Read Yucateco 2 Crónicas 6 Bible Online

2 Crónicas 6 - Yucateco bible

2 Crónicas 6

¹Salomón túune' tu ya'alaj: Teche' Yuumtzil ta wa'alaj ca'ach ichil éekjoch'e'enil cajacbalech.

²Ba'ale' tene', dzo'oc in beetic jun p'éel kulnaj u ti'al a wantal, jun p'éel cúuchil u ti'al a cajtal mantadz kiino'ob mina'an u xuul.

³Cu dzo'ocole' le ajawo' tu sutajubáa actáan ti' tuláacal le caaj wa'alacbalo', ca tu qui' t'antaj

⁴beya': Qui' t'antbil Yuumtzil, u Junab Ku Israel, dzo'oc u dzo'ocbesic ba'ax tu séeb chi'itaj ti' David in taata, le ca tu ya'alaj ti':

⁵Likbal ti' le kiin tin jóokesaj in caajal Egiptoe', ma' in yéey ca'ach mix jun p'éel caaj ichil tuláacal u ch'i'ibalo'ob Israel u ti'al ca beeta'ac jun p'éel kulnaj u ti'al u yantal in kaaba', mix in yéey ca'ach mix jun túul j xiib u ti'al u nu'ucbese Israel in caajali',

⁶ba'ale' tin yéeyaj Jerusalén u ti'al u cajtal in kaaba', tin yéeyaj David u ti'al ca u méektáant in caajal Israel.

⁷David in taatae' tu yóoltaj ca'ach u beet jun p'éel kulnaj tu nojbe'enil Yuumtzil u Ku Israel.

⁸ba'ale' Yuumtzile' tu ya'alaj ti': Ma'alob a tucultic a beetic in ti'alt jun p'éel kulnaj;

⁹ba'ale' ma' teech bíin beetiqui', bíin beeta'ac tumen le paal bíin yanac ti' techo'. Leti' bíin beetic in ti'al jun p'éel kulnaj.

¹⁰Bey túuno', Yuumtzile' tu dzo'ocbesaj u séeb chi'. Je'el bix u ya'almajile', tene', dzo'oc in dza'abal u jeelint in taata, dzo'oc in cutal tu jalach káanche' Israel, dzo'oc in beetic u kulnaj Yuumtzil u Ku Israel.

¹¹U láak ba'ale' dzo'oc in wocsic ichile', le ba'asche' tu'ux dza'an le nup t'aan u beetmaj Yuumtzil yéetel le j israelitaobo'.

¹²Cu dzo'ocole' Salomone' j yanchaj actáan ti' u multuunil u kulta'al Yuumtzil, tu táan tuláacal u caajil Israele', ca tu tich'aj u kabo'ob.

¹³Ti' yaan ca'ach tu yóokol jun p'éel táasche' bronce u ca'aj, ca'a p'éel metro yéetel veinticinco centímetros chowaquil, ca'a p'éel metro yéetel veinticinco centímetros cóochil yéetel jun p'éel metro treinta yéetel cinco centímetros ca'analil, lela' tu beetaje', ca tu dzáa ca'ach tu chúumuc ti' u táancabil le kulnajo'. Cu dzo'ocole' j xolaj tu táan tuláacal u caajil Israele', ca tu tich'aj u kabo'ob j ca'an,

¹⁴ca tu ka'am a'alaj: Yuumtzil u Junab Ku Israel: Mina'an mix j ca'an, mix j lu'um u láak Ku je'el bixech cu dzo'ocbesic u nup t'aan yéetel cu ye'esic u ch'a'a óotzilil ti' máaxo'ob meyajtic yéetel tu jaajil óolal;

¹⁵dzo'oc a beetic u béeychajal ba'ax ta séeb chi'itaj ti' David in taata, ti' le kiina', dzo'oc a beetic ba'ax ta wa'alaj.

