Read Yucateco 2 Crónicas 29 Bible Online

2 Crónicas 29 - Yucateco bible

2 Crónicas 29

¹Veinticinco ja'abo'ob yaan ti' Ezequías ca j chu'unpaj u ajawil, méektáana Jerusalén veintinueve ja'abo'ob. U maamae' tu kaaba'inta Abi u x ch'upul paal Zacarías.

²Tu beetaj ba'ax toj tu táan Yuumtzil je'el bix tuláacal ba'ax tu beetaj David u máanja'an ch'i'ibale'.

³Leti'e', ti' u yáax winalil u ajawile', tu je'aj u jool najilo'ob u kulnaj Yuumtzile', ca tu yutzquintaj.

⁴Cu dzo'ocole' tu t'anaj le aj kiino'ob tu yéetel le j levitaobo', ca tu much'quintajo'ob tu kíiwiquil j lakine'

⁵ca tu ya'alaj ti'ob: J levitaex, ch'en xiquintene'exi': utzquinte'ex a wanile'ex bejela'e', ca xan a wutzquinte'ex u yanil u kulnaj Yuumtzil u Ku a máanja'an ch'i'ibale'ex. Jóokese'ex ichil le quili'ich naj tuláacal ba'ax ma' utz yanile'.

⁶Tumen c máanja'an ch'i'ibalo'obe', tu p'atajo'ob u yocsaj óolalo'ob, tu beetajo'ob ba'alo'ob kaastac tu táan Yuumtzil Kue', ca tu xúump'attajo'ob. Tu tzelajo'ob u paacato'ob ti' u yotoch Yuumtzil, tu p'ectajo'ob xan.

⁷Tu kalajo'ob u jool najilo'ob u x máacan pakil, tu'uplaj u sáaso'ob, bey xan j p'a'at u tóoca'al poom yéetel u ku'ubul tóocbil ba'alche'ob tu quili'ich naj u Ku Israel.

⁸Le t o'olale', Yuumtzile', j kuuxilnaj ti' Judá yéetel ti' Jerusalene', ca tu sutkeso'ob ba'alilo'ob cu dzáic sajaquil yéetel cu ja'aksaj óol je'el bix ta wilajile'ex ta wichile'exe'.

⁹Le t o'olale', c taataobe', j lúubo'ob quimeno'ob ich ba'atel, c xiibil paalalo'ob, c x ch'upul paalalo'ob yéetel c atano'obe', j ma'acho'ob j bisa'al cuxa'ano'ob.

¹⁰Bey túuno', dzo'oc in tucultic in beetic jun p'éel nup t'aan tu yéetel Yuumtzil, u Ku Israel, u ti'al ca u tzel u p'uja'anil ti' to'on.

¹¹Le t o'olale', in paalale'ex, ma' a p'atcabaex, tumen Yuumtzile', tu yéeyaje'ex u ti'al ca yanaque'ex tuláacal ja'abo'ob u ti'al a meyajte'ex, yéetel u ti'al ca a kube'ex poom ti'.

¹²Le j levitaobo' tu cáajsajo'ob u meyajo'ob tu séeblaquilo' leti' lelo'oba': Ti' u ch'i'ibalo'ob Coate', Mahat u paal Amasai yéetel Joel u paal Azarías; ti' u ch'i'ibalo'ob Merarie', Cis u paal Abdi yéetel Azarías u paal Jehaleel; ti' u ch'i'ibalo'ob Gersone', Joa u paal Zima Yéetel Edén u paal Joa;

¹³ti' u ch'i'ibalo'ob Elizafane', Simri yéetel Jehiel; ti' u ch'i'ibalo'ob Asafe', Zacarías yéetel Matanías;

¹⁴ti' u ch'i'ibalo'ob Hemane', Jehiel yéetel Simei, yéetel ti' u ch'i'ibalo'ob Jedutune', Semaías yéetel Uziel.

