óox p'éel ja'abo'ob, tumen chéen óox p'éel ja'abo'ob j máan je'el bix máanic David yéetel Salomone'.

¹⁸Roboame', j dzo'oc u beel tu yéetel x Mahalat, u x ch'upul paal Jerimot, u paal David, yéetel x Abihail, u x ch'upul paal Eliab u yáabil Isaí.

¹⁹U paalal Roboam yéetel x Mahalate', tu kaaba'intajo'ob Jehús, Semarías yéetel Zaham.

²⁰Cu dzo'ocole', j dzo'oc u beel yéetel x Maaca, u x ch'upul paal Absalón, u paalalo'obe' tu kaaba'intajo'ob Abiam, Atai, Zisa yéetel Selomit.

²¹Roboame', j yanchaj ca'ach dieciocho u yatano'ob yéetel sesenta u x keecho'ob, ba'ale' tu asab yaabiltaj x Maaca ichil tuláacalo'ob. Yanchaj veintiocho u j xibil paalal yéetel sesenta u x ch'upul paalal.

²²Roboame' tu dzáa Abiam, u yaal x Maaca, u ti'al u beet u nojochil ichil u sucu'uno'ob yéetel u yíidzino'ob tumen u káat ca'ach u dzáa u ti'al u beet u ajawil.

²³Yanchaj u ma'alob tuuculil u t'oxic u chuucáan u paalal tu ichil tuláacal u lu'umilo'ob Judá yéetel Benjamín, bey xan ichil tuláacal le j tuulum caajo'obo', ca tu dzaj ti'ob ya'ab ba'al u ti'al u jaanto'ob yéetel ya'ab u yatano'ob.