Read Yucateco 2 Crónicas 24 Bible Online

2 Crónicas 24 - Yucateco bible

2 Crónicas 24

¹Joase', yaan ca'ach siete ja'abo'ob ti' ca chu'unpaj u ajawil, tu méektáanta Jerusalén cuarenta ja'abo'ob. U maamae' tu kaaba'inta Sibia, cajnáal ca'ach Beerseba.

²Joase', toj úuchic u cuxtal tu yich Yuumtzil ca'aliquil cuxa'an aj kiin Joiada.

³Dzo'ocsa'ab u beel tumen Joiada yéetel ca'a túul atantzilo'ob, ca j yanchaj u j xibil paalalo'ob yéetel u x ch'upul paalalo'ob ti'ob.

⁴Cu máan kiine', Joase', jo'op' u yutzquintic u kulnaj Yuumtzil,

⁵u ti'al u beetic lelo', tu much'quintaj le aj kiino'ob tu yéetel le j levitaobo', ca tu ya'alaj ti'ob: Xeene'ex tu caajilo'ob Judae', ca a káate'ex taakin ti' tuláacal le j israelitaobo', u ti'al a wutzquintique'ex u kulnaj Ku ja'ab man ja'ab. Séebcunte'ex a beetque'ex le ba'ala'. Ba'ale' le j levitaobo' ma' tu séebcuntajo'obi'.

⁶Le ajaw túuno' tu t'anaj Joiada u nojoch le aj kiino'obo' ca tu ya'alaj ti': ¿Ba'axten ma' ta táan óoltic, a beetic u taasa'al Judá yéetel Jerusalén le patan u ya'almaj Moisés u palitzil Yuumtzil ca dza'abac u ti'al u noj Paselil le nup t'aano'?

⁷X Atalíae', tu yo'olal u bakeltmaj le kasa'anilo', j ooc yéetel u j t'u'ulpacho'ob tu kulnaj Junab Kue', ca tu ch'a'ajo'ob u ti'al u kultajil u beetbil kuob tuláacal u nu'uculo'ob u kulnaj Yuumtzil.

⁸Le ajaw túuno' tu túuchi'itaj beetbil jun p'éel ba'asche'e', ca tu beetaj u dza'abal tu tzéel u jool najil u kulnaj Yuumtzil, tu tzéel u táancabil.

⁹Cu dzo'ocole' ca j ka'ayta'ab ti' tuláacal Judá yéetel ti' Jerusalén kabéet u bisa'al ti' Yuumtzil le páatan tu túuchi'itaj Moisés u palitzil Yuumtzil líikbal x tocoy lu'um ca dza'abaco'.

¹⁰Tuláacal u nuuquilo'ob le caaj yéetel le caajo', j bino'ob tu yéetel qui'imac óol u kubo'ob u páatano'ob te j ba'asche' tac u chupico'obo'.

¹¹Le j levitaobo', cu bisico'ob ca'ach ti' le ajaw le ba'asche' u ti'al u xakal ilic; le quéen u yilo'ob dzo'oc u ya'abtal le taakino', cu bino'ob ca'ach u aj dzíib tu yotoch le ajawo', bey xan le u nojchil le aj canano'ob dza'an tumen u j nojoch le aj kiino'obo', cu láalico'ob u taakiinil le ba'asche'o', cu dzo'ocole', cu yedzcuntico'ob tu ca'a téen tu cúuchil. Bey u beetico'ob sáamsamalo', bey túuno', cu molico'ob ya'abcach taakin.

¹²Le ajaw tu yéetel Joiadae', cu kubico'ob ca'ach le taakin ti' le máaxo'ob ilic u beeta'al u meyajilo'ob le kulnajo', u ti'al ca u caxto'ob j póol tuunicho'ob yéetel j póol che'ob u ti'al u yuzquinta'al u kulnaj Yuumtzil. Unaj xan u caxtico'ob máaxo'ob meyajtic fierro yéetel bronce u ti'al u yutzquinta'al le kulnajo'.

¹³U j mayolilo'ob le meyajo', tu dzajuba'ob j meyaj, ca j bin utzil u meeyjulo'ob le utzquinaj cu nu'ucbesico'obo', ca j uztquinta'ab u kulnaj Ku je'el bix yáax beeta'anilo', ca tu p'atajo'ob ma'alobil.

¹⁴Le ca j dzo'oc u beetico'ob le meyajo', tu bisajo'ob ti' le ajaw yéetel ti' Joiada le taakin tu yalabtajo', leti'obe' tu túuxtajo'ob beetbil tu yéetel le taakino', u nu'uculo'ob u kulnaj Yuumtzil, je'el bixo'ob le cu meyajo'ob u ti'al u yúuchul kultajo', bey xan u ti'al tóocbil ba'alche'ob, u x jo'opobo'ob, yéetel u láak nu'uculo'ob oro yéetel plata u ca'ajo'obo'. Ca'aliquil cuxa'an Joiadae', mantadz j ku'ub tóocbil ba'alche'ob tu kulnaj Yuumtzil.

