Read Yucateco 2 Crónicas 20 Bible Online

2 Crónicas 20 - Yucateco bible

2 Crónicas 20

¹Cu dzo'ocol u máan dze'edzec kiine', le j moabitaob yéetel le j amonitaobo', tu ba'ateltajo'ob Josafat;

²j bin túun dze'edzec máaco'ob a'alic ti': ¡Líikbal Edom tu táanxel tzéelil le j quimen ka'anabo', táan u taal jun p'éel nojoch múuch' aj ba'atelo'ob u ba'atelte'ex! ¡Ti' yano'ob Hazesóon-tamar! (Hazesóon-tamare', leti' En-gandi.)

³Josafate', tu ch'a'aj sajaquile', ca tu káataj áantaj ti' Yuumtzil. Bey túuno' tu ka'aytaj su'ukin ti' tuláacal u lu'umil Judá,

⁴u cajnáalilo'ob Judae', tu much'ajuba'ob u káato'ob u yáantaj Yuumtzil. Ti' tuláacal u caajilo'ob Judá j taal máaco'ob.

⁵Josafate' j wa'alaj tu chúumuc u caajil Judá much'ucbal Jerusalén, actáan ti' u túumben bakpakil u táancabil u kulnaj Yuumtzil,

⁶ca tu ka'am a'alaj: Yuumtzil u Ku c máanja'an ch'i'ibalo'ob, ¡teech u Junab Kuil ca'an, teech méektáantic tuláacal múuch' caajo'ob! ¡Ta kab yaan muuk yéetel páajtalil: mix máac je'el u páajtal u ba'atel ta wéetele'!

⁷C Ku, teech tojolch'int tu táan a caajal Israel u cajnáalilo'ob le múuch' caajo'oba', ca ta dzaj u ti'al tuláacal ja'abo'ob ti' u ch'i'ibalo'ob Abraham, a wéet óol.

⁸Cu dzo'ocol u jéedzel u cajtalo'ob waye', tu beetajo'ob jun p'éel kulnaj ta kaaba'e', ca tu ya'alajo'ob:

⁹Wa bíin taalac jun p'éel loob u ti'al u jaadzil c si'ipil, je'el bix ba'atel, báan quíimil wa wi'ijile', bíin taalaco'on tu táan le kulnaja', tumen teche', ti' yanech te j kulnaja', to'one' bíin c káat ti' teech áantaj tu yo'olal yaj óol, teech xane', bíin a toco'on.

¹⁰Bejela'a' túune', way yaan le j amonitaob, yéetel le j moabitaob yéetel u cajnáalilo'ob u pu'uquil Seir, le cúuchilo'ob ma' ta wóoltaj ca ococ le j israelitaob tu lu'umo'ob tu kiinilo'ob le ca jóoko'on Egiptoe', ba'ale' máano'ob jun tzéelil, ma' ta wóoltaj ca xu'ulsaco'obi'.

¹¹Tu bo'olil lelo', bejela'e' táan u taalo'ob u ba'atelto'ono'ob u ti'al u toquic to'on le lu'um ta dzaj c ti'alinto'.

¹²C Ku, ¿Ma' wa bíin a ja'adzo'obi'? To'one', ma' chuca'an c muuk u ti'al c ba'ateltic le nojoch múuch' aj ba'atelo'ob cu taalo'ob u ba'atelto'ono'. ¡Ma' c ojel ba'ax unaj c beetiqui'; le t o'olal c sutic paacat ti' teech!

¹³Tuláacal u cajnáalilo'ob Judá wa'alacbalo'ob tu táan Yuumtzil, pa'ate' yéetel u yatano'ob bey xan u paalalo'ob tac u asab mejenilo'ob.

