Read Yucateco 2 Crónicas 25 Bible Online

2 Crónicas 25 - Yucateco bible

2 Crónicas 25

¹Amasíase' yaan veinticinco ja'abo'ob ti' ca tu cáasaj u ajawil, méektáana Jerusalén veintinueve ja'abo'ob. U maamae' tu kaaba'inta x Joadán, x jerusalenil.

²Cuxlaj toj tu táan Yuumtzil, ba'ale', ma' tu kubajubáa tu jaajil u yóoli'.

³Le ca j dzo'oc u cutal ma'alob Amasías tu jalach káanche'e', tu quíimsaj tuláacal le máaxo'ob quíims u taatae'.

⁴Ba'ale', ma' tu quíimsaj u paalalo'obi', tumen tu dzíibil u ya'almaj t'aan Moisese', Yuumtzile', tu ya'alaj: Le taataobo', ma' bíin xotkiinta'aco'ob tu yo'olal ba'ax bíin u beet u paalalo'obi', mix le paalalo'ob tu yo'olal ba'ax u beetmaj u taataobo', ba'ale' tu jujun túulil bíin quíimic tu yo'olal u keban.

⁵Amasíase', tu much'quintaj tuláacal u xiibilo'ob Judá yéetel Benjamine', ca tu nu'ucbesajo'ob u láaktzililo'ob tu yáanal u nu'ucbe'en u náacomo'ob le aj ba'atelo'obo'. Cu dzo'ocole' tu xocaj tuláacal le maanal veinte u ja'abilo'ob, ca kuch trecientos mil u xooquil le aj ba'atelo'ob yéeya'ano'ob, u nu'ucbesmajuba'ob u ti'al ba'atel cu páajtal u bisico'ob lóomte'ob yéetel chimalo'ob.

⁶Tu bo'otaj xan yéetel tres mil trecientos kilos plata, u ti'al ca áanta'ac tumen cien mil u aj ba'atelilo'ob Israel.

⁷Ba'ale', j kuch jun túul u aj meeyjul Ku tu táane', ca tu ya'alaj ti': Ajaw, ma' a much'quintic ta wicnal u aj ba'atelo'ob Israel, tumen Yuumtzile', mina'an tu yéetel Israel, mix yéetel cajnáalilo'ob Efraín.

⁸Ba'ale' wa teech ca ya'abcuntic aj ba'atelo'ob tu yéetelo'ob u ti'al a bin j ba'atele', Kue' bíin u beet a lúubul tu táan a aj p'eec, tumen Kue', yaan u páajtalil u ti'al u yáantaj yéetel u ti'al pa'a' muuk.

⁹Amasíase', tu káat chi'itaj ti' u aj meeyjul Ku: Chéen ba'ale', ¿ba'ax bíin úuchuc tu yéetel le tres mil trecientos kilos plata tin dzaj ti' u aj ba'atelo'ob Israelo'? U aj meeyjul Kue', tu núucaj ti': Kue', sen ya'ab plata yaan ti', u ti'al u dzáa ti' teech u asab ya'abil ti' lelo'.

¹⁰Amasías túune', tu beetaj u lukul u aj ba'atelo'ob Efraín ichil u aj ba'atelo'obe', ca tu ya'alaj ti'ob ca j suunaco'ob tu yotocho'ob. Ba'ale' leti'obe' j p'u'ujo'ob ti' Judae', ca j suunajo'ob tu yotocho'ob sen kuuxtaco'ob.

¹¹Tu xiixib máaccuntajubáa Amasíase', ca tu bisaj u aj ba'atelo'ob tu Táax kóomil Ta'ab, ca tu quíimsaj diez mil u j xiibilo'ob Seir.

¹²Cu dzo'ocole' u aj ba'atelo'ob Judae' tu machajo'ob cuxa'ano'ob u láak Diez mile', ca tu bisajo'ob tu p'iich le witziltuuno', ca tu léench'intajo'obe, ca j xe'exe'et'pajo'ob.

¹³Ba'ale' le aj ba'atelo'ob ma' óolta'ab j bisa'al tumen Amasías te j ba'atel tumen tu beetaj u suuto'ob tu yotocho'obo', j ooco'ob Judá líikbal Samaria tac Bet-horone', ca tu quíimsajo'ob tres mil máaco'obe', ca tu bisajo'ob ya'abcach ba'alo'ob tu yocoltajo'ob.

