Read Yucateco 2 Crónicas 2 Bible Online

2 Crónicas 2 - Yucateco bible

2 Crónicas 2

¹Salomone' tu ch'a'a óoltaj u beetic u kulnaj Yuumtzil, bey xan u jalach naj leti'.

²U ti'al le meyajo' tu jóokesaj sesenta mil aj bisaj cuucho'ob, ochenta mil j póol tuunicho'ob u ti'al j meyaj te j pu'uco'obo', yéetel tres mil seicientos aj ilaj meyajo'ob.

³Cu dzo'ocole' Salomone' tu túuchi'itaj a'albil ti' Hiram u ajawil Tiro: Beet tin wéetel le ba'ax ta beetaj tu yéetel David in taata le ca ta túuchi'itaj kuulche' ti', u ti'al u beetic u jalach naj u ti'al u yantale'.

⁴Ile, tene' bin in ca'aj in beet jun p'éel kulnaj u ti'al Yuumtzil in Ku, u ti'al in jun páaycunt ti', u ti'al u tóoca'al qui'iboc poom tu táan, u ti'al u dza'abal sáamsamal u tzoolil waajo'ob yéetel u ku'ubul tóocbil ba'alche'ob ja'atzcab kiin yéetel ocnaj kiin, bey xan tu kiinilo'ob sábado, tu kiinilo'ob u kiinbesa'al chichan uj yéetel tu kiinilo'ob u láak kiinbesajo'ob tu nojbe'enil Yuumtzil je'el bix suuquil u beeta'al Israel mantadz ma' xuulile'.

⁵Ba'ale' le kulnaj bíin in beeto' unaj nojoch, tumen c Junab Kue' asab nojoch ti' tuláacal u láak kuob.

⁶Ba'ale', ¿máax je'el u páajtal u beetic jun p'éel kulnaj u ti'al leti' wa mix u cóochil le ca'an balic u nojochilo'? ¿Yéetel máaxen teen u ti'al ca in beet jun p'éel kulnaj quex chéen u ti'al u tóoca'al poom tu nojbe'enil?

⁷Bey túuno' túuchi'it ti' teen jun túul máac nu'uca'an u beet u meyajilo'ob oro, plata, bronce yéetel fierro, chacjome'en nook, chac nook yéetel chacpuke'en nook. u yojel xan u póol u yoochel ba'alo'ob tu yo'olal u múul meyaj tu yéetel le aj ca'anbesajo'ob cu meyajo'ob ti' teen tu lu'umil Judá yéetel tu caajil Jerusalén máaxo'ob j t'a'ano'ob j meyaj tumen in taata Davido'.

⁸Túuchi'it xan ti' teen le che'ob yano'ob Líbano', u che'ilo'ob kuulche', cipres yéetel sándalo, tumen tene' in wojel a palitzilo'obe', u yojelo'ob u ch'aco'ob u che'ilo'ob Líbano. In palitzilo'ob bíin áantic a palitzilo'ob

⁹u ti'al ca u nu'ucbeso'ob ti' teen ya'abcach che'ob, tumen le kulnaj bíin in beeto', unaj sen nojoch yéetel sen qui'ichquelem.

¹⁰Ba'ale' bíin in dzáa u ti'al a j meyajo'ob, le j ch'ac si'ob bíin ch'aquic le che'obo', can p'éel millono'ob cuatrocientos u wuudzilo'ob trigo, can p'éel millono'ob cuatrocientos u wuudzilo'ob cebada yéetel cuatrocientos cuarenta mil litros vino yéetel cuatrocientos cuarenta mil litros aceite.

¹¹Hiram u ajawil Tiro túune' tu túuch'i'itaj jun p'éel dzíib ti' Salomón tu'ux cu ya'alic: Yuumtzile' tu dzáajech u ajawil j israelitaob tumen u yaacuntmaj u caajal.

¹²Tu ya'alaj xan Hiram: ¡Qui'iqui' t'antbil Yuumtzil u Ku Israel, tumen tu dzaj ti' ajaw David jun túul paal sen j na'anat máac, sen canbalnaja'an yéetel cu tuucul yéetel na'atil, bin u ca'aj u beet jun p'éel kulnaj ti' Yuumtzil yéetel jun p'éel jalach naj u ti'al leti'!

¹³Quin túuchi'itic ti' teech jun túul máac ma'alob canbalnaja'anil sen yaan u na'at: aj ca'anbesaj Hiram.

¹⁴U paal jun túul co'olel sijnal tu ch'i'ibalo'ob Dan tu síijsaj ti' jun túul u cajnáalil Tiro. Sen u yojel u meyajt oro, plata, bronce, fierro, tuunich, che', nook, chacjome'en nook, chacpuke'en nook, lino yéetel chac nook, yéetel u yojel u póol je'el ba'alac u jejeláasil oochelo'obe', u yojel u beet tuláacal u jejeláasil ba'alo'ob bíin a'ala'ac ti' ca u beet yéetel le máaxo'ob yano'ob ca'ach tu yicnal a taata David in dzuulilo', lelo' leti' máaxo'ob nu'uca'ano'ob u ti'al le meyajo'obo'.

¹⁵let o'olale' dzuul, túuchi'it ti' a palitzilo'ob le trigo, le cebada, le aceite yéetel le vino dzo'oc a wa'alic a dzáico'.

¹⁶Ca'aliquil to'one', c bin j Líbano' c ch'ac tuláacal le che'ob kabéet ti' techo', c bisic ti' teech ich ka'anab ti' cheemo'ob, tac tu caajil Jope. Cu dzo'ocole', teche' ca wilic bix a bisic tac Jerusalén.

¹⁷Cu dzo'ocole' Salomone' tu xocaj jay túul j táanxel lu'umilo'ob yaan tu lu'umil Israel, quex tumen yáax xoca'an tumen u David u taatae', ca j ila'ab yaan ciento cincuenta yéetel tres mil seicientos.

¹⁸Tu jóokesaj sesenta mil aj bisaj cuucho'ob ichilo'ob, ochenta mil j póol tuunicho'ob te j pu'uco' yéetel tres mil seicientos aj ilaj meyajo'ob u ti'al ca u beeto'ob u meyajo'ob le máaco'obo'.