¹⁶Bey túuno', Yuumtzil u Ku Israel, dzo'ocbes ba'ax ta séeb chi'itaj ti' David in taata: le ca ta wa'alaj ma' bíin p'áatac ma' u yantal jun túul u ch'i'ibal u ti'al cutal tu jalach káanche' Israel, wa tumen u paalalo'ob cu canantico'ob u cuxtalo'ob u ti'al ca u dzo'ocbeso'ob a wa'almaj t'aano'ob je'el bix tu dzo'ocbesilac leti'e'.

¹⁷Bey túuno' Yuumtzil u Ku Israel, beet u béeychajal le séeb chi' ta beetaj ti' in taata David a palitzilo'.

¹⁸Ba'ale', ¿jach wa tu jaajil je'el u páajtal u cajtal Ku tu yéetel wíinico'ob way yóokolcaabe'? Wa le ca'an yéetel tuláacal u cóochil ma' tu balic a nojochile', ¡buca'aj túun chichanil a ti'al le kulnaj dzo'oc in beetic techa'!

¹⁹Ba'ale' Yuumtzil in Ku, u'uy in payalchi' yéetel in káat óol; u'uy le káat óol yéetel le payalchi' cu beetic ti' teech a palitzila'.

²⁰Ma' u jáawal a pactic mix yéetel kiin mix yéetel áakab, le kulnaj, u cúuchil tu'ux a wa'almaj a wantala'. Ch'en xinquint le payalchi' cu beetic ti' teech way a palitzila',

²¹ch'enxiquint in káat óol yéetel u káat óol a caajal Israel le quéen payalchi'inaco'on ti' le cúuchila'. Ch'enxiquint ta ca'anil, tu cúuchil tu'ux caja'anech, dzáa to'on a sa'atsaj si'ipil.

²²Le quéen yanac u si'ipil wa máax ti' u láake', ca beeta'ac u jalach t'aan tu yicnal u multuunil u kultaj a kulnaje',

²³ch'en xiquint ta ca'anile', ca a núuque beet ba'ax toj ti' a palitzilo'ob. Dzáa ba'ax cu najmatic le máax yaan u si'ipilo', beet u kamic u jaadzil u kasa'anilo'ob, beet ba'ax toj yéetel máax mina'an u si'ipil, je'el bix cu najmatique'.

²⁴Le quéen pa'abac u muuk a caajal Israel tumen u aj p'eec tu yo'olal u keban ta táane', wa cu ka'ajal u yiik u ti'al u qui'iqui' t'antic a kaaba', bey xan cu payalchi' ti' teech te j kulnaja',

²⁵ch'en xiquint ta ca'anil u payalchi', sa'ates u si'ipil, beet u suut ti' le lu'umo'ob ta dzaj ti'ob yéetel ti' u máanja'an ch'i'ibalo'obe'.

²⁶Le quéen yanac jun p'éel nojkiinil ma' tu káaxal ja' tumen j kebanchaj ti' teech a caajale', wa cu payalchi' ti' teech te j cúuchil, cu qui'iqui' t'antic a kaaba', yéetel cu yutztal u tuucul tumen dzo'oc u bisic u jaadzil u keban,

²⁷ch'en xiquint ta ca'anile', ca a sa'atsej u si'ipil a palitzilo'ob, a caajal Israel, ca'anbes ti'ob le ma'alob bej tu'ux unaj u bino'obo'. Túuchi'it túun u káaxal a ja'il ti' le lu'um ta dzáa u ti'alint a caajalo'.

²⁸Le quéen taalac wi'ijil te j lu'uma', wa le quéen taalac báan quíimil, wa sen kiin u ti'al u tiquincuntic che'ob, wa j báan cuuxumo'ob, sáako'ob, wa u yikelo'ob paakalo'ob; le quéen bakpachta'ac c caajal tumen le aj p'eec u ti'al u ba'ateltic, wa le quéen talac je'el ba'ax loolob óolil wa koja'anile',

²⁹ch'en xiquint túun je'el ba'alac payalchi'il wa je'el ba'alac káat óolil bíin beeta'ac tumen je'el máaxac, wa quex tumen tuláacal a caajal Israele', le quéen a wil u loolob óol yéetel u mukyaj tumen táan u líikesic u kab u ti'al u payalchi' te j kulnaja'. Ch'enxiquint ta ca'anil ti' le cúuchil tu'ux yanecho', ca sa'ates u si'ipil; dzáa ti' u jujun túulil je'el bix cu najmatic u cuxtale', tumen chéen teech a kaj óol ba'ax cu tucultic yéetel bix u pucsi'ikal le j xiibo'.

