Read Yucateco 2 Crónicas 3 Bible Online

2 Crónicas 3 - Yucateco bible

2 Crónicas 3

¹Salomone' tu chu'unbesaj u beetic u kulnaj Yuumtzil tu caajil Jerusalén, tu pu'uquil Moriah, le tu'ux chíicpaj Yuumtzil ti' David u taatao', te j cúuchil tu'ux tu nu'ucbesaj David u ti'alo', lelo' leti' ca'ach u cúuchil u nu'ucbesaj trigo Ornán jebuseo'.

²Tu chu'unbesaj le meyaj tu ca'a p'éel kiinil u ca'a p'éel winalil ti' u can p'éel ja'abil chu'unpajac u ajawil.

³U chuun pakilo'ob le kulnaj tu dzaj Salomono', cu p'isico'ob ca'ach: veintisiete metros u chowaquil yéetel nueve u cóochil.

⁴Le x máacan pak yaan táanil ti' le kulnajo', cu p'isic ca'ach nueve metros u chowaquil, je'el bix buca'aj cóochil le kulnajo', u ca'analil xane' láili' nueve metrose'. Salomone' tu láaj balaj tu yéetel oro ichil le máacan pako',

⁵ca tu balaj yéetel u póolbil che'ilo'ob pino ichil le noj najo', cu dzo'ocole' ca tu balaj xan tu yéetel ma'alob oro, ca j póola'ab tu yóokolo'ob u yoochelo'ob xa'ano'ob yéetel x jokenjoko'ob,

⁶ca tu jadzutzquintaj tu yéetel jadzutz tuunicho'ob. Le oro j meyajta'abo' u asab ma'alobil oro.

⁷Láaj ba'al tu yéetel oro tuláacal ichil le najo': u che'ilo'ob, u cúuchil u jool najilo'ob, u pakilo'ob, u jool najilo'ob, ca tu póolaj aj xiknalo'ob ti' u pakilo'ob.

⁸Tu beetaj xan le sen quili'ich najo'. Yaan ca'ach nueve metros u chowaquil, je'el bix buca'aj u cóochil le kulnajo', nueve metros xan u cóochil. Ca tu láaj balaj tu yéetel ma'alob oro cu kuch'ul míin veinte mil kilos u aalil.

⁹U clavoilo'ob ca'ache', quinientos cincuenta gramos u aalil tu jujun p'éelil. Tu balaj xan yéetel oro le najo'ob yaan tu yóokolo'ob u láak najo'obo'.

¹⁰Ichil le quili'ich najo' tu túuxtaj póolbil ca'a túul aj xiknalo'obe', ca tu balajo'ob tu yéetel oro.

¹¹Tuláacal u chowaquil u xiik le aj xiknalo'obo', nueve metros; jun p'éel ti' u xiiko'obe' cu p'isic ca'ach ca'a p'éel metros yéetel veinticinco centímetros, cu cóojol ti' u pakil le najo', u láako', láili' buca'ajo', cu cóojol tu ni' u xiik u láak aj xiknalo'.

¹²U láak jun p'éel u xiik le aj xiknalo', láili' bey u p'iisilo', je'el bix u láako'obo', cu cóojol ti' u pakil le najo', u láak u xiiko', cu cóojol tu ni' u xiik le yáax aj xiknalo'.

¹³Tuláacal u xiiko'ob le aj xiknalo'obo' cu p'isico'ob nueve metros u chowaquil, wa'alacbalo'ob u sutmajo'ob u yicho'ob actáan ti' le naj yaan chúumuco'.

¹⁴Tu beetaj xan le x káasabo'ob tu yéetel chacpuke'en nook, chacjome'en nook yéetel lino, ca tu beetaj u chu'uyul aj Xikna'alo'obi'.

¹⁵Salomone' tu beetaj ca'a p'éel ocomo'ob cu bineltic jun p'íit u chuquic diesiseís metros u ca'analil u ti'al u táan u pakil le kulnajo'. U p'iicho'obe' cu p'isico'ob ca'a p'éel metros yéetel veinticinco centímetros.

¹⁶Tu beetaj xan x jokenjoko'ob je'el bix x bak caalo'obe', ca tu dzaj tu ca'analil le ocomo'obo'; cu dzo'ocole' tu beetaj cien granadaob ca tu dzaj te x jokenjoko'obo'.

¹⁷Le x jokenjoko'obo', tu dzaj tu táan u pakil le kulnajo', jun p'éel x no'ojili', yéetel jun p'éel x dzíiquili'. Le ocom yaan x no'ojilo' tu dzaj u kaaba'int Jaquin, le yaan x dzíiquilo' tu dzaj u kaaba'int Boaz.