Read Yucateco 2 Crónicas 18 Bible Online

2 Crónicas 18 - Yucateco bible

2 Crónicas 18

¹Josafate' j yanchaj ya'abcach ayikalil yéetel tziiquil ti', tu jáachiltaj acab.

²Cu dzo'ocol u máan dze'edzec ja'abo'obe', j bin Samaria u xíimbalt Acab, leti'e', u ti'al u kiinbesic kuchic Josafat yéetel u aj láakinajo'obe', tu quíimsaj ya'ab j tamano'ob yéetel wacaxo'ob, ca tu yilaj bix u yoquesic tu pool ca xi'ic u ba'atelt Ramot le yaan Galaado'.

³Acab u ajawil Israele', tu káataj ti' Josafat u ajawil Judá: ¿A káat a láakinten u ti'al ca xi'iquen in ba'atelt Ramot le yaan Galaado'? Josafate', tu núucaj: teen yéetel in aj ba'atelo'obe', ti' yano'on ta wéetel yéetel xan a aj ba'atelo'obe' u ti'al ca xi'ico'on te j ba'atelo'.

⁴Ba'ale', táanil unaj a káat chi'itic ba'ax cu ya'alic Yuumtzil.

⁵Le ajawo' tu much'quintaj le cuatrocientos aj bóobato'obo', ca tu káat chi'itaj ti'ob: ¿Unaj wa c ba'ateltic Ramot le yaan Galaado', wa ma'? Leti'obe' tu núucajo'ob: Ba'ate'eltej tumen bíin ku'ubuc ta kab tumen Ku.

⁶Ba'ale' Josafate' tu káat chi'itaj: ¿Mina'an wa u láak u aj bóobat Yuumtzil way u ti'al ca káatchi'ina'aco'on ti'e'?

⁷U ajawil israele', tu núucaj ti' Josafat: Yaan u láak jun túul máax yéetel je'el u páajtal c káat chi' ti' Yuumtzile'. Micaías u paal Imla. Ba'ale', kaas u lúubul ti' teen tumen mix jun téen cu ka'aytic ti' teen ma'alob péectzilo'ob, chéen cu ka'aytic ti' teen kaakas péectzilo'ob. Ba'ale' Josafate' tu ya'alaj ti': Ma' a t'aan beyo'.

⁸Tu séeblaquile', u ajawil Israele', tu t'anaj jun túul u nojochil u aj ba'atelo'obe', ca tu ya'alaj ti': ¡Séeb talac Micaías u paal Imla!

⁹U ajawil Israel yéetel u ajawil judae', u búucbesmajuba'ob yéetel u nookil u ba'atelo'ob, tu jalach káanche'ob te j táax lu'um tu jool u caajil Samariao', tuláacal le aj bóobato'obo', cu tze'eco'ob ca'ach tu táano'ob.

¹⁰Sedequías u paal Quenaanae', tu beetaj ca'ach jujun p'éel baaco'ob fierro u ca'ajo'obe', ca jo'op' u yawat a'alic: ¡Bey dzooc u ya'alic Yuumtzila': yéetel le baaco'oba', bíin a ba'atelt le j siriob ca tu láaj xu'ulsajo'ob!

¹¹Bey ca'ach tu ka'aytaj tuláacal le aj bóobato'obo'. cu ya'alico'ob ca'ach ti' le ajawo': Ba'ate'elt Ramot le yaan Galaado', ca pa'aj muuknaquech, tumen Yuumtzile', bíin u kub ta kab le caajo'.

¹²Le aj bisaj t'aan j bin t'anic Micaíaso', tu ya'alaj ti': Tuláacal le aj bóobato'obo', dzo'oc u ka'aytico'ob ma'alob péectzil ti' le ajawo'. Quin káat óoltic teech ca t'aanaquech je'el bix úuchic u t'aano'obo', ka'ayt ma'alob péectzil.

¹³Micaíase', tu núucaj: ¡Quin jalacht'antic tu kaaba' Yuumtzil chéen bíin in wa'al le ba'ax bíin u ya'al ti' teen Junab Ku ca in wa'ale'!

¹⁴Cu dzo'ocole', j bin tu táan le ajawo', ca káat chi'ita'ab ti' tumen le ajawo': Micaías ¿unaj wa c ba'ateltic Ramot le yaan Galaado', wa ma'? Micaíase', tu ya'alaj: Bíin pa'a muuknaque'ex, tumen bíin ku'ubuc ta kabe'ex tumen Yuumtzil.

¹⁵Ba'ale', le ajawo' tu núucaj ti': ¿Jay téen unaj in wa'alic ti' teech tu yéetel jalach t'aan chéen unaj a wa'alic ti' teen ba'ax jaaj tu kaaba' Yuumtzil?

¹⁶Micaías túune' tu ya'alaj: Dzo'oc in wilic le j israelitaobo', ki'itpaja'ano'on bey j tamano'ob te j pu'uco'obo', Bey j tamano'ob mina'an máax canantico'obe'. Yuumtzile' dzo'oc u ya'alic: lelo'oba' mina'an u yuumilo'ob; suunac tu jujun túulil tu yotoch yéetel jéedzel.