¹⁵Leti'obe' tu much'quintajo'ob u láako'obe', ca tu láaj yutzquintajo'ob u yanilo'ob; cu dzo'ocole', j ooco'ob u yutzquinto'ob yanil le kulnajo', je'el bix tu ya'alajil le ajaw yéetel je'el bix u ya'almajil Yuumtzilo'.

¹⁶Cu dzo'ocole', j ooc le aj kiino'ob ichil le kulnajo', u ti'al u yutzquintico'ob u yanil. Tu jóokesajo'ob tu táancabil le kulnaj tuláacal le ba'axo'ob ma' utz yanilo'ob tu caxtajo'ob ichil le najo'obo', ca j bisa'ab tumen le j levitaob tu chan áalcab ja'il Cedrón.

¹⁷Tu cáajsajo'ob u yutzquintico'ob tu yáax jun p'éel kiinil le winalo', le ca tu chucaj u ocho kiino'obe', dzo'oc u ca'a bisico'ob tu x máacan pakil u kulnaj Yuumtzil. U yalab le kulnajo' tu dzo'ocsajo'ob u yutzquintico'ob u yanil ti' u láak ocho kiino'ob, le ca tu chucaj u diez yéetel seis kiino'obe', láaj dzoca'an yanil.

¹⁸Cu dzo'ocole', j ooco'ob tu jalach naj Ezequíase', ca tu ya'alajo'ob ti': Dzo'oc c utzquintic u yanil tuláacal le najo': u multuunil kultaj u ti'al le tóocbil ba'alche'ob p'a'ate' yéetel u nu'uculo'obo', yéetel u táas che'il le waaj pa'ate' yéetel tuláacal u nu'uculo'obo'.

¹⁹Dzo'oc xan c nu'ucbesic yéetel dzo'oc c uztquintic yanil tuláacal le ba'axo'ob manba'alcunta'abo'ob tumen le ajaw Acaz ca'aliquil ajawnaj tu yo'olal tu p'atilac u yocsaj óolal, bejela'e', ti' yano'ob tu táan u multuunil u kultaj Yuumtzile'.

²⁰Le ajaw Ezequíaso', j líik jach piknal u sáastale', ca tu much'quintaj u jala'achilo'ob le caajo', ca j bin tu kulnaj Yuumtzil.

²¹Tu bisajo'ob siete mejen wacaxo'ob, siete j tamano'ob yéetel siete mejen j yuuco'ob u ti'al u ti'ibil óolalil u keban u yotochnáalo'ob le ajawo', u kulnaj Yuumtzil yéetel u múuch' caajil Judá. Le ajawo' tu ya'alaj ti' le aj kiino'ob u ch'i'ibalo'ob Aarón ca u láaj kubo'ob láaj tóocbil tu yóokol u multuunil u kultajil Yuumtzil.

²²Le aj kiino'obo', tu quíimsajo'ob le mejen wacaxo'obo', tu molajo'ob u ki'ikele', ca tu tzitzajo'ob tu yóokol u multuunil le kultajo'. Cu dzo'ocole', tu beetajo'ob xan bey tu yéetel le j tamamno'obo' bey xan tu yéetel le mejen j tamano'obo'.

²³Cu dzo'ocole', j bisa'ab u mejen j yuuquilo'ob u ti'ibil óolil le kebano'ob tu yicnal le ajaw yéetel le caajo', ca tu dzajo'ob u kabo'ob tu yóokol le ba'alche'obo'.

²⁴Cu dzo'ocole', le aj kiino'obo', tu quíimsajo'obe', ca tu wecajo'ob u ki'ikel tu yóokol u multuunil kultaj u ti'al u ti'ibil óolal keban, tu yo'olal u ka'amal sa'atsaj si'ipilil tuláacal u caajil Israel, tumen le ajawo', tu ya'alaj ca táanbesa'ac le tóocbil ba'alche' u ti'al tuláacal Israelo'.

²⁵Ezequíase', tu dzáa xan j levitaob tu kulnaj Yuumtzil, u ch'a'amajo'ob u platillo'ob, salteriob yéetel u cítaraob, je'el bix u ya'almajilo'ob David yéetel Gad, le aj náay cu meyaj tu yicnal le ajawo', yéetel aj bóobat Natán. Tumen lelo', Yuumtzil j a'al tu chi' u aj bóobato'ob.

