Read Yucateco 2 Crónicas 15 Bible Online

2 Crónicas 15 - Yucateco bible

2 Crónicas 15

¹Azarías u paal Obede', j ch'a'ab tumen u pixan Kue',

²ca j bin u nuptáant Asa u ti'al ca u ya'al ti': ¡Asa, teech yéetel tuláacal u lu'umilo'ob Judá yéetel Benjamine', ch'en xiquintene'ex! Yuumtzile', ti' yaan ta wéetele'ex, wa ti' yane'ex tu yéetele'. Wa ca caxtique'exe', ca nuptáantique'ex; wa ca xúunp'attique'exe', leti'e', bíin xan u xúunp'atte'ex.

³Israele', úuch mina'anchajac u jaajil Ku ti', mina'an xan u aj kiin u ti'al ca'anbesic, mix máac nu'uctic u beel Ku ti'.

⁴Ba'ale' tu kiinilo'ob u yúuchul mukyaj, cu suut u tuucul le caaj ti' Yuumtzil u Ku Israelo', leti'e', cu cha'ic u nuptáanta'al.

⁵Ti' le kiino'ob ca'acho', mina'an jéedzel ti' mix máac, chéen sajaquilil yaan ti' tuláacal u cajnáalilo'ob tuláacal múuch' caajo'ob.

⁶Le múuch' caajo'ob yéetel le caajo'obo', cu quíimsicuba'ob tu baatzilo'ob, tumen cu dza'abal sajaquil ti'ob tumen Yuumtzil tu yéetel tuláacal mukyajo'ob.

⁷Ba'ale', te'exe', j xiixib máacchajque'ex, ma' u lúubul a wóole'ex, tumen bíin bo'ota'ac a meyaje'ex.

⁸Le ca tu yu'ubaj Asa u péectzil le aj bóobato', j xiixib máacchaje', ca tu tzelaj le j p'ecbe'en kuob ti' tuláacal u lu'umilo'ob Judá yéetel Benjamín, bey xan ti' tuláacal le caajo'ob tu ch'a'aláantaj tu witzilo'ob Efraín, tu ca'aj utzquintaj xan u multuunil u kulta'al Yuumtzil yaan actáan ti' u x máacan pakil u kulnaj Yuumtzilo'.

⁹Cu dzo'ocole', tu much'quintaj tuláacal Judá yéetel Benjamín bey xan tuláacalo'ob le yano'ob tu yicnal tu taalbalo'ob tu lu'umilo'ob Efraín, Manasés yéetel Simeono', tumen ya'ab ti' le j israelitaobo', j máano'ob tu tzéel Asa le ca tu yilajo'ob ti' yaan Ku tu yéetele'.

¹⁰Tu much'ajuba'ob Jerusalén tu yóox p'éel winalil ti' u quince ja'abilo'ob u ajawil Asa,

¹¹ca tu kubajo'ob quíimsbil ba'alche'ob ti' Yuumtzil ti' le kiinaco', setecientos wacaxo'ob yéetel siete mil j tamano'ob, ti' le ba'alche'ob tu tocajo'ob ti' le aj p'eeco'.

¹²Cu dzo'ocole', tu séeb chi'itajo'ob yéetel tuláacal u pucsi'ikalo'ob u caxtico'ob Yuumtzil u Ku u máanja'an ch'i'ibalo'ob.

¹³Cu dzo'ocole' tu ya'alajo'ob bíin quíimic je'el máax ma' tu caxtic Yuumtzil u Ku Israele', je'el bix u nojochile', bey u chichanil, je'el bix le j xiibo', bey xan le co'olelo'.

¹⁴Le jalach t'aano', tu beetajo'ob yéetel u ka'amcach awatilo'ob qui'imac óolal bey xan yéetel u jóopsaj paaxilo'ob trompetaob yéetel baaco'ob.

¹⁵Tuláacal Judá qui'imacchaj u yóol tu yéetel le jalach t'aan tu beetajo'obo', tumen tu jalach t'antajo'ob yéetel tuláacal u pucsi'ikalo'ob tu jaajil u yóolo'ob tu caxtajo'ob Yuumtzil, leti' xane' tu cha'aj u nuptáanta'ale' ca tu dzaj jéedzel ti'ob yéetel máax caja'ano'ob tu tzéelo'ob.

¹⁶Cu dzo'ocole', Asae', tu wet'aj u beetic u x ajaw maamail x Maaca u chiich, tumen x leti'e', tu túuchi'itaj beetbil jun p'éel u yoochel Asera. Asae' tu kascuntaj le oochelo'; tu xe'exe'et'aje', ca tóocaj tu chan áalcab ja'il Cedrón.

¹⁷Quex tumen ma' j lukesa'ab Israel le manba'al kulnajo'obo', Asae', tu yocsaj u yóol ti' Yuumtzil,

¹⁸ca tu dzaj tu kulnaj Yuumtzil tuláacal le oro yéetel le plata je'el bix le u jun páaycuntmaj leti'e' bey le u jun páaycuntmaj u taata u ti'al le Yuumtzilo'.

¹⁹Ma' j yanchaj ba'atel tac tu treinta yéetel cinco ja'abilo'ob u ajawil Asao'.