Read Yucateco 2 Crónicas 30 Bible Online

2 Crónicas 30 - Yucateco bible

2 Crónicas 30

¹Ezequíase' tu túuxtaj a'albil ti' tuláacal Israel yéetel ti' Judá, tu túuxtaj xan dzíibil ju'uno'ob ti' Efraín yéetel ti' Manasés, u ti'al u páay óoltico'ob tu kulnaj Yuumtzil tu caajil Jerusalén u ti'al ca xi'ico'ob u kiinbeso'ob u noj kiinil u Táadz Máanbal Yuumtzil u Ku Israel.

²Cu dzo'ocol u tzicbal Ezequías yéetel tuláacal u nuuquil u aj meyajo'ob bey xan yéetel tuláacal u caajil Jerusalene', tu dzaj tu tuucul u kiinbesic le Táadz Máanbal tu ca'a p'éel winalo',

³tumen ma' tu páajtal u kiinbesico'ob jach tu kiinil, tumen chéen jun p'íit aj kiino'ob u yutzquintmajuba'ob, cu dzo'ocole' mix le caaj u much'majubáa Jerusaleno'.

⁴Bey tumen j lúub utzil ti' le ajaw yéetel ti' le caaj ba'ax dzo'oc u tuculta'alo',

⁵tu tucultajo'ob u ka'aytico'ob ti' tuláacal Israel líikbal Beerseba tac Dan, u páay óolil u ti'al ca xi'ico'ob Jerusalén u noj kiinbeso'ob u Táadz Máanbal Yuumtzil U Ku Israel. Tumen dzo'oc u sen máan kiin ma' kiinbesa'ac je'el bix a'ala'anilo'.

⁶Bey túuno', jóok u binbal aj bisaj t'aano'ob u ti'al u biso'ob ti' tuláacal u lu'umil Israel yéetel Judá u dzíibil ju'uno'ob le ajaw yéetel u nuuquilo'ob u jalach naj u ti'al u ka'ayto'ob u tus beel le ajawo': Israelitaex: suunene'ex ti' Yuumtzil u Junab Ku Abraham, Isaac yéetel Israel, tu yo'olal u suut leti' ta wéetele'ex, u yalab le caaj j púudz tu kab u ajawilo'ob Asiriao'.

⁷Ma' a quetique'ex ba'ax tu beetaj a máanja'an ch'i'ibale'ex yéetel a láaktzile'ex, tumen leti'obe', tu p'atajo'ob u yocsaj óolalo'ob ti' Yuumtzil, u Ku u máanja'an ch'i'ibalo'ob, leti' xane' tu kubajo'ob u ti'al xu'ulsbil je'el bix a wilique'exo'.

⁸Ma' a dzu'uyquinticaba'ex je'el bix a máanja'an ch'i'ibale'exo'obe'; táan óolte'ex Yuumtzil u ti'al a ca'a ejéemtique'ex u nup t'aan, co'otene'ex tu quili'ich naj tu jun páaycuntaj u ti'al tuláacal Ja'abo'obo'. Meyajte'ex Yuumtzil a Kuexe', ca ch'éenec u p'uja'anil ta wéetele'ex.

⁹Wa ca suute'ex tu paach Yuumtzile', le aj p'eeco'ob kalmail a láake'ex yéetel a paalale'exo', bíin u ch'a'ob óotzilil ti'ob u ti'al ca u beeto'ob u suuto'ob ti' le múuch' caajo'oba', tumen a Kuexe', cu ch'a'ic óotzilil yéetel ma' bíin u culpachquinte'ex wa te'ex ca suute'ex tu paach.

¹⁰Le aj bisaj t'aano'obo', tu yáalcabtajo'ob u lu'umilo'ob Efraín yéetel u lu'umilo'ob Manasés, caajal caaj tac u kuchulo'ob Sabulón. Ba'ale', cu che'ejta'alo'ob yéetel cu p'a'asta'alo'ob tumeno'ob.

¹¹Ba'ale' jujun túul ti' u j xiibilo'ob u ch'i'ibalo'ob Aser, Manasés yéetel Sabulone', tu t'onquintajuba'ob tu táan Kue' ca j bino'ob Jerusalén.

¹²Kue' tu péecsaj xan u cajnáalilo'ob Judá u ti'al u táan óoltico'ob u dzo'ocbesico'ob ba'ax tu ya'alaj le ajaw yéetel u nuuquilo'ob caaj, je'el bix u ya'almajil Yuumtzile'.

¹³Bey túuno', sen ya'ab máaco'ob tu much'ajuba'ob tu caajil Jerusalén tu ca'a p'éel winal u ti'al u kiinbesico'ob u qui'imac óolil waajo'ob x ma' paj sacanil.

