Read Yucateco 2 Crónicas 32 Bible Online

2 Crónicas 32 - Yucateco bible

2 Crónicas 32

¹Cu dzo'ocol le ba'alo'oba' yéetel le u chíica'anil le chuca'an óolalo', j kuch Senaquerib u ajawil Asiriae', ca tu ch'a'aj u caajilo'ob Judá, ca tu kalaj u paach u tuulum caajilo'ob yéetel u tuuculil u ch'a'aláantic.

²Le ca tu yilaj Ezequías dzo'oc u kuchul Senaquerib yéetel u tuuculil u ba'ateltic Jerusalene',

³tzicbalnaj tu yéetel u nuuquilo'ob le caajo', bey xan yéetel u náacomo'obe', ca tu ya'alaj ti'ob ka'ana'an u but'ico'ob le sayabo'ob yano'ob tu paach le caajo', ca tu p'éelili'icuntaj u tuuculo'ob u but'ico'ob.

⁴Tu much'ajubáa túun ya'abcach máaco'obe', ca tu but'ajo'ob le sayabo'obo', bey xan u beel le ja' yaan tu yáanal le lu'umo', tu yo'olal le quéen kuchuc u ajawilo'ob Asiriae', ma' u nactáantico'ob ya'ab ja' u ti'al u yuko'ob.

⁵Ezequíase', tu yu'ubajubáa xiixib máaquile', ca tu yutzquintaj le tuulumo', tu yutzquintaj xan le witzil najo'ob yano'ob tu yóokolo'obo', bey xan u bakpakilo'ob yaan tu paach le caajo'. Tu mu'uka'anquintaj xan u níix buut'il u Caajil David, cu dzo'ocole' tu beetaj ya'abcach x lóomte'ob, yéetel chimalo'ob.

⁶Cu dzo'ocole' tu dzaj náacomo'ob nu'ucbesic le caajo', ca tu much'quintajo'ob tu táax lu'umil u jool le caajo', ca tu dzaj u yóolo'ob ca'aliquil táan u ya'alic ti'ob:

⁷¡Mu'uka'anchajque'ex yéetel xiixib máacchajque'ex! Ma' a sajactale'ex mix u yéemel a wóole'ex tu táan u ajawil Asiria yéetel u sen ya'abcach aj ba'atelo'ob láakintico', Tumen asab utz yanilo'on ti' leti'.

⁸Leti'e' yaan u muuk wíinico'ob tu yicnal, ba'ale' t icnal yaan Yuumtzil c Ku u ti'al áantico'on u ti'al ca pa'a muuknaco'on. Le caajo' j yanchaj u yóol ca tu yu'ubaj bix t'aanajic le ajaw Ezequiaso'.

⁹Cu dzo'ocole' Senaquerib u ajawil Asiriae', ca'aliquil táan u ba'ateltic Laquis yéetel tuláacal u aj ba'atelo'obe', tu túuxtaj Jerusalén dze'edzec u nuuquil u aj ba'atelo'ob u ti'al u ya'alo'ob ti' Ezequías yéetel ti' u cajnáalilo'ob Jerusalén, le túuchi' t'aana':

¹⁰Senaquerib u ajawil Asiriae', cu túuchi'itic a'albil ti' te'ex: ¿Ba'axten ca tucultique'ex jach ma'alob a wanile'ex u ti'al ca p'áataque'ex Jerusalén quex tumen bakpachta'ane'ex?

¹¹Wa cu ya'alic te'ex Ezequías Yuumtzil a Kuex bíin u toque'ex tin kabe', táan u tusique'ex, táan u beetic a chokaba'ex j quíimil yéetel wi'ij, bey xan tu yéetel ukaj.

¹²¿Ma' wa leti' le Ezequías beet u lukesa'al u cúuchilo'ob u kulta'al le Kuo', u ti'al ca u ya'al ti' u cajnáalilo'ob Jerusalén ca u beeto'ob kultajil yéetel ca u tóoco'ob poom chéen ti' jun p'éel u multuunil le kultajo'?

¹³¿Ma' wa u yojel ba'ax in beetmaj teen yéetel in máanja'an ch'i'ibalo'ob ti' tuláacal u caajilo'ob le múuch' caajo'obo'? ¿Páatchaj wa u to'ocolo'ob tin kab le múuch' caajo'ob tumen u Kuobo'?

¹⁴¿Máacal máac ti' u beetibil kuilo'ob le múuch' caajo'ob kascunta'abo'ob tumen in máanja'an ch'i'ibalo'ob páatchaj u toquic u caajal tin kabo'? ¿Ba'axten ca tucultique'ex je'el u páajtal a to'ocole'ex tumen a Kuexe'?

¹⁵Bey túuno', ma' cha'ique'ex a tu'usule'ex mix u náisa'al a wóole'ex tumen Ezequías; tumen wa mina'an mix jun p'éel u kuil múuch' caajo'ob je'el u páajtal u toquic u caajal tin kab yéetel tu kab in máanja'an ch'i'ibalo'obe'. ¡Ma' xan bíin páatac a to'ocole'ex tin kab tumen a Kuexi'!

¹⁶Cu dzo'ocole' sen ya'ab ba'alo'ob tu ya'alajo'ob u nuuquilo'ob u ajaw Asiria ti' Ku Yuumtzil, bey xan ti' Ezequías u palitzil.

