Read Yucateco 2 Crónicas 21 Bible Online

2 Crónicas 21 - Yucateco bible

2 Crónicas 21

¹J quíim Josafate', ca j mu'uc tu Caajil David u Máanja'an chi'ibal. Cu dzo'ocole' j culaj Joram u paal tu jalach káanche'.

²U yíidzino'ob Joram u paalal Josafate', tu kaaba'intajo'ob xan: Azarías, Jehiel, Zacarías, Micael yéetel Sefatías. Tuláacal lelo'oba' u paalal ca'ach Josafat u ajawil Judá.

³J siib ca'ach ti'ob tumen u taataob ya'abcach ba'alo'ob oro u ca'ajo'ob yéetel plata u caajo'ob, bey xan ba'alo'ob co'oj u tojol. Tu dzaj xan ti'ob tuulumil caajo'ob tu lu'umil Judá, ba'ale' le ajawilo' tu dzaj ti' Joram tumen leti' u j yáax paal.

⁴Chéen ba'ale', p'elac jéedzic Joram tu jalach káanche' u taatae', tu láaj quíimsaj u yíidzino'ob tu yej máascab, bey xan dze'edzec u nuuquilo'ob Israel.

⁵Yaan treinta yéetel ca'a p'éel ja'ab ti' ca j chu'unpaj u ajawil, ajawnaj ocho ja'abo'ob Jerusalén.

⁶Ba'ale', tu beetaj ba'axo'ob j beeta'ab tumen u ajawilo'ob Israel yéetel u ch'i'ibalo'ob Acab, tumen u yatane' ti' u taal tu ch'i'ibal Acabe'; le t o'olale', kaas lúubic tu yich Yuumtzil ba'axo'ob tu beetaj.

⁷Ba'ale' Yuumtzile', ma' tu yóoltaj u xu'uls u ch'i'ibal Davidi', tumen u beetmaj jun p'éel nup t'aan tu yéetel David tu'ux tu séeb chi'itaj ti' leti' yéetel ti' u paalal tuláacal ja'abo'ob bíin yanac t'aba'an jun p'éel u sáaso'ob.

⁸Tu kiinilo'ob u ajawil Jorame', Edome', j líik óolchaj ti' u t'onquina'anil tumen Judae', ca tu culquintaj u ajawil.

⁹Joram túune', j bin tu tojilo'ob tu yéetel tuláacal u náacomo'ob pa'ate' yéetel tuláacal u bolanilo'ob u ba'atele', ca j líiko'ob leti' yéetel tuláacal u náacomo'ob yéetel u bolanilo'ob u ba'atele', ca tu ba'ateltajo'ob le j edomitaob bakpachmailo'obo'.

¹⁰Ba'ale', Edome' tu yilaj bix u jáanpayticubáa ti' Judá je'el bix tac tu kiinil bejela'a'. Ti' le kiino', tu jáanpaytajubáa xan Libna, tumen Jorame' tu p'ataj u beel Yuumtzil u Ku u máanja'an ch'i'ibalo'ob.

¹¹Cu dzo'ocole' tu beetaj xan manba'al kulnajo'ob tu pu'uquilo'ob Judae', ca tu beetaj u náachtal ti' Yuumtzil u cajnáalilo'ob Jerusalén, tu beetaj u sa'atal u beel Junab Ku ti' u múuch' caajilo'ob Judá.

¹²Joram túune' tu kamaj jun p'éel ju'un dzíibta'ab ti' tumen aj bóobat Elías, tu'ux cu ya'alic: Yuumtzil u Ku David a máanja'an ch'i'ibale', cu ya'alic: Ma' cuxlajech je'el bix Josafat a taatae', mix je'el bix cuxlajic Asa u ajaw Judae',

¹³teche' ta beetaj ba'ax tu beetaj u ajawilo'ob Israel, dzo'oc a beetic u p'a'atal u beel Yuumtzil tumen Judá yéetel u cajnáalilo'ob Jerusalén je'el bix tu beetajilo'ob u yotochnáalo'ob Acabe'. Yéetel u láak ba'ale' dzo'oc a quíimsic a wíidzino'ob asab ma'alobtaco'ob ti' teech.

¹⁴Le t o'olale', Yuumtzile' bin u ca'aj u beet u lúubul ta wóokol, tu yóokol a paalal, tu yóokol a watano'ob yéetel tuláacal ba'axo'ob a ti'al jun p'éel noj yajil.

¹⁵Bíin u beet u lúubul ya'abcach koja'anilo'ob ta wóokol. Bíin koja'anchajquech ti' a jobnel ti' jun p'éel koja'anil mina'an dzaac u ti'al tac u beetic u jóokol a choochelo'ob.

¹⁶Yuumtzil túune' tu beetaj u p'u'ujul ti' Joram le j filisteob yéetel le j arabeob cajnáalo'ob tu tzéel u lu'umil Cuso';

¹⁷ca tu tojtáantajo'ob Judae', ca j ooco'ob te j lu'umo', ca tu ch'a'ajo'ob tuláacal le ayikalilo'ob yaan tu jalach naj le ajawo', j ch'a'ab xan u paalal yéetel u yatano'ob. Chéen Joacaz u chichanil u paal j p'áat tu yicnal.

¹⁸Cu dzo'ocol lelo', ja'adz tumen Yuumtzil tu yéetel jun p'éel koja'anil tu jobnel mina'an dzaac u ti'al.

¹⁹J máan kiino'ob, tu ca'a p'éel ja'abo'obe', jóokla'aj u choochelo'ob tu yo'olal le koja'anilo', j quíim ich yaj kina'amilo'ob. U caajale', ma' j ka'aj u t'abic jun p'éel káak u ti'al u ka'ajsajil je'el bix beeta'abic ti' u máanaja'an ch'i'ibalo'obe'.

²⁰Yaan treinta yéetel ca'a p'éel ja'abo'ob ti' ca j chu'unpaj u ajawil, ajawnaj ocho ja'abo'ob Jerusalén. Mix máac yaj óolt u quíimil. J mu'uc tu Caajil David, ba'ale' ma' tu jalach mucnali'.