Read Yucateco 2 Crónicas 35 Bible Online

2 Crónicas 35 - Yucateco bible

2 Crónicas 35

¹Josíase' tu kiinbesaj tu caajil Jerusalén le Táadz Máanbal ti' u nojbe'enil Yuumtzil: tu catorce kiinil u yáax winalil le ja'abo' tu quíimsaj u chan j tamanil le kiinbesajo'.

²Tu beetaj u bin le aj kiino'ob tu cúuchil u meyajo'obo', ca tu ya'alaj ti'ob ca yanac u yóolo'ob u ti'al u meyajo'ob tu kulnaj Yuumtzil.

³Cu dzo'ocole' le j levitaob u aj ca'anbesajo'ob tuláacal Israel jun páaycunano'ob u ti'al le Yuumtzilo', tu ya'alaj ti'ob: Dza'ex le quili'ich ba'asche' tu kulnaj Yuumtzil le j beeta'ab tumen Salomón u paal David u ajawil Israelo'. Ma' bíin a ca'a bise'ex ta queléembale'exi'. Bejela'e', jach dzáaba'ex a meyajte'ex Yuumtzil a Kuex yéetel Israel u caajal Yuumtzil.

⁴Much'aba'ex ta jujun láaktzilile'ex ca a t'oxe'ex u kiinilo'ob a meyaje'ex, je'el bix tu p'ataj dzíibta'anil David u ajawil Israel yéetel Salomón u paal.

⁵P'áatac ich quili'ich naj jun múuch' j levitaob ti' u jujun múuch' u yotochnáalo'ob, tu kaaba' u jujun múuch'ilo'ob u yotochnáalo'ob Israel u láaktzilo'ob.

⁶Quíimse'ex u chan j tamanil le Táadz Máanbalo', utzquint a wanile'ex yéetel nu'ucbese'ex ba'axo'ob kabéet u ti'al ca dzo'ocbesa'ac tumen a láaktzile'ex ba'ax u ya'almaj Yuumtzil ti' Moisés ca beeta'ac.

⁷Cu dzo'ocole' Josíase', tu jóokesaj ba'alche'ob ichil u yaalako'obe', ca tu dzaj ti' le caaj much'ucbal u ti'al u kiinbesico'ob le Táadz Máanbalo': Tu dzáa treinta mil mejen j tamano'ob yéetel mejen j yuuco'ob, bey xan tres mil mejen wacaxo'ob.

⁸U nuuquilo'ob u jalach naj ajawe', tu dzajo'ob xan siibalo'ob tu juunal u yóolo'ob ti' le caajo', ti' le aj kiino'obo' yéetel ti' le j levitaobo'. Hilcías, Zacarías yéetel Jehiel, u nuuquilo'ob u kulnaj Kue', tu kubajo'ob ti' le aj kiino'ob dos mil seicientos ba'alche'ob u ti'al u kiinbesa'al le Táadz Máanbalo', yéetel trecientos mejen wacaxo'ob;

⁹Conanías yéetel u yéet aj meyajo'ob Semanías yéetel Natanael, je'el bixo'ob Hasabías, Jehiel yéetel Josabad u nuuquilo'ob le j levitaobo', tu kubajo'ob cinco mil ba'alche'ob u ti'al u kiinbesa'al le Táadz Máanbalo', bey xan quinientos mejen wacaxo'ob.

¹⁰Bey tumen dzo'oc u láaj chúucpajal u nu'uculo'ob le kiinbesajo', le aj kiino'obo' j bino'ob tu cúuchil u meyajo'ob, le j levitaob xano' tu t'oxajo'ob u kiinil u meyajo'ob je'el bix u ya'almajil le ajawo'.

¹¹Ca j quíimsa'abo'ob túun u ba'alche'ilo'ob le Táadz Máanbalo', tumen ca'aliquil le j levitaob táan u quíimsico'ob le ba'alche'obo', le aj kiino'ob táan u widzico'ob le multuunil kultaj yéetel le ki'ik cu dza'abal ti'ob tumen le j levitaobo'.

¹²Cu dzo'ocole' tu jóokesajo'ob le tzaatz unaj u tóoca'al je'el buca'aj u múuch'ul u láaktzililo'ob le caajo', u ti'al j kubbil ti' Yuumtzil, je'el bix a'ala'anil tu ju'unil u dzíib Moiseso'; cu dzo'ocole' bey xan tu beetajo'ob yéetel le mejen wacaxo'obo'.

¹³Cu dzo'ocole' j ka'abta'ab le ba'alche'ob u ti'al u kiinbesajil le Táadz Máanbal je'el bix a'ala'anilo'; u chuucáan le quili'ich ti'ibil óolalo'obo', j cha'aco'ob ti' cuumo'ob, ti' nucuch cuumo'ob yéetel ti' jáaycab cuumo'obe', ca j t'o'ox séeba'an ichil u cajnáalilo'ob le caajo'.

