Read Yucateco 2 Crónicas 12 Bible Online

2 Crónicas 12 - Yucateco bible

2 Crónicas 12

¹Le ca j p'áat jedzecnac u ajawil Roboam u ti'al u yu'ubicubáa mu'uka'ane', tu p'ataj u dzo'ocbesic u ya'almaj t'aano'ob Yuumtzil, bey xan tu beetajil tuláacal Israel.

²Ba'ale' bey tu x ma' ocsaj óoltajo'ob Yuumtzil tu cinco ja'abo'ob le u ajawil Roboame', Sisac u ajawil Egiptoe', j bin u ba'atelt Jerusalén

³u yactáantmaj mil docientos u bolanilo'ob ba'atel, sesenta mil aj ba'atelo'ob u na'atmajo'ob u tzíimino'ob, yéetel sen ya'ab aj ba'atelo'ob cu taalo'ob Egipto: j libiob, j suquienitaob yéetel j etiopeob.

⁴Tu jáanpaytaj u tuulum caajilo'ob Judae', ca j kuch tac Jerusalén.

⁵Aj bóobat Semaías túune', j bin tu táan Roboam yéetel tu táan u nuuquilo'ob Judá, u much'majuba'ob Jerusalén tumen táan u náadzal Sisaque', ca tu ya'alaj ti'ob: Yuumtzile' cu ya'alic dzo'oc a xúunp'attique'ex, let o'olal cu xúunp'attique'ex tu kab Sisac.

⁶U nuuquilo'ob Israel yéetel le ajawo', tu ya'alajo'ob yéetel cabal óolal: ¡Yuumtzile', jaaj ba'ax cu ya'alic!

⁷Le ca tu yilaj Yuumtzil dzo'oc u t'onjo'olta'alo'obe', tu ya'alaj ti' Semaías: Bey dzo'oc u t'ontalo'ob tin táano', ma' bíin in xu'ulso'obi, ba'ale' bin in ca'aj in toco'ob ichil jun p'íit kiin, ma' bíin in jadz Jerusalén tu kab Sisaqui';

⁸ba'ale', bíin in beet u t'onquinta'alo'ob tu yo'olal u yilico'ob ma' tu páajtal u que'etel u meyajta'al u ajawilo'ob yóokolcaab ti' in meyajta'al teen.

⁹Sisac u ajawil Egiptoe', tu ba'ateltaj Jerusalene', ca tu tocaj u ayikalil u kulnaj Yuumtzil yéetel u ayikalil jalach naj. Tu ch'a'aje', ca tu bisaj le chimalo'ob oro u ca'ajo'ob u beetmaj ca'ach Salomono'.

¹⁰Le ajaw Roboamo', tu beetaj chimalo'ob bronce u ca'ajo'ob u jeelinte', ca tu p'ataj canantbil tumen u nuuquil u aj cananilo'ob u jool naj jalach naj.

¹¹Je'el jay téen cu bin ca'ach le ajaw tu kulnaj Yuumtzilo', le aj canano'obo', cu bisico'ob ca'achi'. Cu dzo'ocole' cu sutico'ob tu cúuchil tu'ux cu canantico'ob.

¹²Bey tumen j t'onlaj Roboam tu táan Yuumtzilo', j máan u p'uja'anile', ca j p'áat ma' tu jach xu'ulsaji. Quex tumen beyo', yaan ca'ach ba'alo'ob cu beeta'al ma'alob Judá.

¹³Le ajaw Roboamo', j mu'uka'anchaje', ma' xóot' u ajawil Jerusaleni'. Le ca cáaj u beetic u ajawile', yaan ca'ach cuarenta yéetel jun p'éel ja'abo'ob ti', ajawnaj diesisiete ja'abo'ob Jerusalén, le caaj tu yéeyaj Yuumtzil ichil tuláacal u ch'i'ibalo'ob Israel u ti'al u cajtal u kaaba'e'. U maama Roboame', tu kaaba'inta Naama, x amonil ca'ach.

¹⁴Kechel úuchic u cuxtal tumen ma' tu caxtaj u beel Yuumtzil tu jaajil u yóoli'.

¹⁵U tzicbalil Roboam, líikbal cáajic tac dzo'oquique', j dzíibta'ab tumen aj bóobat Semaías j iddoil tu dzíibil u yotochnáalo'ob.

¹⁶Mantadz yanchaj ba'atel ti' Roboam tu yéetel Jeroboam.

¹⁷Le ca j quíim Roboame', j mu'uc tu Caajil David. Cu dzo'ocole', j culaj Abiam u paal tu jalach káanche'.