Read Yucateco 2 Crónicas 23 Bible Online

2 Crónicas 23 - Yucateco bible

2 Crónicas 23

¹Ti' u siete ja'abe' Joiadae', tu túuchi'itaj t'anbil le siete náacomo'oba': Azarías u paal Jeroham, Azarías u paal Obed, Maasías u paal Adaía, yéetel Elisafat u paal Zicrie, ca tu beetaj u nupicuba'ob tu yéetel.

²Leti'obe' tu láaj xíimbaltajo'ob Judae', ca tu much'quintajo'ob tuláacal u j levitailo'ob u caajilo'ob Judá yéetel u nuuquilo'ob u láaktzililo'ob Israele', ca láaj bino'ob Jerusalén.

³Te'elo' tuláacal le tu much'ajuba'obo', tu beetajo'ob jun p'éel nup t'aan tu yéetel le ajaw tu kulnaj Kue'. Joiadae' tu ya'alaj ti'ob: ¡Je'el yaan ta wicnale'ex u paal le ajawo'! Leti' unaj u beeticubáa u ajawil, je'el bix tu séeb chi'itaj Yuumtzil ti' u ch'i'ibal ajaw David.

⁴Je'el ba'ax bíin a beete'exa': ti' le óox jaatz aj kiino'ob yéetel j levitaobo', le jun jaatz ti' te'ex aj kiino'ob tu yéetel le j levitaob cu meyajo'ob sábadoo', bíin a canante'ex u jool le kulnajo;

⁵u láak jun jaatze', cu yáanta'alo'ob jalach naj; u dzooc jun jaatze', tu jool le chuun pako'obo'. Ca'aliquil tuláacal le caajo', bíin yanaco'ob ichil u sujuy lu'umilo'ob le kulnajo'.

⁶Ba'ale', mix máac bíin ococ ich kulnaj wa ma' chéen le aj kiino'ob yéetel le j levitaob cu meyajo'obo'. Chéen leti'ob je'el u páajtal u yocolo'obe', tumen jun páaycuntano'ob; ba'ale' u chuucáan le caajo', bíin cananaco'ob u ti'al u tzicbe'enil Yuumtzil.

⁷Le j levitaobo', bíin yanaco'ob tu bakpach le ajawo', tu jujun túulile', u machmaj u nu'ucu'ul u ba'atel, le máax bíin u yóolt ocol ichil le kulnajo' bíin quíimic. Bíin láakinta'ac le ajaw je'el tu'ux ca xi'ique'.

⁸Le j levitaob yéetel u cajnáalilo'ob Judao', tu beetajo'ob tuláacal ba'ax a'ala'ab ti'ob tumen aj kiin Joiada. Tu jujun túulile', tu nu'ucbesajo'ob u múuch'ul le j xiibo'ob j dzaab tu yáanal u kabe', je'el bix le cu yocolo'ob u beeto'ob u aj cananilo'ob tu kiinil sábadoo', bey xan le cu jóokolo'obo', tumen aj kiin Joiadae', ma' tu cha'aj u bin le dzoca'an u meyajo'obo'.

⁹Joiada túune' tu kubaj ti' le náacomo'ob le lóomte'ob, yéetel le jejeláas chimalo'ob u ti'alo'ob ca'ach le ajaw David yano'ob tu kulnaj Kuo'.

¹⁰Cu dzo'ocole' tu tzolaj ti' tuláacal u jool najilo'ob tuláacal le máaco'obo', líikbal tu x no'ojile' tac tu x dzíiquil le kulnajo', bey xan tu bakpach, tu jujun túulil u machmaj u lóomte' u ti'al u canantic le ajawo'.

¹¹Joiada túun tu yéetel u paalalo'obe', tu jóokeso'ob u paal ajawe', ca tu dzajo'ob u péet jo'ol yéetel u chíiculalo'ob u le jalach najo', cu dzo'ocol u wequico'ob aceite tu yóokole' tu ka'aytajo'obe' leti' ajaw. Cu dzo'ocole' tu ka'amcach awtajo'ob: ¡Xi'ic utzil ti' le ajawo'!

