Read Yucateco 2 Crónicas 31 Bible Online

2 Crónicas 31 - Yucateco bible

2 Crónicas 31

¹Cu dzo'ocol tuláacale', tuláacal le j israelitaob yano'obo', j bino'ob tu caajilo'ob Judá ca tu bu'ubujo'ob u quili'ich tuunichilo'ob, tu bu'ubujo'ob u yoochelo'ob Asera yéetel tu jeno'ob le ma' ocsaj óolal quili'ich najo'ob tac u láaj xu'ulsico'ob le yano'ob Jerusalén yéetel Benjamino', bey xan le yano'ob Efraín yéetel Manaseso'. Cu dzo'ocole' tuláacal le j israelitaobo', j suunajo'ob tu yotocho'ob.

²Cu dzo'ocole', Ezequíase', tu t'oxaj ti' u jujun jaatzilo'ob le aj kiino'ob yéetel ti' le j levitaob u kiinilo'ob u jejeláas meyajilo'ob, u ku'ubul tóocbil ba'alche'ob, u ku'ubul u quíimsbil ba'alche'ilo'ob ca'a bisajbáil, u dza'abal nib óolal ti' Yuumtzil yéetel u meeyjulo'ob u jool najilo'ob kulnaj.

³Cu dzo'ocole', ajawe' tu ch'a'aj ichil ba'al u ti'ale', ca tu dzáa ba'axo'ob ka'abéeto'ob u ti'al u tóocbil ba'alche'ilo'ob ja'atzcab kiin yéetel ocnaj kiin, u ti'al u tóocbil ba'alche'ilo'ob u kiinil sábado, u ti'al u kiinbesajil chichan uj yéetel u ti'al quili'ich kiin kujo'ob je'el bix dzíibta'anil tu ya'almaj t'aan Yuumtzilo'.

⁴Tu ya'alaj xan ti' u cajnáalilo'ob Jerusalén ca u kubo'ob le páatan ti' le aj kiino'ob yéetel j levitaobo', u ti'al ca u kububa'ob tu jaajil u yóolo'ob u dzo'ocbeso'ob u meeyjul u ya'almaj t'aan Yuumtzil.

⁵Le ca j ka'ayta'ab le t'aana', le j israelitaobo', tu dzáajo'ob yéetel qui'imac óolal u asab ma'alobil u trigo'ob, u vino'ob, u aceiteob, u caabo'ob yéetel tuláacal ba'ax yaan ti'ob te j káaxo'. Tu bisajo'ob xan sen ya'ab u diezmoil ba'ax yaan ti'ob.

⁶Bey xan u cajnáalilo'ob Jerusalén yéetel u cajnáalilo'ob u chuucáan u caajilo'ob Judae', tu taasajo'ob u diezmoil u wacaxo'ob yéetel u mejen wacaxo'ob bey xan u diezmoil tuláacal ba'axo'ob jun páaycuna'ano'ob ti' Yuumtzil u Kuob.

⁷Tu yóox p'éel winale', jo'op' u much'quinta'al tuláacal le ba'alo'obo', ca dzo'oc tu siete winal.

⁸Le ca j bin Ezequías yéetel u nuuquilo'ob le caaj u yilo'ob le ba'ax much'quina'ano', tu qui' t'antajo'ob Yuumtzil yéetel u caajil Israel.

⁹Ezequías túune' tu káat chi'itaj ca a'ala'ac ti' bix yanil le múuch' ba'alo'obo',

¹⁰Azarías u nojoch le aj kiino'ob u chi'ibal Sadoco', tu núucaj ti': Líikbal ti' le kiin chu'unpaj u taasa'al le páatan tu kulnaj Yuumtzilo', yanchaj ya'ab ba'al c jaante, cu dzo'ocole', ya'ab cu p'áatali'; tuláacal lela', dzo'oc u p'áatal tumen Kue', dzo'oc u sen qui' t'antic u caajal.