¹⁷Senaqueribe', tu dzíibtaj xan ju'uno'ob tu'ux cu poch'ic Yuumtzil u Ku Israel iquil u ya'alic ti': Je'el bix u kuilo'ob u láak múuch' caajo'ob ma' páatchaj u toquico'ob tin kab u caajalo'obo', mix u Ku Ezequías bíin páatchajac u toquic tin kab u caajal.

¹⁸U nuuquilo'ob u aj ba'atelo'ob Senaqueribe', tu t'anajo'ob u caajil Jerusalén yaan tu yóokol le tuulumo', ca tu ka'amcach a'alo'ob ti'ob ich hebreo tu yo'olal u ja'asico'ob u yóolo'ob yéetel u dzáico'ob sajaquil ti'ob u ti'al ca u ch'a'ob le caajo'.

¹⁹J t'aanajo'ob ti' u Junab Ku Jerusalén je'el bix u t'aano'ob ti' u kuob u láak múuch' caajo'ob, le cu beeta'alo'ob tumen wíinico'obo'.

²⁰Tu yo'olal le ba'axo'ob cu yúuchula', le ajaw Ezequías yéetel aj bóobat Isaías u paal Amoze', j payalchi'inajo'ob u ti'al u káatico'ob yáantaj le ca'ano'.

²¹Yuumtzil túune', tu túuxtaj jun túul u aj túuchi' u ti'al xu'ulsic le aj ba'atelo'obo', u nuuquil le aj ba'atelo'obo', yéetel u aj nu'ucbesajilo'ob u cúuchilo'ob u je'elel u aj ba'atelo'ob u ajawil Asiriao', ca j suunaj tu múuch' caaj chuup yéetel sublaquil. Le ca j ooc tu kulnaj u beetbil kue', ti' j quíimsa'ab tumen u paalalo'obi'.

²²Bey úuchic u to'ocol Ezequías yéetel u cajnáalilo'ob Jerusalén tumen Yuumtzil tu kab Senaquerib, u ajawil Asiria yéetel tu kab u chuucáan u aj p'eeco'obe', ca j dzaab jéedzel ti'ob tu yéetel máaxo'ob cajnáalo'ob tu tzéelo'ob.

²³Ya'ab máaxo'ob túune', tu bisajo'ob ti'ibil óolo'ob Jerusalén u ti'al Yuumtzil, bey xan co'ocoj ba'alo'ob u ti'al Ezequías, u ajawil Judá. Líikbal ti' le kiino', ya'abchaj u péectzilil tu táan u chuucáan múuch' caajo'ob.

²⁴Ti' le kiino', Ezeequíase', j lúub ti' jun p'éel chaket koja'anil; ba'ale' j payalchi'inaj ti' Yuumtzile', ca j núuca'ab ti' tu yéetel jun p'éel máactzil.

²⁵Ba'ale' quex tumen tu kamaj le nojoch utzo', Ezequíase', ma' tu ye'esaj u tziiquil le utzo', ba'ale' j chu'up yéetel ca'anal ichil, let o'olal Yuumtzile' j kuuxilnaj tu yéetel bey xan tu yéetel Judá yéetel Jerusalén.

²⁶Ba'ale', quex tumen ca'analchaj u yiche', Ezequíase', tu t'onquintajubáa tu táan Ku, bey xan tu beetajilo'ob u caajil Jerusalén, let o'olal Yuumtzile', ma' tu jedzaj u p'uja'anil tu yóokolo'ob ca'aliquil cuxa'an Ezequías.

²⁷Ezequíase', yanchaj u nucuch ayikalilo'ob yéetel u tziiquilo'ob, yanchaj ti'e' ya'abcach plata, oro, jadzutz tuunicho'ob, qui'iboc ba'alo'ob, chimalo'ob yéetel tuláacal co'ocoj ba'alo'ob.

²⁸Tu beetaj xan ch'iilo'ob u ti'al u kalic u jejeláasil janalbe'en neeko'ob, vino yéetel aceite, bey xan u cúuchil u kalic u jejeláasil wacaxo'ob yéetel u cúuchil u kalic j tamano'ob.

²⁹Cu dzo'ocole' tu túuxtaj beetbil caajo'ob, yanchaj ya'abcach u wacaxo'ob yéetel u j tamano'ob, tumen dzaab ya'abcach utz ti' tumen Ku.

³⁰Ezequíase', leti' xan j túuxt kalbil tu'ux cu jóokol ja' tu ca'analil u sayabil Gihone', ca tu beetaj u beel caabal tu tzéel u chikin u Caajil David. Ezequíase', jóok ma'alobil tuláacal ba'ax tu dzajubáa u beete.

³¹Ba'ale' le ca j túuchi'ita'ab aj bisaj t'aano'ob tumen Babilonia u ti'al xíimbaltic Ezequías tu yo'olal u káat chi'itico'ob le máactzilo', úuch ti' le múuch' caajo', Kue', tu p'ataj Ezequías tu juunal u ti'al u túuntic bix u tuucul.

³²U dzooc u tzicbalil Ezequías yéetel le meyajo'ob tu beetaj tu yo'olal u yoquesmaj u yóol ti' Kuo', ti' dzíibta'an tu bóobat t'aano'ob aj bóobat Isaías u paal Amoze', bey xan tu dzíibilo'ob u ajawilo'ob Judá tu yéetel Israel.

³³Le ca j quíim Ezequíase', j mu'uc tu asab noj cúuchilil u mucnalil u caajil David. Tuláacal Judá yéetel u cajnáalilo'ob Jerusalén tu dzajo'ob tziiquilo'ob; ca j culaj Manasés u paal tu jalach káanche'.