Read Yucateco 2 Crónicas 36 Bible Online

2 Crónicas 36 - Yucateco bible

2 Crónicas 36

¹U cajnáalilo'ob túun le caajo' tu ch'a'aj Joacaz u paal Josíase', ca tu dzáajo'ob ajaw tu jalach káanche' u taata.

²Joacaze' yaan ca'ach veintitrés ja'abo'ob ti' ca j chu'unpaj u ajawil, j méektáana óox p'éel winalo'ob Jerusalén.

³U ajaw Egiptoe', tu lukesaj tu jalach káanche' tu caajil Jerusalene', ca tu beetaj u bo'ota'al páatan ti', tumeno'ob, tres mil trescientos kilos plata, yéetel treinta yéetel óox p'éel kilos oro.

⁴Cu dzo'ocole' u ajawil Egiptoe', tu dzaj Eliaquim u yíidzin Joacaz u ti'al u ajawil Judá yéetel Jerusalene', ca tu kexaj u kaaba'e, ca tu dzaj Joacim u kaaba'inte, tu ch'a'aj Joacaze', ca ti' bisaj Egipto.

⁵Joacime', yaan ca'ach veinticinco ja'abo'ob ti', ajawnaj once ja'abo'ob Jerusalén. Ba'ale' tu beetaj ba'axo'ob kaas tu táan Yuumtzil u Ku.

⁶Nabucodonosor u ajawil Babiloniae', j bin u chuque', le ca tu machaje' tu kaxaj yéetel máascab suum, bronce u ca'aje', ca tu bisaj Babilonia.

⁷Nabucodonosore' tu bisaj Babilonia jun jaatz u nu'uculo'ob u kulnaj Yuumtzile', ca tu dzaj tu kulnajil Babilonia.

⁸U yalab u tzicbalil u kuuxtal Joacim yéetel le p'ecbe'en ba'axo'ob tu beetaje', bey xan tuláacal ba'axo'ob j úuche', dzíibta'ano'ob tu dzíibil ju'unil u ajawilo'ob Israel yéetel Judá. Ca ajawnaj Joaquín u paal tu jalach káanche'.

⁹Joaquine', yaan dieciocho ja'abo'ob ti' ca j chu'unpaj u ajawil, j méektáana ca'a p'éel winal yéetel diez kiino'ob tu caajil Jerusalén. Ba'ale' tu beetaj ba'alo'ob kaastac tu táan Yuumtzil.

¹⁰Ti' u kiinilo'ob u ja'aja'alil le ja'abo', ajaw Nabucodonosore', tu ya'alaj ca bisa'ac Babilonia, pa'ate' yéetel le ba'alo'ob asab co'oj u tojolo'ob yaan tu kulnaj Yuumtzilo', cu dzo'ocole', tu dzaj Sedequías u láaktzil Joaquín u ti'al u beet u ajawil Judá yéetel Jerusalén.

¹¹Sedequíaze', yaan veinte yéetel jun ja'ab ti' ca j chu'unpaj u ajawil, méektáana once ja'abo'ob Jerusalén.

¹²Ba'ale' kaas úuchic u cuxtal tu táan Ku. Ma' j caabalchaj u yóol tu táan aj bóobat Jeremías, le máax j bis u t'aan Yuumtzil ti'ob.

¹³Cu dzo'ocole', j líik u yóol u beetic loob ti' Nabudonosor, quex tumen tu jalach t'antaj tu kaaba' Junab Ku bíin ajawnac yáanal u nu'ucbesaj, tu sen pechajubáa u ti'al ma' u sutkajal u yóol ti' Yuumtzil u Ku Israel.

¹⁴Cu dzo'ocol xane', tuláacal u nuuquilo'ob Judá, u aj kiinilo'ob yéetel le caajo', tu sen p'atajo'ob u yocsaj óolalo'ob, tu beetajo'ob le j p'ecbe'en ba'alo'ob cu beetico'ob le j ma' ocsaj óol caajo'obo', tumen tu manba'alcunto'ob u kulnaj Yuumtzil u yéeymaj u ti'al u quili'ich naj tu caajil Jerusalene'.

¹⁵Yuumtzil, u Ku u máanja'an ch'i'ibalo'obe', mantadz tu túuxtaj u aj bisaj t'aano'ob ka'ajsic u yiiko'ob, tumen leti'e' cu ch'a'ic óotzilil ti' u caajal yéetel u cúuchil u cajtal.

¹⁶Ba'ale' leti'obe' tu che'ejtajo'ob u aj bisaj t'aano'ob Ku, tu culpachquintajo'ob ba'ax a'ala'ab ti'ob, tu p'a'astajo'ob u aj bóobato'ob tac ca tu beetajo'ob u p'u'ujul Yuumtzil ti' u caajal tu yo'olal lelo' j p'áato'ob mina'an utztal ti'ob.

¹⁷Yuumtzil túune', tu beetaj u bin ba'ateltbil tumen u ajawil le Caldeob, tu quíimsaj yéetel máascab tuláacal u j xi'ipalalilo'ob ichil u najilo'ob le kulnajo', ma' tu ch'a'aj óotzilil ti' j xi'ipalal mix ti' x ch'úupalalo'obi', mix ti' nuxibo'ob, mix ti' ma' j muuko'ob. Tuláacalo'ob j ku'ub tu kab tumen Yuumtzil.

¹⁸Tuláacal u nu'uculo'ob u kulnaj Ku, nuuctaco'ob yéetel mejentaco'ob, bey xan u ayikalilo'ob u kulnaj, u ayikalilo'ob le ajaw yéetel u ayikalilo'ob u nuuquilo'ob u jalach naje', tuláacal j bisa'ab tumen u ajawil j caldeob tac Babilonia.

¹⁹Cu dzo'ocole', j tóoca'ab u kulnaj Ku, je'en u tuulumil Jerusalén, j tóoca'ab u jalach najilo'ob yéetel j xu'ulsa'ab tuláacal le ba'axo'ob co'oj u tojolo'obo'.

²⁰Cu dzo'ocole' j bisa'abo'ob Babilonia le máaxo'ob tu jechajo'ob le noj quíimsajo', ca j palitzilta'abo'ob pa'ate' tu yéetel u paalalo'ob tac tu kiinil úuchic u chu'unpajal u méektáan u ajawil le j persaobo'.

²¹U ti'al ca úuchpajac ba'ax tu ya'alaj Junab Ku tu chi' u aj bóobat Jeremías. Bey túuno' le lu'umo'obo', ka'ana'an u qui' je'elel; tumen tu je'elsajubáa tuláacal u kiinilo'ob xúunp'atta'an, tac máanic setenta ja'abo'ob.

²²U ti'al ca béeychajac u t'aan Yuumtzil tu chi' Jeremíase', tu yáax ja'abil u ajawil Ciro u ajawil Persiae', Yuumtzile', tu yocsaj tu pool Ciro ca u ya'al yéetel ca u dzíibt le a'almaj t'aana':

²³Ciro u ajawil Persiae', cu ya'alic beya': Yuumtzil u Junab Kuil ca'ano'obe', dzo'oc u kubic tin kab tuláacal u ajawilo'ob u yóokolcaab, dzo'oc xan u ya'alic ti' teen ca in beet u kulnaj tu caajil Jerusalén, le yaan tu lu'umil Judao'. Bey túuno', je'el máax sijnal tu caajal Yuumtzile', áanta'ac tumen Yuumtzil u Ku, xi'ic te'elo'.