¹⁴Cu dzo'ocole' le j levitaobo', tu nu'ucbesajo'ob le ba'axo'ob unaj u beetico'obo', bey xan le ba'axo'ob unaj u beeta'al tumen le aj kiino'obo', tumen le aj kiino'ob u ch'i'ibalo'ob Aarono', meyajnajo'ob tac tu yáakabil táan u kubico'ob tóocbil ba'alche'ob yéetel tzaatz. Le t o'olal le j levitaobo', unaj u beetico'ob u meyajo'ob pa'ate' yéetel u meyaj le aj kiino'ob u ch'i'ibalo'ob Aarono'.

¹⁵Ba'ale' le aj kaayo'ob u ch'i'ibalo'ob Asafo', ti' yano'ob xan tu cúuchil u meyajo'ob je'el bix u ya'almjilo'ob David, Asaf, Hemán yéetel Jedutún le aj náay meyajtic le ajawo'. Le aj canan jool najo'obo', ti' xan yano'ob ca'ach tu cúuchilo'obe'; mix jun túul yanchaj u p'atic u cúuchili', tumen u yéet j levitailo'obe', tu nu'ucbesajo'ob le quíimsbil ba'alche'ob unaj u nu'ucbesico'ob leti'obo'.

¹⁶Bey úuchic u nu'ucbesa'al tuláacal u meeyjulilo'ob Yuumtzil ti' le kiin u ti'al u kiinbesa'al le Táadz Máanbal yéetel le tóocbil ba'alche'ob j ku'ublajo'ob tu yóokol u multuunil u kulta'al Yuumtzil je'el bix tu ya'alajil Josías ca beeta'aco'.

¹⁷Le j israelitaob u múuch'majuba'ob ti' le kiino' tu kiinbesajo'ob le Táadz Máanbal yéetel le siete kiino'ob u jaanta'al waaj beeta'an yéetel túumben sacan.

¹⁸mix jun téen kiinbesa'ac ca'ach jun p'éel Táadz Máanbal beyo', líikbal tu kiinilo'ob aj bóobat Samuel; Mix jun túul ti' u ajawilo'ob Israel u kiinbesmaj le Táadz Máanbal je'el bix tu kiinbesajilac Josías yéetel le aj kiino'ob, le j levitaob, u cajnáalilo'ob Israel u cajnáalilo'ob Judá yano'ob te j cúuchilo' yéetel tuláacal u cajnáalilo'ob Jerusalén.

¹⁹Ti' u diesiocho ja'abil u ajawil Josías ca kiinbesa'ab le Táadz Máanbalo'.

²⁰Cu máan kiin dzo'oquili' u yutzquinta'al le kulnaj tumen Josíaso', Necao u ajawil Egiptoe', tu ch'a'aj u tojil u áalcab ja'il Éufrates u ti'al u bin j ba'atelt Carquemis. Jóok u nactáantbil tumen Josías,

²¹ba'ale' Necaoe', tu túuxtaj aj bisaj t'aano'ob a'alic ti': P'at a chi'ichnancuntiquen u ajawil Judá. Ma' teech quin taal in ba'ateltech bejela'e', táan in bin ba'atelt yaanal múuch' caajo'ob cu ba'atelo'ob tin wéetel. Kue', tu ya'alaj ti' teen ca in séebcunt; wa a káat ca xi'ic teech utzile', p'at a pechicabáa ti' Ku tu yo'olal ma' u xu'ulsiquech.

²²Ba'ale' Josíase', ma' j suunaj tu paachi', tu chokajubáa j ba'atel yéetel, ma' tu yóoltaj u táan óolt ba'ax tu ya'alaj Necaoi', tumen bey u káat Ku ca úuchuco'. Bey túuno' j ooc ba'atel tu táax kóom lu'umil Meguido,

²³le máaxo'ob cu ba'atelo'ob yéetel u x p'úunche'obo', tu ch'iinajo'ob ajaw Josías: Le ajaw túuno' tu ya'alaj ti' u nuuquil u aj ba'atelo'ob: ¡Jóokesene'ex waye', tumen jach yaj loobilta'anilen!

²⁴Jóokesa'ab tumen u nuuquil u aj ba'atelo'ob ti' u bolanil u ba'atelo' ca máansa'ab ti' u láak u bolane', ca j bisa'ab Jerusalén tu'ux quíimi. Ca j mu'uc ichil u mucnalo'ob u j máanja'an ch'i'ibalo'ob. Tuláacal u cajnáalilo'ob Judá yéetel Jerusalén okolnaj úuchic u quíimil Josías.

²⁵Jeremíase', tu dzíibtaj jun p'éel jadzutz kaayil quíimil tu Tzicbe'enil. Tac tu kiinil bejela'a' cu ka'ajsa'al Josías yéetel u kaayilo'ob quíimil tumen aj kaayo'ob yéetel x kaayo'obe'. Le kaayo'oba', dzo'oc u suuctal u ka'ayalo'ob Israel, cu dzo'ocole' dzíibta'ano'ob ti' u ju'unilo'ob le kaayo'obo'.

²⁶U dzooc u tzicbalil Josías, yéetel le ocsaj óolal meyajo'ob tu beetaj je'el bix dzíibta'anilo'ob tu ya'almaj t'aan Yuumtzil,

²⁷p'a'ate' yéetel ba'axo'ob tu beetaj tu yáax chuun tac tu dzoocbale', dzíibta'ano'ob tu dzíibil ju'unilo'ob u ajawilo'ob Israel yéetel Judá.