Read Yucateco Esdras 3 Bible Online

Esdras 3 - Yucateco bible

Esdras 3

¹Le ca j máan siete winalo'ob dzo'oc ca'ach u jéedzelo'ob tu caajalo'ob le j israelitaobo', tuláacal u cajtalilo'obe' tu much'ajuba'ob Jerusalén.

²Josué u paal Josadac yéetel u yéet aj kiino'obe', bey xan Zorobabel, u paal Salatiel, pa'ate' yéetel u láaktzilo'obe', tu dzajuba'ob u yutzquinto'ob u multuunil u kulta'al u Ku Israel, u ti'al u kubico'ob yóokole' le quíimsbil ba'alche'ob cu ya'alic u a'almaj t'aan Moisés, u aj meeyjul Ku.

³Tu yutzquintajo'ob ma'alob tumen sajaco'ob ti' u cajnáalilo'ob le lu'umo', sáamsamal ja'atzcab kiin yéetel ocnac kiine', cu kubico'ob yóokole' quíimsbil ba'alche'ob tu tzicbe'enil Yuumtzil.

⁴Tu kiinbesajo'ob xan u kiinil máacano'ob, je'el bix dzíibta'anil ti' le a'almaj t'aano', sáamsamal tan u kubico'ob le láaj tóocbil ba'alche'obo', le buca'aj suuquil u dzáico'ob sáamsamalo',

⁵pa'ate' yéetel le sáamsamal láaj tóocbil ba'alche'ob bey xan u kiinilo'ob túumben uj, le xan u ti'al u quili'ich kiinbesajil Yuumtzilo', bey xan le cu kubic wa máax tu juunal yóol ti' Yuumtzilo'.

⁶Tu yáax kiinil ti' le u siete winalo' tu cáajsajo'ob u kubico'ob laj tóocbil ba'alche'ob ti' Yuumtzil, quex tumen ma' cajsa'ac u yutzquinta'al u kulnaj Yuumtzili'.

⁷Cu dzo'ocole' tu dzajo'ob taakin ti' le j pakbalo'ob yéetel ti' le j póol che'obo', ti' u cajnáalilo'ob Tiro yéetel Sidone' tu dzajo'ob janal, ukul bey xan aceite, u ti'al beyo' ca u biso'ob kuulche'ob tu yóokol ka'anab líikbal Líbano tac Jope, je'el bix tu ya'alaj u dzáic ca'ach Ciro u ajawil Persia.

⁸Zorobabel u paal Salatiel, yéetel Josué, u paal Josadac pa'ate' u yéet aj kiino'ob yéetel le j levitaobo', bey xan tuláacal le j suunajo'ob Jerusalene', tu chunajo'ob u yutzquinto'ob u kulnaj Ku tu ca'a p'éel winalil tu ca'a p'éel ja'abil kuchco'ob Jerusalén, tu p'atajo'ob tu kab le j levitaob yaan maanal veinte ja'abo'ob ti'obo' u nu'uctico'ob le meyajo'.

⁹Josué, u paalal yéetel u sucu'uno'obe' tu much'quintuba'ob yéetel Gadmiel yéetel u paalal, máaxo'ob ca'ach cu taalo'ob ti' u ch'i'ibal Judá, yéetel xan u ch'i'ibalo'ob u paalal yéetel u sucu'uno'ob Henadad levitaob, u ti'al u ca'anbesico'ob le cu meyajo'ob tu kulnaj Junab Ku.

¹⁰Le táan u beeta'al u chuunpakil u kulnaj Yuumtzil tumen le j meyajo'obo', le aj kiino'obo' j wa'alajo'ob yéetel u trompetaobe', u búuquintmajo'ob u jun páaycuntbil nooko'ob. Le j levitaobo' ti' u ch'i'ibalo'ob Asafo' táan u bisico'ob bojolpaxo'ob u ti'al u qui'iqui' t'anto'ob Yuumtzil, je'el bix a'ala'anil tumen David u ajawil Israel.

¹¹jun jaatze', cu kayico'ob qui'iqui' t'aano'ob, u láak jun jaatze' cu núuquico'ob beya': Dza'ex nib óolal ti' Yuumtzil tumen leti'e' utz, tumen u yaabilaj ti' Israele' mina'an u xuul. Tuláacal le caajo' cu yawato'ob ca'ach yéetel qui'imac óolal, táan xan u qui'iqui' t'antico'ob Yuumtzil, tumen dzo'oc u cáajsa'al u ca'a líiksa'al u kulnaj Yuumtzil.

¹²Ya'ab aj kiino'ob, levitaob, yéetel u nuuquilo'ob le láaktzililo'ob nuxibtaco'ob máaxo'ob tu yilajo'ob le yáax kulnajo', táan ca'ach u ka'am okolo'ob, iquil u yilico'ob u cáajsa'al u beeta'al le túumben kulnajo'. Pa'ate' yéetelo'obe' u láako'obe' táan u yawato'ob yéetel qui'imac óolal.

¹³Mix máac cu páajtal u kaj óoltic ichil u yaawtil qui'imac óolal ti' u yokol le máaco'obo', tumen jach ya'ab u yawato'obe' tac náachil cu yu'uba'al u juumbal.