¹¹Tu yo'olal lelo', Ezequíase', tu ya'alaj ca nu'ucbesa'ac ch'iilo'ob tu kulnaj Yuumtzil. Le ca dzo'oc u beeta'ale',

¹²j ocsa'ab ichilo'ob yéetel tu jaajil óol le páatano'obo', le diezmos cu ku'ublajalo'obo', yéetel le janalo'ob jun páaycunta'ano'ob u ti'al Yuumtzilo'. Ca j dzaab Conanías j levita u ti'al u beet u noj mayol coolil u aj cananilo'ob yéetel Simei u yíidzin u ti'al áantic.

¹³Cu dzo'ocole', ajaw Ezequías yéetel Azarías u nojochil u kulnaj Kue', tu dzáajo'ob u ti'al u beeto'ob u aj cananilo'ob tu yáanal u nu'ucbesaj Conanías yéetel Simei, le j xiibo'ob je'elo'oba': Jehiel, Azarías, Nahat, Asael, Jerimot, Jozabad, Eliel, Ismaquías, Mahat yéetel Benaía.

¹⁴Coré j levita u paal Imna, u aj canan u jool najil j lakino', leti' ilic le juunal óol ti'ibilo'ob u ti'al Kuo', bey xan le janalo'ob cu jun páaycunta'alo'ob u ti'al Kuo'.

¹⁵Coree', cu yáanta'al yéetel jaajil óol tu caajil aj kiino'ob tumeno'ob, Edén, Miniamín, Jesúa, Semaías, Amarías yéetel Secanías, u ti'al u dza'ob u t'ooxil ba'ax u jaanto'ob u yéet aj meyajo'ob. Cu dzáaico'ob ti'ob je'el bix t'oxa'anil u meyajo'obe', je'el bix ti' u nuuquilo'obe', bey ti' u mejenilo'ob,

¹⁶ti' tuláacal le máaxo'ob cu bino'ob kulnaj u beeto'ob u meyajo'ob sáamsamal je'el bix t'oxa'anil u kiinilo'ob ti'obe', tuláacal dzíibta'an u kaaba'ob líikbal le yaan óox ja'ab ti'obo' tac u asab nuuctaquilo'ob.

¹⁷Le aj kiino'obo', dzíibta'an u kaaba'ob tu yotochnáalo'ob, le j levitaobo', dzíibta'an u kaaba'ob líikbal le yaan veinte ja'ab ti'ob tac u asab nuuquilo'ob, je'el bix t'oxa'anil u meyajo'ob tu kiinilo'obe'.

¹⁸Ti' le dzíibo', láaj dza'an u kaaba'ob tuláacal le mejen paalalo'ob, u yatano'ob, u j xibil paalalo'ob, u x ch'upul paalalo'ob yéetel tuláacal le caajo', tumen bey dza'ano'ob ti' le meyajo', cu p'áatalo'ob jun páaycuna'ano'ob u ti'al Ku.

¹⁹Ti' tuláacal le caajo'obo', yaan j xiibo'ob dza'ano'ob u ti'al t'oxic ba'al u jaant tuláacal u j xiibil le aj kiino'ob u ch'i'ibalo'ob Aarón, bey xan tuláacal le j levitaob dzíibta'an u kaaba'ob cajnáalo'ob tu cúuchil u tzéenta'al wacaxo'ob tu caajalo'ob le aj kiino'obo'.

²⁰Bey tu beetilac Ezequías tuláacal Judao', tu beetaj ba'ax utz yéetel toj tu jaajil u yóol tu táan Yuumtzil u Ku.

²¹Tuláacal ba'ax tu dzajubáa u beet tu kulnaj Junab Ku wa quex u ti'al u dzo'ocbesic u ya'almaj t'aan Kue', tu beetaj u ti'al u caxtic Ku yéetel tuláacal u pucsi'ikal, let o'olal bin utzil ti'.