¹⁴Le ca j suunaj Amasías dzo'oc u pa'ic u muuk Edome', tu taasaj tu yéetel u kuilo'ob Seire', ca tu ch'a'aj u kuinto'ob, tu kultajo'ob yéetel tu tóocaj poom ti'ob.

¹⁵Yuumtzile', j p'u'uj tu yéetel Amasíase', ca tu túuxtaj jun túul aj bóobat u ti'al a'alic ti': ¿Ba'ax teen ca bin tu paach u beetbil kuob jun p'éel múuch' caaj ma' j páatchaj u toquico'ob u múuch' caajo'ob ta kabi'?

¹⁶Ba'ale' ca'aliquil táan u ya'alic bey le aj bóobato', le ajawo' tu núucaj ti': ¿Dzo'oc wa c dzáiquech u ti'al a beeticabáa u aj tzoolxiquinil jalach naj? ¡P'at a wocsicabáa ichil in ba'aluba'ob! ¿A káat wa ca quíimsaquech? Le aj bóobato', ma' tu pechajubai, ba'ale' tu ya'alaj: Tene', in wojel dzo'oc u tucultic Ku u xu'ulsiquech úuchic a beetic le ba'ala', tumen ma' ta dzo'ocbesaj in tzoolxiquini'.

¹⁷Ba'ale' Amasíase' tu dzo'ocbesaj u tzol xiquin yaanal máaco'ob, tu túuxtaj a'albil ti' Joás u paal Joacaz u yáabil Jehú u ajawil Israel: Co'oten u ti'al ca c paclan c pact c ich.

¹⁸Ba'ale' Joase' tu túuxtaj le núuc t'aan ti'a': Le j mulo', tu túuxtaj a'albil ti' u kuulche'il le Líbano': Dzáa a x ch'upul paal ti' in j xiibil paal u ti'al u yatante. Ba'ale', j máan jun túul dzíidzic ba'alche'e' ca tu xanabcha'ataj le j múulo'.

¹⁹Teche', ca wa'alic dzo'oc a pa'ic u muuk le j edomitaobo', let o'olal cu ca'analchajal a wich u ti'al a caxtic u láak tziiquilo'ob. Ba'ale' asab ma'alob ca p'áataquech ta wotoch. ¿Ba'ax teen a káat a beet u taal loob ta wóokol yéetel tu yóokol Judá?

²⁰Ba'ale' Amasíase', ma' tu dzaj óoltaji', Tumen Kue', dzo'oc u tucultic u kubic tu kab Joás, tumen j bino'ob tu paach u kuilo'ob Edom.

²¹Amasías túune', j bin u nuptáant Joás u ti'al j ba'atel tu yéetel, Bet-semes, le yaan tu lu'umilo'ob Judao'.

²²Judae', j pa'ab u muuk tumen Israele', ca j bino'ob tu jujun túulilo'ob tu yotocho'ob.

²³Joás u ajawil Israele', tu machaj cuxa'an Amasías u ajawil Judá tu lu'umil Bet-semese', ca tu bisaj Jerusalén, ca tu je'aj jun p'éel bej ciento ochenta metros cóochil tu tuulumil líikbal tu jool najil Efraine', tac tu jool najil yaan tu ti'itzilo'.

²⁴Cu dzo'ocole', tu ch'a'aj tuláacal le oro tu yéetel le platao', bey xan tuláacal le nu'uculo'ob yaan tu kulnaj Ku cu cananta'al tumen Obed-edomo', yéetel u ayikalilo'ob jalach naj. Cu dzo'ocol u machic dze'edzec máaco'ob u bise', j suunaj Samaria.

²⁵Amasías u paal Joás, u ajawil Judae', j cuxlaj u láak quince ja'abo'ob dzo'oquili' u quíimil Joás u paal Joacaz u ajawil Israel.

²⁶U yalab u tzicbalil Amasías, chu'unpajic tac u xuule', j dzíibta'ab tu dzíibil ju'unilo'ob u ajawilo'ob Judá yéetel Israel.

²⁷Líikbal ti' le kiin tu tzelajubáa Amasías tu beel Yuumtzile', tu caajil Jerusalene', j yanchaj líik óolal tu yóokol Amasías, leti'e' j púudze', ca j bin u ta'acbesubáa Laquis; ba'ale' j ch'a'apachta'ab tac te j caajo', ca j quíimsa'abi.

²⁸Cu dzo'ocole', j bisa'ab tu yóokol jun túul tzíimine', ca j mu'uc tu yicnal u máanja'an ch'i'ibalo'ob tu caajil David.