Read Yucateco 2 Crónicas 27 Bible Online

2 Crónicas 27 - Yucateco bible

2 Crónicas 27

¹Yaan veinticinco ja'abo'ob ti' Jotam ca j chu'unpaj u ajawil, ajawnaj Jerusalén diez yéetel seis ja'abo'ob. U maamae' tu kaaba'inta x Jerusa, u x ch'upul paal Sadoc.

²Jotame', tu beetaj ba'ax toj tu táan yich Yuumtzil je'el bix tu beetajil u taatae'. Ba'ale', ma' j ooc tu kulnaj Yuumtzili'. Ba'ale' le caajo', tu beetajo'ob ba'axo'ob kaas.

³Jotam j beet u noj jool najil u kulnaj Yuumtzil bey xan u láak ya'abcach najo'ob tu tuulumil Ofel.

⁴Tu beetaj xan caajo'ob tu yóokol u witzil Judá, bey xan tulu'umo'ob yéetel witzil najo'ob te j káaxo'obo'.

⁵Yanchaj ba'atel ti' tu yéetel u ajawil j amonitaobe', ca tu pa'aj u muuko'ob. ti' le ja'abo' le j amonitaobo', j yanchaj u bo'otico'ob u ti'al patan tres mil trecientos kilos plata, ca'a p'éel millon docientos mil kilos trigo, yéetel ca'a p'éel millon yéetel docientos mil kilos cebada. buca'aj xan tu kubajo'ob ti' tu jujun p'éelil u láak ca'a p'éel ja'abo'ob.

⁶Jotame', sen yanchaj u páajtalil, tumen toj úuchic u cuxtal tu táan Yuumtzil.

⁷U chuucáan ba'axo'ob tu beetaj Jotam, bix úuchic u ba'atel yéetel ba'axo'ob tu beetaje', j dzíibta'ab tu ju'unilo'ob u ajawilo'ob Israel yéetel Judá.

⁸Jotame', yaan veinticinco ja'abo'ob ti' ca j chu'unpaj u ajawil, méektáana diez yéetel seis ja'abo'ob Jerusalén.

⁹Le ca quíime', j mu'uc tu yéetel u máanaja'an ch'i'ibalo'ob tu Caajil David. Cu dzo'ocole' ajawnaj Acaz u paal tu jalach káanche'.