¹⁷U ajawil Israele' tu ya'alaj ti' Josafat: ¿Ma' wa dzo'oc in wa'alic ti' teche' le máaca', ma'atech cu taasic ti' teen ma'alob péectzilo'ob, ba'ale' chéen kaakas péectzilo'ob cu taasic ti' teen?

¹⁸Micaíase', tu ya'alaj xan: Tu yo'olal le ba'ax dzo'oc a wa'alico', u'uye'ex ba'ax cu ya'alic Yuumtzil: Tin wilaj Yuumtzil culucbal tu jalach káanche', bey xan tuláacal u aj ba'atelilo'ob ca'an, wa'alacbalo'ob tu táan leti', tu x no'oj yéetel tu x dzíic.

¹⁹Yuumtzil túune' tu káataj ti'ob máax je'el u bin u yoques tu pool Acab, u ajawil Israel u ti'al ca xi'ic u ba'atelt Ramot le yaan Galaado', tu yo'olal u lúubuli'. Tu jujun túulilo'obe' tu ya'alajo'ob jejeláas ba'alo'ob.

²⁰Ba'ale' j kuch jun túul pixan tu táan Yuumtzile' ca tu ya'alaj leti' bíin xi'ic u beetej. Yuumtzile' tu káat chi'itaj bix u tucultmajil u beetic.

²¹Le pixano', tu ya'alaj bin u ca'aj u yoques tuus tu pool tuláacal u aj bóobato'ob le ajawo'. Yuumtzil túune' tu ya'alaj ti'e' jach ma'alob u tuculmajil, tumen bíin páatchajac u tusic, cu dzo'ocole' tu ya'alaj ti' ca xi'ic u beetej.

²²Bejela'e', a wojel Yuumtzile', dzo'oc u dzáic jun túul pixan cu tuus tu chi' a aj bóobato'ob, yéetel dzo'oc u xot'ic u kiinil u xu'ulsiquech.

²³Sedequías túun u paal Quenaanae', tu nadzajubáa tu yicnal Micaíase', ca tu dzaj jun puul laaj ti'e', ca tu ya'alaj: ¿Tu'ux jóok ti' teen u pixan Yuumtzil u ti'al ca xi'ic u t'aanech teech?

²⁴Micaíase', tu núucaj ti': Bíin a wojéelt le kiin le quéen xi'iquech a ta'acbesabáa najil ti' najil.

²⁵U ajawil Israel túune', tu ya'alaj: ¡Mache'ex Micaíase', ca a bise'ex a kale'ex tu yicnal Amón u j méektáanil le caajo', yéetel tu yicnal Joás, in paal!

²⁶A'ale'ex ti'e' quin túuchi'itic ca ka'alac yéetel ca dza'abac chéen jun p'íit waaj yéetel jun p'íit ja' ti', tac tu kiinil in suut toj in wóol.

²⁷Micaíase', tu ya'alaj: Wa bíin suunaquech toj a wóole', Yuumtzil túune', ma' t'aanac tin chi'i'.

²⁸Bey túuno', u ajawil Israel yéetel Josafat u ajawil Judae', j bino'ob u ba'atelto'ob Ramoot le yaan Galaado'.

²⁹U ajawil Israele' tu ya'alaj ti' Josafat: Teene' bin in ca'aj ichil le ba'atel in búuquintmaj jun p'éel nook ma' in ti'ali', teche' bíin a búuquint in nook.

³⁰Ba'ale' u ajawil Siriae', dzo'oquili' u ya'alic ti' u náacomilo'ob u bolanilo'ob u ba'atel ma' u ba'ateltico'ob mix máac wa ma' chéen u ajawil Israel.

³¹Le ca j ila'ab Josafat tumen u náacomilo'ob le bolano'obo', tu tucultajo'obe' u ajawil Israel, ca tu bakpachtajo'ob u ti'al u ba'atelto'ob. Josafat túune' awatnaj u ti'al u káatic áantaje', ca j áanta'ab tumen Yuumtzil. Kue' tu beetaj u tzelicuba'ob tu yicnal,

³²tumen le ca tu yilajo'ob ma' u ajawil Israele', tu p'atajo'ob u ch'a'apachtico'ob.

³³Ba'ale', jun túul aj ba'atele', tu julkabtaj u x p'úunche', chéen tu yóol iike', ca tu loobiltaj u ti'al j quíimil u ajawil Israel tu'ux cu núup'ul u chi'ob u nookil u ba'atel. Leti'e' tu ya'alaj ti' máax nu'ucbesic le bolano': Suutabae', ca a jóokesen ichil le ba'atela', tumen chaket loobilta'anilen.

³⁴Le ba'atelo', jach yajchaj ti' le kiinaco', u ajawil israele', j yanchaj u wa'atal tu bolan tu táan le j siriob tac tu yocbal kiino', ca j quíim táan u t'úubul kiin.