³⁰

³¹Beyo' bíin u nojbe'eniltecho'ob bey xan bíin u yu'ubaj t'antecho'ob ca'aliquil ti' cajnáalo'ob te j lu'um ta dzáa ti' c máanja'an ch'i'ibalo'obo'.

³²Quex wa jun túul j táanxel lu'umil, ma' sijnal ta caajal, cu taal náanach lu'umil tumen cu yu'ubic u tzicbalil a nojoch kaaba' yéetel a nucuch máactzilo'ob, wa cu taal payalchi' te j kulnaja',

³³ch'en xiquint ta ca'anil te j cúuchil tu'ux caja'anecho', ca a beet ba'ax cu káatic, tu yo'olal u kaj óoltiquech tuláacal yóokolcaab, u ti'al ca u nojbe'eniltecho'ob je'el bix u beetic a caajal Israele', yéetel u ti'al ca u yojéelto'ob cu ch'a'a chi'ita'al a kaaba' ti' le kulnaj dzo'oc in beetic a ti'alto'.

³⁴Le quéen jóokoc a caajal j ba'atel yéetel u aj p'eeco'ob je'el tu'ux bíin a túuchi'ito'obe', wa cu payalchi'ob ti' teech tu tojil le caaj a yéeymaj yéetel tu tojil le kulnaj dzo'oc in beetica',

³⁵ch'en xiquint ta ca'anil u payalchi' yéetel u káat óole', ca a toque.

³⁶Yéetel le quéen kebanchajaco'ob ti' teech tumen mix máac cu p'aatal x ma' kebanile', le quéen u kuuxquintecho'ob u ti'al a kubico'ob ti' le aj p'eec u ti'al ca biso'ob táanxel lu'umil quex náach wa quex naadze',

³⁷wa ti' le lu'um tu'ux bisa'ano'ob cu sut u tuuculo'ob ti' teech u ti'al u káat óolo'ob bey xan cu cáantico'ob dzo'oc u kebantalo'ob yéetel dzo'oc u beetico'ob ba'ax kaase',

³⁸wa cu suut u tuuculo'ob ti' teech tu jaajil u yóolo'ob yéetel chuca'an pucsi'ikal ti' le lu'umo'ob tu'ux bisa'ano'ob, bey xan cu payalchi'ob tu tojil le lu'um ta dzaj ti' u máanja'an ch'i'ibalo'ob yéetel ti' le caaj ta yéeyaj, bey xan ti' le kulnaj dzo'oc in beetica',

³⁹ch'en xiquint u payalchi'ob yéetel u káat óolo'ob ta ca'anil te j cúuchil tu'ux caja'anecho', áanto'ob yéetel sa'ates ti' a caajal u si'ipilo'ob ti' techo'.

⁴⁰In Junab Ku, ch'en xiquint le payalchi'ob cu beeta'alo'ob ti' teech ti' le cúuchila'.

⁴¹Yuumtzil Ku, líiken yéetel u ba'asch'eil a páajtalil, co'oten tu cúuchil a je'elel. Yuumtzil Ku, u búucbesuba'ob yéetel tocsajil a aj kiino'ob, qui'imacchajac u yóolo'ob yéetel utzil a wocsaj óolo'ob.

⁴²Yuumtzil Ku, ma' sublancuntic le ajaw dzo'oc a yéeyico'. Ka'ajac ti' teech a yaabilaj ti' David a palitzil.