¹⁴Ca'aliquil wa'alacbal tuláacal le caaj much'ucbalo', Jahaziel, u paal Zaacarías u yáabil Benaía, u paal Jeiel u yáabil Matanías, jun túul j levita u ch'i'ibal Asafe', j ch'a'ab tumen u pixan Yuumtzile',

¹⁵ca tu ya'alaj: Ch'en xinquintene'ex u cajnáalile'ex Judá yéetel Jerusalén, bey xan teech, ajaw Josafat. Yuumtzile' cu ya'alic ti' te'ex: Ma' a sajactale'ex, mix a ch'a'ique'ex sajaquil ti' le nojoch múuch' aj ba'atelo'oba', tumen le ba'atela', ma' a ti'ale'exi', u ti'al Ku.

¹⁶Xeene'ex a ba'atelte'ex sáamal. Táan u na'acalo'ob tu níixil Sis, bíin a nactáante'exo'ob tu xuul le chan áalcab ja' yaan actáan ti' u x tocoy lu'umil Jeruel.

¹⁷Ma' te'ex bíin ba'ateltic le ba'atela'. Nu'ucbesaba'ex, ma' a péeque'ex, pa'ate'ex ca a wile'ex bix bíin u toque'ex Yuumtzil. ¡U cajnáalile'ex Jerusalén yéetel judá, ma' a sajactale'ex mix u ja'akal a wóole'ex; sáamale', nadzaba'ex a ba'atelte'exo'ob, tumen Yuumtzile' ti' yaan ta wéetele'exe'!

¹⁸Josafat túune', j xolaje', ca j noclaj lu'um, u cajnáalilo'ob Jerusalene', j chinlajo'ob tu táan Yuumtzil u ti'al u kultico'ob.

¹⁹Le j levitaob u ch'i'ibalo'ob Coat yéetel u ch'i'ibalo'ob Merario', cáaj u qui'iqui' t'antico'ob Yuumtzil u Ku Israel sen ka'am.

²⁰Cu sáastal tu láak kiine', j líiko'ob piknal, u ti'al u bino'ob tu x tocoy lu'umil Tecoa. Tu súutuquil u jóokbalo'obe', Josafate', j wa'alaj u ya'al ti'ob: U'uyene'exi' u cajnáalile'ex Jerusalén yéetel tuláacal Judá: Ocsaj óolte'ex Yuumtzil, a Kuexe', ca p'áatac jedzecnac a wanile'ex; oques a wóole'ex ti' le aj bóobato'ob beyo' bíin xi'ic te'ex utzil ti' tuláacal.

²¹Cu dzo'ocol u t'aan tu yéetel le caajo', tu túuchi'itaj dze'edzec aj kaayo'ob ca u búucbesuba'ob tu yéetel quili'ich nooko'ob u ti'al ca xi'ico'ob tu táan u múuch'ulo'ob le aj ba'atelo'ob ca'aliquil táan u qui'iqui' t'antico'ob Yuumtzil tu yéetel le kaaya': Dza'abac nib óolal ti' Yuumtzil tumen u yaabilaje', u ti'al tuláacal ja'abo'ob.

²²Tu súutuquil cáajic u ka'ayal u kaayilo'ob qui'iqui' t'aane', Yuumtzile' tu beetaj u lúubul jun p'éel satal óolal tu yóokol le j amonitaobo', le j moabitaobo' yéetel u cajnáanlilo'ob u pu'uquilo'ob Seir cu taalo'ob u ba'atelto'ob Judao', ca j pa'ab u muuko'ob.

²³Le j moabitaob tu yéetel le j amonitaobo', tu ba'atelto'ob u cajnáalilo'ob u pu'uquilo'ob Seiro', ca tu jach xu'ulsajo'ob, cu dzo'ocole' tu quíimsajuba'ob tu baatzilo'ob.

²⁴Le ca j kuch u xiibilo'ob Judá tu cúuchil tu'ux chica'an u yila'al le x tocoy lu'umo', chéen quimeno'ob jayacbalo'ob j lu'um tu yilajo'ob. ¡mix máac páatchaj u púudzul!

