Read Yucateco 2 Crónicas 28 Bible Online

2 Crónicas 28 - Yucateco bible

2 Crónicas 28

¹Acaze', yaan veinte ja'abo'ob ti' ca j chu'unpaj u ajawil, méektáana Jerusalén dieciseís ja'abo'ob; ba'ale' ma' j cuxlaj toj tu táan Yuumtzil je'el bix David u máanja'an chi'ibale',

²ba'ale' j cuxlaj je'el bix u ajawilo'ob Israele', tu beetaj xan patbil kuob yéetel yi'ibil fierro, u ti'al u yoochelt Baal,

³tu tóocaj poom tu táax kóom lu'umil Ben-inom, tu beetaj u tóoca'al u paalal u ti'al u kub quíimsbil, je'el bix u j p'ecbe'en cuxtal le máaco'ob tojolch'inta'abo'ob tu táan le j israelitaobo'.

⁴Cu dzo'ocole', tu kubaj quíimsbil ba'alche'ob, tu tóocaj xan poom ti' manba'al kulnajo'ob, bey xan ti' le mejen pu'uco'ob yéetel tu yáanal búucle' che'ob sen ya'ab u mootzo'ob.

⁵Tu yo'olal beyo', Yuumtzil u Kue', tu kubaj tu kab u ajawil Siria, j pa'ab u muuko'ob tumen le j siriobo', ca j ma'ach cuxa'an ya'ab ti'obi' u ti'al u bisa'alo'ob tu caajil Damasco. j ku'ub xan tumen Yuumtzil tu kab u ajawil Israel, ca sen pa'ab u muuk.

⁶Chéen ti' jun p'éel kiine', Peka u paal Remalíase', tu quíimsaj ciento veinte mil j xiixib máaco'ob Judá, tumen leti'obe' tu p'atajo'ob Yuumtzil, u Ku u máanja'an ch'i'ibalo'ob.

⁷Bey xan Zicri jun túul u aj ba'atel Efraine', tu quíimsaj Maasías u paal le ajawo', Azricam u aj nojochil le jalach najo' yéetel Elcana u noj áantaj le ajawo'.

⁸Cu dzo'ocole', u aj ba'atelilo'ob Israele', tu machajo'ob cuxa'an docientos mil u cajnáalilo'ob Judá xa'aka'an yéetel co'olelo'ob, j xiibil paalalo'ob yéetel x ch'upul paalalo'ob, bey xan tu ch'a'ajo'ob ya'abcach ba'alo'obe', ca tu bisajo'ob Samaria.

⁹Te'elo', yaan ca'ach jun túul u aj bóobat Yuumtzil cu kaaba'intic Obed, leti'e', jóok u nuptáant le aj ba'atelo'ob ca'aliquil táan u yocolo'ob Samariae', ca tu ya'alaj ti'ob: Yuumtzil u Ku a máanja'an ch'i'ibale'exe', j kuuxilnaj ti' judá, le t o'olal tu kubaj ta kabe'ex. Ba'ale' te'exe', ta quíimsaje'exo'ob yéetel jun p'éel p'uja'anil j kuch tac j ca'an.

¹⁰Cu dzo'ocole' dzo'oc a tucultique'ex a palitziltique'ex yéetel a x palitziltique'ex u cajnáalilo'ob Judá yéetel Jerusalén. ¿Ba'ale', te'exe', ma' wa kebanchajque'ex xan tu táan Yuumtzil a Kuexi'?

¹¹Le t o'olale', ch'en xinquintene'ex, sute'ex le máaxo'ob ta machaje'ex cuxa'ano'obo', tumen a láake'exo'ob, tumen Yuumtzile', sen kuux ti' te'ex.

¹²Bey túuno', Azarías u paal Johanán, Berequías u paal Mesilemot, Ezequías u paal Salum, yéetel Amasa u paal Adlai, u nuuquilo'ob u náacomilo'ob Efraine', j yanchajo'ob tu táan le máaco'ob cu suuto'ob ti' le ba'atelo',

¹³ca tu ya'alajo'ob ti'ob: Ma' a taasique'ex way le máaxo'ob ta machaje'exo', tumen je'el u beetic u yantal c si'ipile'ex tu táan Yuumtzile'. Le ba'ax ca tucultique'ex a beetique'exo', chéen bíin u sen ya'abcunt c si'ipile'ex dzo'oc u sen ya'abtalo', Yuumtzile', bíin kuuxchajac tu yéetel Israel.

