Read Yucateco 2 Crónicas 26 Bible Online

2 Crónicas 26 - Yucateco bible

2 Crónicas 26

¹Tuláacal túun u cajnáalilo'ob Judae', tu ch'a'ajo'ob Uzíase', ca tu dzajo'ob u ti'al ca ajawnac tu jalach káanche' Amasías u taata.

²Leti' utzquint u caajil Elat cu dzo'ocol u quíimil u taata, tu ca'a ch'a'aj u ti'al Judá.

³Uzíase', yaan ca'ach diez yéetel seis ja'abo'ob ti' ca j chu'unpaj u ajawil, méektáana cincuenta yéetel ca'a p'éel ja'abo'ob Jerusalén. U maamae', tu kaaba'inta x Jecolías, ti' sijnal Jerusalene'.

⁴Uzíase', toj úuchic u cuxtal tu táan Yuumtzil je'el bix Amasías u taatae'.

⁵Tu táan óoltaj u caxtic Junab Ku ca'aliquil cuxa'an Zacarías, máax ca'anbes u tzic Ku. Ca'aliquil tu caxtaj Yuumtzile', j bin utzil ti'.

⁶Uzíase', tu ch'a'aj óoltaj u ba'ateltic le j filisteobo', ca tu jenaj u tuulumilo'ob Gat, Jabnia yéetel Asdod, ca tu beetaj caajo'ob tu lu'umilo'ob Asdod ichil le j filisteobo'.

⁷Áannta'ab tumen Ku u ba'atelt le j filisteobo', le j arabeob cajnáalo'ob Gur-baal yéetel le j meunitaobo'.

⁸Le j amonitaobo', cu bo'otico'ob páatan ca'ach ti' Uzías, ca t'i'itpaj u péectzilil tac tu xuul u lu'umilo'ob Egipto, tumen sen yanchaj u páajtalil ca'achi.

⁹Tu beetaj xan witzil najo'ob tu caajil Jerusalén tu yóokol u jool najil le ti'itzo', tu yóokol u jool najil le táax kóomo' yéetel te j ti'itzo', ca tu láaj tuulumtaj.

¹⁰Cu dzo'ocole' tu beetaj xan witzil najo'ob x tocoy lu'um, tu potaj xan ch'e'eno'ob, tumen sen ya'ab ca'ach u wacaxo'ob je'el bix te j táax kóomo', bey tu táaxil le pu'uco'. Yaan xan máaxo'ob meyajtic te j káax yéetel tu péet paachilo'ob u paakalilo'ob uvaob yaan te j táax pu'uquil yéetel u láak u jejeláasil u paakalo'obo', tumen sen utz tu yich le paakalo'obo'.

¹¹Uzías xane', yaan ca'ach u aj ba'atelo'ob u nu'ucbesmajuba'ob, cu tzoolicuba'ob u ti'al u jóokolo'ob j ba'atel je'el bix dzíibta'anil u kaaba'ob tumen Jehiel le máax dzíibtic ba'axo'ob cu yúuchul jalach naj yéetel tumen Maasías aj dzíib, jun túul u náacom le ajawo'.

¹²Tuláacal u nuuquil u láaktzililo'ob le aj ba'atelo'ob xiixib máaco'obo', dos mil seicientos.

¹³Tu yáanal u nu'ucbesajo'ob yaan trescientos siete mil aj ba'atelo'ob u nu'ucbesmajuba'ob j ba'atel, sen mu'uka'ano'ob u ti'al u yáanto'ob le ajaw te j ba'atelo'.

¹⁴Uzíase' tu nu'ucbesaj u ti'al tuláacal u aj ba'atelo'obe', chimalo'ob, lóomte'ob, u p'óoquilo'ob ba'atel, u búuquilo'ob ba'atel x p'úunche'ob yéetel yúuntuno'ob.

¹⁵Cu dzo'ocole', tu beetaj tu caajil Jerusalén tu kab aj na'anat máaco'ob nucuch jejeláas nu'uculo'ob u ti'al ba'atel u ti'al u dzáa tu yóokol witzil najo'ob yéetel tu asab ca'analil le tulu'umo'ob, u ti'al ca u ch'iino'ob x julubo'ob yéetel nucuch tuunicho'ob. Sen náachchaj u péectzilil, tumen nojoch áanta'abic tumen Ku u ti'al u mu'uka'antal.

¹⁶Ba'ale' le ca j sen mu'uka'anchaje', j suunaj ca'anal ichile', ca tu caxtaj u lúubul. Tu ma' u'uyaj t'antaj Yuumtzil Ku, tumen j ooc tu kulnaj Yuumtzil u ti'al u tóoc poom tu multuunil kultaj u ti'al u tóoca'al poom.

¹⁷Ba'ale' paachil ti'e', j ooc aj kiin Azarías láakinta'an tumen ochenta u aj kiino'ob Yuumtzil jach xiixib máaco'ob,

¹⁸j yanchajo'ob actáan ti' le ajawo', ca tu ya'alajo'ob ti': Ajaw Uzías, u meeyjul le kub poomo', ma' a Tzicbe'enil unaj u beetiqui', lelo' u meyaj aj kiino'ob u ch'i'ibalo'ob Aarón, tumen jun páaycuna'ano'ob u ti'al u beeto'ob. Jóokoc a tzicbe'enil ti' le quili'ich naja', tumen dzo'oc u ma' u'uyaj t'antic Yuumtzil, ma' bíin tzi'iquic tumen Ku tu yo'olal lelo'.

¹⁹Bey u machmaj Uzías u nu'ucul u tóoca'al le poomo', j p'u'uj tu yéetel le aj kiino'obo'. Ichil u p'uja'anil tu yéetel le aj kiino'obo', jóok jáaway tu táan pool, tu táan le aj kiino'ob ichil u kulnaj Yuumtzil tu yicnal u multuunil kultaj u ti'al u tóoca'al poomo'.

²⁰Le ca j pacta'ab tumen aj kiin Azarías yéetel u chuucáan aj kiino'obo', tu yilajo'ob yaan jáaway tu táan poole', ca tu séeb jóokeso'obi'; tu séebcuntaj xan leti' tumen dzo'oc u ja'adzal tumen Yuumtzil.

²¹Ajaw Uzíase', yanchaj jáaway ti' tac tu kiinil quíimic, cuxlaj koja'an ti' jáaway chéen tu juunal ti' jun p'éel naj, j we'et' u yocol tu kulnaj Yuumtzil, Jotan, u paal j p'áat ilic u ba'aluba'ob u jalach naj yéetel u méektáanil le múuch' caajo'obo'.

²²U yalab u tzicbalil Uzías líikbal chu'unpajic tac u dzo'ocbale', j dzíibta'ab tumen Isaías u paal Amoz.

²³Le ca j quíim Uzíase', j mu'uc tu tzéel u máanja'an ch'i'ibalo'ob tu mucnalil jalach naj, tumen u yojelo'ob koja'an ca'ach ti' jáaway. Cu dzo'ocole', ajawnaj Jotán tu jalach káanche'.