Read Yucateco 2 Crónicas 5 Bible Online

2 Crónicas 5 - Yucateco bible

2 Crónicas 5

¹Le ca j dzo'oc tuláacal le meyajo'ob tu túuchi'itaj Salomón beetbil tu kulnaj Yuumtzilo', Salomone' tu yocsaj ichil tuláacal le nu'uculo'ob oro u ca'ajo'ob yéetel plata u ca'ajo'ob jun páaycunta'ano'ob u ti'al Yuumtzil tumen David u taatae', ca tu dzáa tu'ux cu dza'abal u co'ocoj ba'alilo'ob u kulnaj Ku.

²Salomón túune' tu much'quintaj tu caajil Jerusalén tuláacal u nuuquilo'ob Israel, tuláacal u nuuquilo'ob u múuch' cajtalilo'ob j yotochnáalo'ob yéetel u nuuquilo'ob u yotochnáalo'ob le j israelitaobo', u ti'al ca u biso'ob u ba'asche'il u nup t'aan Yuumtzil líikbal Sione' tac tu Caajil David.

³Tu kiinil le quili'ich kiinbesajo', tu siete winalil le ja'abo', j much'laj le ajaw Salomón yéetel tuláacal le j israelitaobo'.

⁴J kuch tuláacal u nuuquilo'ob Israel, ca j ch'a'ab le ba'asche' tumen le j levitaobo'

⁵Ca tu bisajo'ob pa'ate' tu yéetel u noj Paselil u yúuchul much'tal tu yéetel Ku, bey xan tu yéetel tuláacal u quili'ich nu'uculo'ob yaan ichil, suuc u bisa'alo'ob tumen le aj kiino'ob yéetel tumen le j levitaobo'.

⁶Le ajaw Salomón yéetel tuláacal u caajil le j israelitaob j much'lajo'ob tu yicnalo', ti' yano'ob ca'ach tu táan le ba'asche' u ti'al u kubico'ob sen ya'ab u quíimsbil ba'alche'ilo'ob j tamano'ob yéetel wacaxo'ob mina'an u xooquilo'ob.

⁷Cu dzo'ocole' le aj kiino'obo', tu bisajo'ob u ba'asche'il u nup t'aan Yuumtzil ichil le kulnaj, tac te j sen quili'ich najo', ca tu dzajo'ob tu yáanal u xiik le aj xiknalo'obo',

⁸le ti'obe' u xit'majo'ob ca'ach u xiiko'ob tu yóokol le tu'ux yaan le ba'as che'o', u balmajo'ob u yóokol le ba'asche'o' u balmajo'ob xan u x katabilo'obo'.

⁹Ba'ale' le x katabilo'obo', sen chowactaco'ob, cu páajtal u yila'alo'ob líikbal ichil le quili'ich cúuchil, actáan ti' le sen quili'ich cúuchil quex tumen ma' tu páajtal u yila'al paachilo'; bey p'aatlilo'ob tac bejela'o'.

¹⁰Ti' le ba'asche'o', chéen yaan le ca'a p'éel jaajay tuunicho' j dzaab ichil tumen Moisés ca'aliquil ti' yaan tu lu'umil Horebe', lelo' u jaajay tuunichilo'ob le nup t'aan tu beetaj Yuumtzil tu yéetel le israelitaob le ca jóoko'ob Egiptoo'.

¹¹Le aj kiino'obo', jóoko'ob ichil le quili'ich cúuchilo'. Tuláacal le aj kiino'ob yano'ob ca'ach te j cúuchilo', dzo'oquili' u yutzquinticuba'obe', ma' yanchaj u t'oxicuba'ob ti' u kiinil u meyajo'ob je'el bix t'oxa'anil ti'obo'.

¹²tuláacal le j levitaob cu beetico'ob u aj kaayilo'ob, je'el bixo'ob Asaf, Hemán yéetel Jedutún pa'ate' yéetel u paalalo'ob bey xan u chuucáan u láaktzilo'obe', wa'alacbalo'ob ca'ach tu lakin le u multuunil kultajo' u búuquintmajo'ob u nooko'ob lino u ca'ajo'ob. U ch'a'amajo'ob platillo'ob, salteriob yéetel arpaob. Ichilo'obe' yaan ca'ach ciento veinte aj kiino'ob cu jóopsaj paaxo'ob.

¹³Láaj much'lajo'ob túune', ca jo'op' u paaxo'ob yéetel u ka'amcach kaayo'ob táan u dzáico'ob nib óolal ti' Yuumtzil, tu paxajo'ob mejen campanaob, platillo'ob yéetel tuláacal u jejeláasil paaxo'ob ca'aliquil táan u ka'ayal: Qui'iqui' t'ante'ex Yuumtzil, tumen leti'e' utz, tumen mina'an xu'ulul ti' u yaacunaj Ti' le súutuco' u kulnaj Yuumtzile', j chu'up tu yéetel jun p'éel múuyal,

¹⁴tu yo'olal le múuyalo', le aj kiino'obo', ma' p'áato'ob u beeto'ob le kultajo', tumen le kulnajo', j chu'up tu yéetel u nojbe'enil Yuumtzil.