¹²Le ca tu yu'ubaj x Atalía u ka'amcach t'aan le máaco'ob cu yáalcabo'ob cu ka'aytico'ob le ajawo', j bin tu kulnaj Yuumtzil le tu'ux yano'ob tuláacalo'obo'.

¹³Tu yilaj wa'alacbal le ajaw tu chuun u yocomtuun te tu'ux cu yúuchul ocolo'. Tu tzéele' ti' yaan ca'ach u nuuquilo'ob le caajo', bey xan u múuch'il le aj paaxo'obo', le caajo' sen qui'imac u yóol ca'ach táan u jóopsico'ob paaxo'ob; le aj kaayo'obo', u ch'a'amajo'ob u nu'ucul u paaxo'obe', táan ca'ach u nu'ucbesico'ob u ka'ayal u kaayil qui'iqui' t'aano'ob. Atalía túune' tu jataj u nooko'obe' ca tu yaawtaj: ¡Chéen tuus, chéen tuus!

¹⁴Ba'ale' Joiadae', tu beetaj u jóokol le náacomo'ob nu'ucbesic le aj ba'atelo'obo', ca tu ya'alaj ti'ob: ¡Jóokese'ex ichil u tzoolol le máaco'oba', quíimse'ex le máaxo'ob bíin tzaypachtique'! Bey tumen le aj kiin tu ya'alaj ma' u quíimsa'al ichil u kulnaj Yuumtzilo',

¹⁵j ma'ache', ca jóokesa'ab tu jool najil le tzíimino'obo' tac te jalach najo', ca j quíimsa'abi'.

¹⁶Cu dzo'ocole', Joiadae' tu beetaj jun p'éel nup t'aan tu yéetel le caaj je'el bix tu yéetel le ajawo', u ti'al ca u beetuba'ob u caajal Yuumtzil.

¹⁷Cu dzo'ocole', j láaj bino'ob tu kulnaj Baale', ca tu jeno'ob, tu pa'ajo'ob u multuunilo'ob kultaj yéetel u beetbil kuob. Matán u aj kiin Baale', xo'ot u yúul tu táan u multuunilo'ob le kultajo'.

¹⁸Cu dzo'ocole' Joiadae', tu dzáa jun múuch' aj canano'ob tu kulnaj Yuumtzil, tu yáanal u nu'ucbesaj aj kiino'ob yéetel j levitaob, le máaxo'ob t'oxláanta'ab u kiinil u Meyajo'ob tumen David u ti'al u meyajto'ob Yuumtzil tu kulnaj u ti'al u kubico'ob tóocbil ba'alche'ob, je'el bix a'ala'anil tu nup t'aan Moisese', yéetel u ti'al ca kaaynaco'ob tu yéetel qui'imac óolal je'el bix u ya'almajil Davido'.

¹⁹Tu dzaj xan aj canan jool najo'ob tu jool najilo'ob u kulnaj Yuumtzil, tu yo'olal ma' u yantal tu'ux u yocol mix máac ti' le ma' utz yanilo'obo'.

²⁰Cu dzo'ocole', tu ch'a'aj le náacomo'obo', u nuuquilo'ob le caajo', u méektáanilo'ob le caaj yéetel tuláacal le caajo', ca tu láakintajo'ob le ajawo' líikbal tu kulnaj Yuumtzilo', tac te j jalach najo' ca j ooco'ob tu noj jool najil. Cu dzo'ocole', j culquinta'ab le ajawo' tu jalach káanche',

²¹ca j qui'imacchaj u yóol tuláacal le caajo'. Bey tumen quíimsa'ab x Atalía tu yej máascabo', le caajo', j p'áat jedzecnac.