¹⁵Ba'ale' Joiadae', j nuxibchaji, sen ya'abchaj u ja'abile', ca j quíimi. Yaan ciento treinta ja'abo'ob ti' ca j quíimi;

¹⁶ca j mu'uc tu caajil David tu'ux cu mu'ucul le ajawo'obo' tumen ma'alob tu bisajubáil tu yéetel Israel, tu yéetel Ku bey xan tu yéetel u kulnaj.

¹⁷Cu dzo'ocol u quíimil Joiadae', j kucho'ob u nuuquilo'ob Judae', ca tu dzajo'ob tziiquilo'ob ti' le ajawo'. Leti'e' tu cha'aj u tzol xiquinta'al tumeno'ob.

¹⁸leti'obe' tu xúump'attajo'ob u kulnaj Yuumtzil u Ku u máanja'an ch'i'ibalo'obe', ca tu kultajo'ob u yoochelo'ob Asera yéetel u láak beetbil kuob. Tu yo'olal le kebana', Yuumtzile' j p'u'uj ti' Judá yéetel ti' Jerusalén.

¹⁹Chéen ba'ale' Yuumtzile' tu túuchi'itaj aj bóobato'ob u ti'al sutic u tuuculo'ob ti' Yuumtzil. Ba'ale' le caajo', ma' tu táan óoltaj u ya'almaj xiquin le aj bóobato'obo'.

²⁰U pixan Kue' j ch'íic túun tu tuucul Zacarías, u paal aj kiin Joiadae', ca wa'alaj ti' jun p'éel ca'anal cúuchile', ca tu ya'alaj ti' le caajo': Kue' cu ya'alic: ¿Ba'axten ma' ta dzo'ocbesique'ex in nu'ucbe'en t'aano'ob? ¿Ba'axten ca caxtique'ex u taal loob ta wóokole'ex? ¡Bey tumen dzo'oc a xúump'attiquene'exo', tene' bíin xan in xúump'atte'ex!

²¹Ba'ale' leti'obe' tu p'éelili'icuntaj u tuuculo'obe', ca tu quíimsajo'ob tu yéetel ch'iin ichil u bakpakil u kulnaj Yuumtzil je'el bix tu túuchi'itajil le ajawo'.

²²Le ajaw Joase' tu tu'ubsaj le chuca'an óolal j e'esa'ab ti' tumen Joiada u taata Zacaríaso', ca tu quíimsaj Zacarías, u paal, leti'e' ca'aliquil táan u quíimile' tu ka'am a'alaj: ¡Yuumtzil ca u yila'a ba'ax cu yúuchul u ti'al ca u beet p'is óolal!

²³U ti'al yáax kiine', u múuch' aj ba'atelo'ob le j siriobo', j bino'ob u ba'atelto'ob Joás, cu dzo'ocol u pulicuba'ob tu yóokol Judá yéetel tu yóokol Jerusalén, tu láaj quíimsajo'ob u nuuquilo'ob le múuch' caajo'obo', tu jóokesajo'ob ba'axo'ob yane', ca tu túuxtaj ti' u ajawil Damasco.

²⁴Chéen ca'ach jun p'éel chan múuch' le aj ba'atelo'ob j siriob j kucho'obo', ba'ale' Yuumtzile' tu kubaj jun p'éel nojoch múuch' aj ba'atelo'ob tu kabo'ob, tumen tu p'atajo'ob Yuumtzil u Ku u máanja'an ch'i'ibalo'ob. Beyo' Joase' tu kamaj le jaadz cu najmatico'.

²⁵Le ca j bin le j siriobo', tu p'atajo'ob chaket koja'an, u aj meyajo'obe', tu kax t'antajo'ob u quíimsico'ob u ti'al u sutico'ob u jeel úuchic u quíimsic u paal aj kiin Joiadae', ca tu quíimsajo'ob tu kaan. Cu dzo'ocole' tu mucajo'ob tu Caajil David, ba'ale' ma' tu mucajo'ob tu jalach cúuchil mucnalo'obi'.

²⁶Le máaxo'ob kax t'ant u quíimsa'alo', leti' lelo'oba': Zabad, u paal Simeat, jun túul j amonita yéetel Jozaba u paal Simrit, jun túul j moabita.

²⁷U tzicbalil u paalal Joás, yéetel le ya'abcach péectzilo'ob tu yóokol, le úuchic u ya'abcuntic u bo'olil páatan, je'el bix xan úuchic u yutzquintic u kulnaj Kue', láaj dzíibta'an tu dzíibilo'ob u tzicbalil le ajawo'obo'. Cu dzo'ocole', ajawnaj Amasías u paal tu jalach káanche'.