Read Yucateco 2 Crónicas 17 Bible Online

2 Crónicas 17 - Yucateco bible

2 Crónicas 17

¹Cu dzo'ocole', Josafat, u paal Asae', j culaj tu jalach káanche' u taata, ca tu beetajubáa mu'uka'an tu táan u lu'umil Israel.

²Tu dzáa Molayo'ob ti' tuláacal u tuulumil u caajilo'ob Judá, bey xan u múuch'ul aj ba'atelo'ob ti' tuláacal u lu'umil Judá yéetel ti' u caajilo'ob Efraín le j ch'a'abo'ob ca'ach tumen u taatae'.

³Yuumtzile' j yanchaj tu tzéel Josafat, tumen j cuxlaj je'el bix David u máanja'an ch'i'ibal ca'ache'. Ma' tu meyajtaj u jeejeláas oochelo'ob Baal,

⁴ba'ale' tu meyajtaj u Ku u taata, tu dzo'ocbesaj u nu'ucbe'en t'aano'ob, ma' tu quetaj le ba'ax cu beetic u cajnáalilo'ob Israeli'.

⁵Le t o'olale', mu'uka'ancunta'ab u méektáanil tumen Yuumtzil. Tuláacal Judá beetic siibalo'ob ti', yanchaj ya'abcach ayikalilo'ob yéetel tziiquilo'ob ti'.

⁶Xíimbalnaj tu yéetel ocsaj óol tu beel Yuumtzil, yéetel tu ca'a tzelaj tu lu'umil Judá le manba'al kulnajo'ob bey xan u yoochelo'ob Asera.

⁷Ti' tu yóox ja'abil u ajawile', tu túuchi'itaj Ben-hail, Abdías, Natanael yéetel Micaías u jalach aj meyajo'ob u ti'al ca'anbesaj tu lu'umil Judá,

⁸tu túuchi'itaj xan tu yéetelo'ob le j leviob Semaías, Netanías, Zebadías, Asael, Semiramot, Jonatán, Adonías, Tobías yéetel Tobadonías. Láakinta'ano'ob ca'ach tumen aj kiino'ob Elizama yéetel Jorán.

⁹Tu túuchi'itajo'ob u ti'al u ca'anbeso'ob ti' u cajnáalilo'ob Judá ba'ax cu ya'alic u ya'almaj t'aan Yuumtzil. Leti'obe' tu xíimbaltajo'ob u caajilo'ob judá ca'aliquil táan u ca'anbesico'ob le caajo'.

¹⁰Bey túuno' tuláacal le ajawilo'ob bakpachmail Judao', sen sajacchajo'ob ti' Yuumtzil, ma' yanchaj u yóolo'ob u ti'al u ba'atelo'ob tu yéetel Josafati'.

¹¹Ba'ale', dze'edzec ti' le j filisteobo', cu taasico'ob ca'ach siibalo'ob bey xan plata u ti'al u bo'otico'ob páatan ti' Josafat, le j arabeobo', tu bisajo'ob siete mil setecientos j tamano'ob yéetel siete mil setecientos j yuuco'ob.

¹²Josafate', xi'ic ca'ach u bin u mu'uka'antal u ajawil. Tu beetaj tulu'umo'ob Judá, bey xan caajo'ob u ti'al u líikesa'al janalo'ob,

¹³j yanchaj ya'ab u ba'aluba'ob tu caajilo'ob Judá. J yanchaj xan u aj ba'atelo'ob jach xiixib máaco'ob tu caajil Jerusalén,

¹⁴u xooquil u kaaba'ob u yotochnáalo'obe', leti' lela': U náacomil u aj ba'atelo'ob Judae', Adnas yéetel trecientos mil u aj ba'atelo'ob.

¹⁵Tu tzéele', ti' ca'ach yaan Johanán yéetel docientos mil aj ba'atelo'ob,

¹⁶tu tzéele', ti' ca'ach yaan Amasías u paal Zicri, yéetel docientos mil aj ba'atelo'ob xiixib máaco'ob, leti'e' tu juunal u yóol tu ya'alaj u yáantaj.

¹⁷Tu yo'olal Benjamine', ti' yaan Elíada jun túul xiixib aj ba'atel yéetel doscientos mil j xiibo'ob u ch'a'amajo'ob u x p'úunche'ob yéetel u chimalo'ob,

¹⁸tu tzéele', ti' yaan Jozabad yéetel ciento ochenta mil aj ba'atelo'ob u nu'ucbesmajuba'ob.

¹⁹Lelo'oba' ti' yano'ob ca'ach tu yáanal u kab le ajawo', ma' xoca'an ichilo'ob le j dzaabo'ob tumen le ajaw ti' u tuulum caajilo'ob Judao'.