Read Yucateco 2 Crónicas 16 Bible Online

2 Crónicas 16 - Yucateco bible

2 Crónicas 16

¹Ba'ale' ti' u treinta yéetel seis ja'abil ti' u ajawil Asae', Baasa u ajaw Israele', j bin u ba'atelt Judae', ca tu beetaj u tuulumilo'ob Ramaj u ti'al ma' u cha'ic u jóokol mix u yocol u ajawil Judá.

²Asa túune' tu láaj ch'a'aj u oroil yéetel u platail u kulnaj Yuumtzil yéetel ti' le jalach najo', ca tu túuxtaj ti' Ben-adad u ajawil Siria, cajnáal ca'ach Damasco. Tu túuchi'itaj ti' xan le t'aana':

³Beet tin wéetel jun p'éel nup t'aan je'el bix le tu beetaj c taataobe'. Je'el quin túuxtic ti' teech oro yéetel plataa'. Pa'a le nup t'aan a beetmaj tu yéetel Baasa u ajawil Israelo', ca u p'at u chi'ichnaccuntiquen.

⁴Ben-adade', tu éejemtaj le ba'ax a'ala'ab ti' tumen Asao', ca tu túuchi'itaj u nuuquil u aj ba'atelo'ob ba'ateltic Israel. Bey tu ch'a'ajilac Ijón, Dan, Abel-maim yéetel tuláacal u caajilo'ob Neftalí cu meyajo'ob ca'ach tu'ux cu líikesa'al ba'alo'ob.

⁵Le ca tu yojéeltaj Baasae', tu wet'aj u beetic u tuulumilo'ob Ramae', ca tu xu'ulsaj u beetic le meyajo'obo'.

⁶Le ajaw Asa túuno' tu t'anaj tuláacal Judae', ca tu bisajo'ob le tuunicho'ob tu yéetel le che'ob cu meyaj ca'ach ti' Baasao', ca tu beetaj u tuulumilo'ob Geba yéetel Mizpa.

⁷Ti' le kiino', j bin aj bóobat Hanani u xíimbalt Asa, u ajawil Judae', ca tu ya'alaj ti': U aj ba'atelo'ob u ajawil Siriae', dzo'oc u púudzulo'ob ta kab, tumen ta caxtaj u yáantaj u ajawil Siriae' ca ta p'ataj jun tzéelil u yáantaj Yuumtzil a Junab Ku.

⁸¿Ma' wa u mu'uka'ancuntmajuba'ob ca'ach le j etiopeob yéetel le j libiob yéetel u múuch'il u aj ba'atelo'ob yaan ca'ach ya'ab u tzíimino'ob yéetel u bolanil u ba'atelo'obo'? Ba'ale' Yuumtzile' tu kubaj ta kab tumen ta káataj ca u yáantech.

⁹Tumen Yuumtzile', mantadz táan u yilic ba'ax cu yúuchul tu yóokolcaab u ti'al u mu'uka'anquintic máax ocsaj óoltic tu jaajil u yóol. ¡ti' lela', ta beetajabáa j ma' na'atil! Tumen líikbal ti' le kiina' bíin yanac ti' teech u láak ba'atelilo'ob.

¹⁰Asae', sen p'u'uj ti' le aj bóobato', ca tu túuchi'itaj kalbil. Ti' le kiino'obo', tu loobil t'antaj dze'edzec ti' le caajo'.

¹¹U tzicbalil Asa líikbal ti' u cáajbal tac u dzo'ocbale', dzíibta'an tu dzíibilo'ob u ajawilo'ob Judá yéetel Israel.

¹²Ti' u ja'abil treinta yéetel nueve u ajawile', Asae' j chaket koja'anchaj ti' u yooco'ob; ba'ale', ti' u koja'anilo' ma' tu caxtaj u dza'acal tumen Yuumtzili', chéen tu caxtaj u dzaac aj dzac yajo'ob.

¹³J quíim tu cuarenta yéetel jun ja'ab jo'op'oc u ajawil,

¹⁴ca j mu'uc ti' le mucnal tu túuchi'itaj beebtil tu Caajil Davido'. J dzaab ti' jun p'éel kóoch che' chuup tu yéetel qui'iboc ja'ob yéetel tuláacal qui'iboc ba'alo'ob ma'alob nu'ucbesa'anilo'ob. Cu dzo'ocole', ca t'a'ab jun p'éel nojoch káak u ti'al u ka'ajsajil.