¹⁴Le aj ba'atelo'ob túuno', tu jáalkabtajo'ob le máaxo'ob tu machajo'obo', ca tu p'atajo'ob le ba'axo'ob tu tocajo'ob ti'ob tu táan le náacomo'ob yéetel tu táan tuláacal le caajo'.

¹⁵Cu dzo'ocole', le máaco'oba', tu ch'a'ajo'ob le máaxo'ob j ma'acho'ob cuxa'ano'ob ca'acho', ca tu jóokeso'ob ichil le ba'alo'ob lukesa'ab ti'obo', nooko'ob u ti'al u búucbesa'al le chacnulo'obo', xanabo'ob u dza'ob tu yooco'ob, u janalo'ob yéetel u yukulo'ob, j dza'ac u loobilo'ob, cu dzo'ocole' ca j bisa'abo'ob tu yóokol burro'ob tac Jericó u caajil xa'ano'ob le ma' tu páajtal u xíimbalo'obo', ca j p'a'ato'ob tu yicnal u láaktzilo'ob. cu dzo'ocole' j suunajo'ob Samaria.

¹⁶Ti' le kiinaco', le ajaw Acazo', tu túuchi'itaj aj bisaj t'aano'ob ti' u ajaw Siria u ti'al u káatic áantaj,

¹⁷tumen Edome', j bin u ba'atelto'ob Judae', ca tu pa'ajo'ob u muuke', ca tu bisajo'ob dze'edzec máaco'ob cuxa'ano'ob.

¹⁸Le j filisteob xano', j bino'ob u yocolto'ob u caajilo'ob u táax kóom lu'umilo'ob Néguev u ti'al Judá; tu ch'a'ajo'ob Bet-semes, Ajalón, yéetel Gederot, tu ch'a'ajo'ob xan Soco, Timna yéetel Gimzo pa'ate' yéetel u x péet caajilo'obe', ca j p'áato'ob cajtali'.

¹⁹Yuumtzile', tu yóoltaj u t'onquint Judá tu yo'olal Acaz, u ajawil Judá, tumen leti' j cáajbes u kaakas cuxtal Judá, j suunaj jach ma' ocsaj óolil ti' Yuumtzil.

²⁰Tigglad-pileser, u ajawil Asiriae', j bin u ba'atelt Acaz, ma' bin u mu'uka'anquint je'el bix káata'abic ti'e', ba'ale' bin u yedze.

²¹Quex tumen Acaz tu jóokesaj u co'ocoj ba'alilo'ob u kulnaj Yuumtzil, bey xan u co'ocoj ba'alilo'ob le jalach naj yéetel u yotoch u nuuquilo'ob Judá u ti'al u bo'otic páatan ti' ajaw Asiriae', ma' j áanta'abi'.

²²Quex tumen tu yilajubáa ichil mukyaje', j sutkaj u yóol ti' Yuumtzili'. ¡Bey ca'ach Acazo'!

²³Tu yo'olal tu kubaj quíimsbil ba'alche'ob ti' u kuilo'ob Damasco leti' j beet u pa'abal u muuk. Tumen leti'e' tu tucultaj je'el bix áanta'abic u ajawilo'ob le múuch' caajo'obo' tumen u kuilo'ob Siriae' bey je'el u yáanta'al leti'e', wa ca kub quíimsbil ba'alche'ob ti'obe'. Ba'ale', leti'ob j beet u kaasil ti' yéetel ti' tuláacal Israel.

²⁴Acaze', tu much'quintaj u nu'uculo'ob u kulnaj Kue', ca tu xiixcuntajo'ob, tu kalaj u jool najilo'ob u kulnaj Ku, ca túuchi'itaj beetbil manba'al multuunil kultajo'ob ti' tuláacal u ti'itz bejilo'ob Jerusalén.

²⁵Tu beetaj manba'al kulnajo'ob ti' tuláacal u caajilo'ob Judá u ti'al tóoquic poom ti' yaanal kuob, u ti'al u beetic u p'u'ujul Yuumtzil u Ku u máanja'an ch'i'ibalo'ob.

²⁶U yalab u tzicbalil tuláacal ba'ax tu beetaj líikbal u chu'unpajal tac u dzo'ocbale', j dzi'ibta'ab tu ju'unil u ajawilo'ob Judá tu yéetel Israel.

²⁷Le ca j quíime', j mu'uc tu yicnal u máanja'an ch'i'ibalo'ob tu caajil Jerusalén, ba'ale', ma' j bisa'ab tu mucnalo'ob u ajawilo'ob Israeli. Cu dzo'ocole', ajawnaj Ezequías u paal.