Read Yucateco 2 Crónicas 19 Bible Online

2 Crónicas 19 - Yucateco bible

2 Crónicas 19

¹Josafat u ajawil Israele', suunaj toj u yóol tu jalach naj tu caajil Jerusalén.

²Ba'ale' aj bóobat Jehú u paal Hananie', jóok u nuptáante' ca tu káat chi'itaj ti': ¿Ba'axten ca wáantic le kaakas máac u ti'al a bisicabáa tu yéetel u aj p'eeco'ob Yuumtzil? Yuumtzile' dzo'oc u kuuxtal ta wéetel tu yo'olal ba'ax ta beetaj.

³Chéen ba'ale' yaan ba'axo'ob utz a beetmaj, tumen ta kascuntaj u yoochelo'ob Asera ti' le múuch' caajo'obo', yéetel ta kubaj a wóol a caxant Ku.

⁴Josafate', cajnáal ca'ach Jerusalén, chéen ba'ale' suuc u máan u xíimbalt u caajal líikbal Beersebae' tac tu pu'uquilo'ob Efraín, u ti'al ca u beet u caxtico'ob Yuumtzil u Junab Ku u máanja'an ch'i'ibalo'ob.

⁵Cu dzo'ocole' tu dzaj xan aj ilaj tacpoolo'ob ti' tu jujun p'éelil u tuulum caajilo'ob Judá.

⁶Ca tu ya'alaj ti' le aj ilaj tacpoolo'obo': Ile'ex ma'alob ba'ax ca beetique'ex, tumen ma' tu kaaba' wíinico'ob bíin a beete'exi', ba'ale' tu kaaba' Yuumtzil, leti' máax bíin yanac ta wicnale'ex le quéen a wa'ale'ex ba'ax unaj u beeta'al.

⁷Bey túuno', tzique'ex Yuumtzil, canantaba'ex ti' ba'ax ca beetique'ex, tumen Yuumtzil c Kue', ma' tu kamic keechel p'is óolo'ob, mix tu yéeyic máax bíin u p'is óolte, mix tu kamic ma' u jaajil bo'olalo'ob.

⁸Josafate' tu dzaj xan Jerusalén dze'edzec j levitaob aj kiino'ob, u nuuquilo'ob u yotochnáalo'ob Israel u ti'al u beeto'ob u aj ilaj tacpoolilo'ob ti' u ba'aluba'ob ocsaj óolal yéetel ti' u ba'atelilo'ob u cajnáalilo'ob Jerusalén.

⁹Tu dzaj le tzol xiquino'ob ti'oba': Te'exe', unaj a meyaje'ex yéetel tziiquil ti' Yuumtzil, ocsaj óolal, yéetel tojil bej.

¹⁰Ti' je'el ba'alac ba'atelil ca taasa'ac ti' te'ex tumen a wéet lu'umile'ex u cajnáalilo'ob le jejeláas caajo'ob u ti'al a wilique'ex wa yaan jun túul j quíimsaj wíinic wa ma', wa quex u ti'al u dzo'ocbesa'al le jejeláas nup t'aano'obo', le tzolbe'en t'aano'obo', le tzol xiquino'ob yéetel ba'axo'ob u ya'almaj Yuumtzile', a'ale'ex ti'ob u ti'al ma' u beetico'ob ba'alo'ob kaas u taal ti' Yuumtzil, tu yo'olal ma' u kuuxtal ti' te'ex mix ti' leti'ob. Beete'ex beyo', tu yo'olal ma' u lúubul u si'ipilil ta wóokole'ex.

¹¹Amarías u nojoch aj kiino'obe', leti' bíin u beet u nojochil ti' u ba'aluba'ob ocsaj óol, yéetel Zebadías, u paal Ismael u nojochil u múuch' cajtalilo'ob u yotochnáalo'ob Judae', leti' bíin ilic u ba'aluba'ob le múuch' caajo'; le j levitaobo', leti' bíin áantique'ex. ¡Chokaba'ex j meyaj! ¡Yuumtzil bíin yanac tu yéetel le máax bíin beetic ba'ax ma'alob!.