Read Yucateco Esdras 1 Bible Online

Esdras 1 - Yucateco bible

Esdras 1

¹Ti' u yáax ja'abil u ajawil Ciro, u ajawil u lu'umil Persiae', u ti'al u dzo'ocpajal ba'ax u ya'almaj Yuumtzil tze'ecta'an tumen Jeremíase', Yuumtzile' tu dzaj tu tuucul Ciro ca u beet u ki'itbesa'al jun p'éel túuchi' t'aan tu ajawil, a'albil wa dzi'ibtbil, le a'almaj t'aana':

²Ciro u j méektáanil Persiae', cu ya'alic: Yuumtzil, u Ku le ca'ano' tu kubaj tin kab tuláacal u ajawilo'ob le lu'uma', dzo'oc xan u ya'alic ti' tene' ca in beet jun p'éel kulnaj tu caajil Jerusalén, tu lu'umil Judá.

³Bey túuno' je'el máaxac ti' te'ex wa tu caajal Yuumtzil sijnale', áanta'ac tumen Ku, xi'ic Jerusalén le yaan tu lu'umil Judae' u ti'al ca u beet u kulnaj Yuumtzil, u Junab Ku Israel, le Ku cajacbal Jerusaleno'.

⁴Bey xan le máaxo'ob ma' j quíimsa'abo'obo' wa u káato'ob jóokol ti' le lu'umo'ob tu'ux caja'ano'obo', ca áanta'ac tumen u yéet caajalo'ob yéetel plata, oro, yéetel ba'axo'ob yaan ti'ob, yéetel wacax, bey xan yéetel siibalo'ob u ti'al u kulnaj Ku tu caajil Jerusalén.

⁵U nojchilo'ob u láaktzililo'ob Judá yéetel Benjamín, u aj kiino'ob yéetel le j levitaobo', tuláacal xan máaxo'ob péecsa'ab u pucsi'ikalo'ob tumen Kue', tu líikbesajuba'ob j bin Jerusalén u ti'al u ca'a líikeso'ob u kulnaj Yuumtzil.

⁶Áanta'abo'ob tumen tuláacal u yéet caajalo'ob, yéetel plata, oro, yéetel nu'uculo'ob, wacax yéetel ba'alo'ob co'ojtac, bey xan tuláacal jejeláas ti'ibil óolalo'ob.

⁷Ajaw Ciro túune' tu kubaj u nu'uculo'ob kulnaj Yuumtzil, jóokesa'ab ca'ach Jerusalén tumen Nabucodonosor u bismaj tu kulnaj beetbil kuob.

⁸Ciroe' tu kubaj tu kab Mitrídates aj canan taakin u ti'al ca su'utuc, leti'e' cu dzo'ocol u xoquique' tu kubaj ti' Sesbasar, u méektáan Judá.

⁹Je'el u xooquil jay p'éel le ba'alo'obo': treinta nucuch laco'ob oro u ca'ajo'ob, mil nucuch laco'ob plata u ca'ajo'ob, veintinueve xotobo'ob,

¹⁰treinta laco'ob oro u ca'ajo'ob, cuatrocientos diez laco'ob plata ma' co'oj u tojoli', yéetel mil u chuca'an ba'alo'ob.

¹¹Tuláacal le ba'alo'ob oro yéetel plata u ca'ajo'obo' cinco mil cuatrocientos. Tuláacal lela' tu bisaj Sesbasar suunajic Jerusalén yéetel le máaxo'ob bisa'abo'ob ca'ach Babiloniao'.