Read Yucateco 2 Crónicas 4 Bible Online

2 Crónicas 4 - Yucateco bible

2 Crónicas 4

¹Salomone' tu beetaj xan u multuunil kultaj Bronce u ca'aj nueve metros u chowaquil, nueve metros u cóochil yéetel can p'éel ca tac táancoch u ca'analil.

²Tu beetaj xan jun p'éel nojoch lacam cáat bronce u ca'aj u ti'al ja'. Wóolis, cu p'isic can p'éel metros ca tac táacoch jun jáal u chi' ti' u láak jun jáal. U ca'ananil ca'ache', ca'a p'éel metros yéetel veinticinco centímetros, u bakpache' trece metros ca tac táancoch.

³Tu yáanal yéetel tu bakpach le lacam cáato', t'oxa'an ca'a tzoolil u jujun múuch'ilo'ob u yoochelo'ob diez wacaxo'ob tu yáamilo'ob cuarenta yéetel cinco centímetros cu núup'ul jun tacáalili' tu bakpach le lacam cáato'.

⁴Le lacam cáato' ajcuna'an tu yóokol doce wacaxo'ob bronce u caajo'ob, óox túul cu paacato'ob j xamani', óox túul cu paacato'ob j noojoli', óox túul cu paacato'ob j lakini' yéetel óox túul cu paacato'ob j chikini'. u jub nejo'obe' ichil cu p'áatalo'ob, leti'ob cuchmajil le lacam cáato'.

⁵U pakilo'ob le lacam cáato' ocho centímetros piimil; u jáal u chi'e', bey u chúuch u lool nicte'e', cu bisic ca'ach sesenta yéetel seis mil litros ja'.

⁶Tu beetaj xan u láak diez lacam cáato'ob u ti'al u yúuchul p'o', ca tu dzaj cinco x no'ojili', yéetel cinco x dzíiquili'. Ti' cu p'o'obol ca'ach tuláacal le nu'uculo'ob cu meyajo'ob ti' le tóocbil ba'alche'o'; ba'ale' le nojoch lacam cáato', u ti'al ca'ach u p'o'ico'ob u kabo'ob yéetel u yooco'ob le aj kiino'obo'.

⁷Tu beetaj xan diez x t'uchub sáaso'ob je'el bix a'ala'ane', ca tu dzáalantaj te j kulnajo', cinco tu dzaj no'ojili', yéetel cinco x dzíiquili.

⁸Cu dzo'ocole' tu beetaj xan diez x táasche'ob, ca tu dzáalantajo'ob te j kulnajo', cinco x no'ojili', yéetel cinco x dzíiquili'. Tu beetaj xan cien nucuch laco'ob oro u ca'ajo'ob.

⁹Tu beetaj xan u bakpakil u táancab le aj kiino'obo', yéetel u noj bakpakil le kulnajo', tu beetaj u jool najilo'obe', ca tu láaj balaj yéetel bronce.

¹⁰Le nojoch lacam cáato' tu dzáa tu x no'oj tzéelil le kulnaj tu tojil j noojolchikin.

¹¹Hirame' tu beetaj xan le cuumo'ob, le x jo'opobo'ob, yéetel le nucuch laco'obo', ca tu láaj dzo'ocbesaj le meyaj tu beetaj ti' Salomón tu kulnaj Kuo'.

¹²Le meyajo'ob tu beetaja' leti'ob le ca'a p'éel ocomo'ob, le ca'a p'éel wóolis p'iicho'ob yaan tu yóokol le ocomo'obo', le ca'a p'éel x kalabo'ob u ti'al u pi'ixil le p'iicho'obo',

¹³le cuatrocientos granadaob dza'ano'ob ca'a tzoolil ti' le x kalabo'ob u ti'al u pi'ixil le ca'a p'éel wóolis p'iicho'ob, yaan tu ca'analil le ocomo'obo';

¹⁴le diez chuuno'ob, le diez lacam cáato'ob cu yactalo'ob tu yóokolo'obo',

¹⁵le nojoch lacam cáat u ti'al ja' yéetel le doce wacaxo'ob yaan tu yáanalo',

¹⁶yéetel tuláacal le cuumo'ob, le x jo'opobo'ob yéetel le x lu'utzubo'obo'. Tuláacal le nu'uculo'ob tu beetaj aj ca'anbesaj Hiran ti' Salomón u ti'al u kulnaj Yuumtzilo', bronce u ca'ajo'ob yúultano'ob.

¹⁷Tu yibláantaj ti' u patabilo'ob sa'am lu'um u ca'ajo'ob tu lu'umil Jordán chúumuc ti' Sucot yéetel saretán.

¹⁸Salomone' tu beetaj sen Ya'abcach nu'uculo'ob bronce u ca'ajo'ob, mix tu tucultaj u beetic u p'i'isil buca'aj u aalil tuláacali'.

¹⁹Salomone' tu túuchi'itaj beetbil xan tuláacal u láak nu'uculo'ob yaan ca'ach tu kulnaj Kuo': Le u multuunil kultaj oro u ca'ajo', le táasche'ob tu'ux cu dza'abal ca'ach le waajo'ob cu jun páaycunta'al u ti'al Yuumtzilo',

²⁰le x t'uchub sáaso'ob beeta'ano' yéetel chéen oro pa'ate' yéetel u sáaso'ob yaan tu táan le sen quili'ich cúuchil, u ti'al t'abbilo'ob je'el bix a'ala'anilo';

²¹u yoochel le loolo'obo', le sáaso'ob yéetel le x nat'abo'obo', láaj beeta'abo'ob tu yéetel chéen oro;

²²le x nat'ab che'obo', le nucuch laco'obo', le x jo'opobo'ob yéetel le x p'uluto'ob láaj beeta'ano'ob xan yéetel chéen oroo', beeta'ab xan yéetel oro u joolil le kulnajo', u jool najilo'ob, ichil, u sen quili'ich najil yéetel u jool najilo'ob le kulnajo'.