²⁶Le j levitaobo', wa'alacbalo'ob yéetel u nu'uculo'ob u paaxo'ob David, le aj kiino'obo' yéetel u trompetaob.

²⁷Ezequías túune' tu ya'alaj ca ku'ubuc le quíimsbil ba'alche' tu yóokol u multuunil kultajo'. Tu súutuquil cáajsa'abic u ku'ubul le quíimsbil ba'alche'obo', cáajsa'ab xan le kaay ti' u nojbe'enil Yuumtzilo', bey xan u jóopsa'al le trompetaob, yéetel u paaxilo'ob u nu'uculo'ob u paaxo'ob Davido'.

²⁸Le caajo', xolocbalo'ob ca'ach u kulto'ob Yuumtzil, ca'aliquil táan u kaay le aj ka'ayo'obo', le aj kiino'obo', táan ca'ach u jóopsico'ob u trompetaob. J paaxnajo'ob tuláacal u súutuquil u ku'ubul le tóocbil ba'alche'obo'.

²⁹Cu dzo'ocole', le ajaw yéetel tuláacal le máaxo'ob láakintico', xolajo'ob u ti'al u kulto'ob Junab Ku.

³⁰Cu dzo'ocole' le ajaw Ezequías yéetel u méektáanilo'ob le caajo', tu ya'alajo'ob ti' le j levitaob ca u qui'iqui' t'anto'ob Yuumtzil yéetel u salmo'ob David bey xan yéetel u salmo'ob aj bóobat Asaf. Leti'obe' tu beetajo'ob yéetel ya'abcach qui'imac óol, j xolajo'ob xan u kulto'ob Yuumtzil.

³¹Cu dzo'ocole' Ezequíase', tu ya'alaj ti' le caajo': Bey tumen dzo'oc a jun páaycunticaba'ex u ti'al Yuumtzilo', nadzaba'ex u ti'al a taase'ex quíimsbil ba'alche'ob yéetel u ti'ibil óolil nib óolal u ti'al u kulnaj Yuumtzil. Le caaj túuno', tu bisajo'ob quíimsbil ba'alche'ob yéetel u ti'ibil óolalil nib óolal, cu dzo'ocole', le máaxo'ob j síij tu tuuculo'obe', tu kubajo'ob tóocbil ba'alche'ob.

³²Le ba'alche'ob j bisa'abo'ob tumen le caaj u ti'al tóocbil ba'alche'obo', sesenta wacaxo'ob, cien j tamano'ob yéetel doscientos mejen j tamano'ob. Tuláacal lelo', u ti'al kubbil ti' Yuumtzil láaj tóocbil.

³³Tu pa'ate'il le ba'alche'ob j ku'ublajo'obo', seiscientos wacaxo'ob yéetel tres mil mejen wacaxo'ob.

³⁴Ba'ale' bey chéen jun p'íit le aj kiino'ob u ti'al u lukesico'ob u kéewelil tuláacal le wacaxo'ob u ti'al le tóocbil ba'alche'obo', yanchaj u yáanta'alo'ob tumen u láaktzilo'ob j levitaob u dzo'ocbeso'ob le meyajo', ca'aliquil u pa'atico'ob u yutzquinticuba'ob u láak aj kiino'obo'.

³⁵Cu dzo'ocole', ya'abcach tóocbil ba'alche'ob yaan u ti'al j ku'ubul, bey xan u tzaatzelo'ob u quíimsbil ba'alche'ilo'ob ca'a bisajbáil, yéetel u ti'ibil óolilo'ob vino cu beeta'al tu yéetel le tóocbil ba'alche'obo'. Bey úuchic u ca'a chu'unpajal u beeta'al le kultaj tu kulnaj Yuumtzilo'.

³⁶Ezequías yéetel tuláacal le caajo', qui'imacchaj u yóolo'ob yéetel ba'ax tu beetaj Ku te j caajo', tumen tuláacal j úuch jach séeba'an.