¹⁴Tu chu'unbesajo'ob u tzelico'ob tuláacal u multuunilo'ob kultaj yéetel u cúuchilo'ob u tóoca'al poom yano'ob Jerusaleno', ca tu pulajo'ob tu chan áalcab ja'il Cedrón.

¹⁵Tu catorce kiinil u ca'a p'éel winalo', tu quíimsajo'ob u chan j tamanil le Táadz Máanbalo'. Le aj kiino'ob tu yéetel le j levitaobo', tu ch'a'ajo'ob subtale', ca tu yutzquintajo'ob u yanilo'obe', ca tu bisajo'ob tu kulnaj Yuumtzil ba'alche'ob u ti'al láaj tóocbil.

¹⁶Cu dzo'ocole', j yanji'ob tu cúuchilo'ob je'el bix dzíibta'anil tu ya'almaj t'aan Moisés u palitzil Kue'. Le aj kiino'obo', cu tzitzico'ob ca'ach le ki'ik cu dza'abal ti'ob tumen le j levitaobo'.

¹⁷Bey tumen ichil le caaj ya'ab ti'ob ma' tu yutzquintajo'ob u yanilo'obo', le j levitaobo', yanchaj u quíimsico'ob u ba'alche'ilo'ob le Táadz Máanbal j taasa'abo'ob tumen le máaxo'ob ma' utz yanilo'ob u ti'al u jun páaycunto'ob ti' Yuumtzilo',

¹⁸Tumen ya'abcach u cajnáalilo'ob Efraín, Manasés, Isacar yéetel Zabulón tu jaantajo'ob u janalil le Táadz Máanbalo', ba'ale' ma' u yutzquintmajuba'ob je'el bix a'ala'anilo'. Ba'ale' Ezequíase', j payalchi'inaj tu yo'olalo'ob, ca'aliquil táan u ya'alic: Utzil óol Yuumtzil, sa'ates u si'ipil tuláacal le máaxo'ob tu jaajil u óolo'ob cu caxtiquecho'ob

¹⁹teech u Ku u máanja'an ch'i'ibalo'ob quex tumen ma' utz yanilo'ob je'el bix kabéet u ti'al u quili'ichil le kulnajo',

²⁰Yuumtzile', tu táan óoltaj u payalchi' Ezequíase', ca tu sa'atsaj u si'ipil le caajo'.

²¹Bey túuno', le j israelitaob yano'ob Jerusaleno' tu kiinbesajo'ob bul siete kiino'ob u qui'imac óolil le waaj x ma' paj sacanilo'. Le aj kiino'ob yéetel le j levitaobo', tu qui'iqui' t'antajo'ob Yuumtzil sáamsamal tu yéetel u nu'uculo'ob quili'ich paaxo'ob.

²²Ezequíase' tu t'anaj tuláacal le j levitaob tu dzajo'ob tuláacal u yóolo'ob u meyajto'ob Yuumtzilo', ca tu ya'alaj ti'ob sen qui'imac u yóol ti' leti'ob. Cu dzo'ocol u janalo'ob ti' le kiinbesajo'ob bul siete kiino'ob, bey xan u dzo'oc u kubico'ob quíimsbil ba'alche'ob u ti'al ca bisajbáil yéetel dzo'oc u qui'iqui' t'antico'ob u Ku u máanja'an ch'i'ibalo'obo',

²³tu tucultajo'ob u beetico'ob u láak siete kiino'ob le kiinbesajo', ca tu beetajo'ob yéetel sen qui'imac óolal;

²⁴Tumen Ezequías, u ajawil Judae', tu síaj mil mejen wacaxo'ob yéetel siete mil j tamano'ob ti' le caajo', u nuuquilo'ob le caajo', tu síijo'ob xan mil mejen wacaxo'ob yéetel diez mil j tamano'ob. Ya'ab aj kiino'ob tu yutzquintajo'ob u yanilo'ob.

²⁵Tuláacal u cajnáalilo'ob Judá j qui'imacchaj u yóolo'ob, bey xan le aj kiino'ob yéetel le j levitaob, bey xan tuláacal máaxo'ob j taalo'ob Israel, bey xan tuláacal le j táanxel lu'umilo'ob je'el bix le j taalo'ob Israelo', bey le cajnáalo'ob Judao'.

²⁶Sen yanchaj qui'ima'ac óol Jerusalén, tumen líikbal tu kiinilo'ob Salomón, u paal David u ajawil Israele', ma' beeta'ac mix ba'al bey tu caajil Jerusaleno'.

²⁷Cu dzo'ocole', j wa'alaj le aj kiino'ob yéetel le j levitaobo', ca tu qui' t'antajo'ob le caajo'; ca j u'uya'ab tumen Yuumtzil, j kuch u payalchi'ob tac j ca'an le tu'ux cajnáal Kuo'.