²⁵J bino'ob túun Josafat yéetel u aj ba'atelo'ob u molo'ob ba'ax tu p'ataj le aj p'eeco'obo', ca tu ch'a'ajo'ob ya'abcach wacaxo'ob, u nu'uculo'ob ba'atel, búuco'ob yéetel ba'alo'ob co'oj u tojol, ca tu láaj ch'a'ajo'ob ba'axo'ob yani'. yaan ya'abcach ba'alo'ob ma' tu páajtal u bisico'ob. Sen ya'ab le ba'alo'obo', let o'olal tu bisaj óox p'éel kiin u molico'ob.

²⁶Tu can p'éel kiine', tu much'ajuba'ob tu táax kóomil Beraca, tumen te'elo' tu qui'iqui' t'antajo'ob u kaaba' Yuumtzil. Le t o'olal tu dzajo'ob u kaaba'int Beraca, lelo' bey u kaaba' tac bejela'o'.

²⁷Cu dzo'ocole' tuláacal u j xiibilo'ob Judá yéetel Jerusalén yáanal u nu'ucbes bej Josafate', j suunajo'ob Jerusalén sen qui'ima'ac u yóolo'ob, tumen j to'oco'ob tu kab u aj p'eeco'ob tumen Yuumtzil.

²⁸Le ca j kucho'ob Jerusalene', j bino'ob tu kulnaj Yuumtzil yéetel u paaxil cítaraob yéetel trompetaob.

²⁹Le ca j ojéelta'ab j ba'atelta'ab u aj p'eeco'ob Israel tumen Yuumtzile', tuláacal le j múuch' caajo'obo' tu ch'a'ajo'ob sajaquil ti' Ku.

³⁰Beyo' u ajawil Josafate', j yanchaj ich jéedzel, tumen j dzaab jéedzel ti' tumen Junab Ku tu yéetel tuláacal máaxo'ob cajnáalo'ob tu tzéel.

³¹Josafate' ajawnaj tu yóokol Judá. Yaan ca'ach treinta yéetel cinco ja'abo'ob ti' ca tu chu'unbesaj u ajawil, méektáanaj veinticinco ja'abo'ob Jerusalén. U maamae' tu kaaba'inta x Azuba, u x ch'upul paal ca'ach Sulhi.

³²Josafate' toj xíimbalnajic tu beel Ku Je'el bix Asa u taatae'. Toj xíimbalnajic tu táan Yuumtzil.

³³Chéen ba'ale', ma' lukesa'ab le manba'al kulnajo'obo', tumen le caajo' ma'ili' u qui' jedzmaj u tuuculo'ob ti' u Ku u máanja'an ch'i'ibalo'obi'.

³⁴U dzooc u tzicbalil u cuxtal Josafat líikbal u cáajal tac u dzo'ocbale', ti' dzíibta'ab tu dzíibilo'ob u cuxtal Jehú u paal Hanani, dzíibta'an xan tu ju'unilo'ob u cuxtal u ajawilo'ob Israel.

³⁵Cu máan kiine', Josafat, u ajawil Judae', tu nupajubáa tu yéetel Ocozías, u ajawil Israel, leti'e', sen kaas ca'ach u cuxtal.

³⁶Tu nupajubáa tu yéetel u ti'al u beeto'ob cheemo'ob u ti'al u túuchi'ito'ob Tarsis, tu beetajo'ob tu lu'umil Ezión-gerber.

³⁷Eliezer cu taal caajil Maresa, u paal Dodava túune', tu ka'aytaj ti' Josafat le péectzila': Yuumtzile' bíin u xe'exe'et' le ba'ax dzo'oc a beetico', tumen ta nupajabáa tu yéetel Ocozías. Bey úuchico', le cheemo'obo', xe'exe'et'pajo'ob, ma' páatchaj u bino'ob Tarsisi'.