Read Yucateco Esdras 4 Bible Online

Esdras 4 - Yucateco bible

Esdras 4

¹U aj p'eeco'ob Judá yéetel Benjamine', tu yojéeltajo'ob táan u líik utzquinta'al u kulnaj Yuumtzil u Ku Israel,

²j bino'ob u yilo'ob Zorobabel, Josué yéetel u nuuquilo'ob le láaktzililo'ob, ca tu ya'alajo'ob ti'ob: Cha'ex c áantique'ex ti' le pakbalila', tumen to'one' c káatic ántaj ti' a Junab Kuex je'elbix te'exe', t kubaj xan quíimsbil ba'alche' líikbal u kiinilo'ob Esar-hadón, u ajawil Asiria, le máax tu taasajo'on tac waye'.

³Ba'ale' Zorobabel, Josué yéetel u láak u nuuquilo'ob u láaktzililo'ob le j israelitaobo' tu núucajo'ob: Ma' tu páajtal c utzquintic pa'ate' ta wéetele'ex u kulnaj c Ku. Yaan c utzquintic chéen t juunal u ti'al Yuumtzil, u Ku Israel, tumen bey tu ya'almaj t'antil Ciro, u ajawil Persia.

⁴U cajnáalilo'ob le lu'umo' tu pechajuba'ob u beeto'ob u lúubul u yóol u cajnáalilo'ob Judá, ma' tu cha'ajo'ob u meyajo'obi'.

⁵U láak ba'ale' tu dzajo'ob taakin ti' dze'edzec u nuuquilo'ob u aj meyajo'ob le ajawo', u ti'al ma' béeytal le ba'ax cu beetico'obo', tuláacal u kiinilo'ob Ciro u ajawil Persia, tac tu ajawil Darío, u ajawil Persia.

⁶U cáajbalil u ajawil Asueroe', tu beetajo'ob jun p'éel tac poolal tu yóokol u cajnáalilo'ob Judá yéetel Jerusalén.

⁷Tu kiinilo'ob Artajerjes, u ajawil Persiae', Bislam, Mitrídates, Tabeel yéetel u yéet meyajo'obe', dzíibnajo'ob ti' Artajerjes. Le ju'uno' dzíibta'an ca'ach ich arameo, yéetel u sut t'aanil.

⁸Rehum aj méektáan, yéetel Simsai, aj dzíibe' tu dzíibtajo'ob jun p'éel ju'un ti' ajaw Artajerjes tu'ux cu tacquico'ob u pool u cajnáalilo'ob Jerusalén.

⁹Lela' leti' le dzíibil ju'un tu túuxtajo'ob Rehum aj méektáan, Simsai aj dzíib yéetel u yéet u'uyaj tacpoolo'obe', u náacomob yéetel u jalachilo'ob Persia, Erec, Babilonia yéetel Susa, wa Elam, yéetel u yalab le nucuch caajo'ob bisa'abo'ob táanxel lu'umil tumen le noj aj ojel Asnapar ca tu beetaj u cajtalo'ob Samaria yéetel u yalab u múuch' caajilo'ob u chikinil u áalcab ja'il Éufrates: C dzíib ti' ajaw Artajerjes, to'on a aj meyajo'ob cajacbalo'on tu múuch' caajilo'ob tu chikin u yáalcab ja'il Eufratese':

¹²Táan c dzáic u yojéelt a tzicbe'enile', le judiób tu túuxtaj a tzicbe'enilo', dzo'oc u kuchulo'ob Jerusalén táan u líik utzquintico'ob le nojoch j ma' u'uyaj t'aan caajo' yéetel seten kasa'ano'. Dzo'oc u cáajal u beetico'ob u tuulumil yéetel u yutzquintico'ob u chuunpakilo'ob.

¹³c dzic xan u yojéelt a tzicbe'enile', wa cu yutzquinta'al le caaj yéetel cu líiksa'al u tuulumile', le máaco'obo' ma' bíin u yóolto'ob u bo'oto'ob páatano'ob, bey túuno' u ayikalil a tzicbe'enile' yaan u bin u yóotzital.

¹⁴Tumen to'on ti' yano'on ti' u meeyjul a tzicbe'enile', ma' tu páajtal c cha'ic u pa'ajal u subtal a tzicbe'enil beyo'. Le t o'olal táan c túuxtic ti' a tzicbe'enil le dzíibil ju'una',

¹⁵u ti'al ca xakalta'ac ti' u dzíibil ju'unil u máanja'an ch'i'ibalo'ob a tzicbe'enile'. Je'el ba'axac ca ila'ac te j dzíibo' yaan u yilic a tzicbe'enil le noj caaja' j ma' u'uyaj t'aan, sajbe'entzil ti' ajawo'ob bey xan yéetel tuláacal le múuch' caajo'obo', tumen ti' le kiino'ob máanja'ano'obo' tu nu'uctajo'ob ba'atel, tu yo'olal lelo' xu'ulsa'abi.

¹⁶let o'olale' táan dzáic u yojéelt a tzicbe'enil, wa le noj caaj cu yutzquinta'al, cu dzo'ocol u líiksa'al u tuulumile', a Tzicbe'enile' yaan u xu'ulul u beetic u jalachil tu yóokol le lu'um yéetel tu chikin u yáalcab ja'il Éufrates.

¹⁷Ajaw Artajerjes túune' tu núucaj: Ti' Rehum aj méektáan, ti' Simsai aj dzíib, ti' a wéet j lakinnajo'ob cajacbalo'ob Samaria yéetel ti' u yalab u múuch' caajilo'ob u chikin u yáalcab ja'il Éufrates: quin túuxtic ti' te'ex in te'escunaj.

¹⁸Tu yo'olal le dzíibil ju'un ta túuxtaje'ex ti' teno', dzo'oc in wu'uyic u xooquil tumen su'ut ti' jun p'éel t'aan quin na'atic,

¹⁹tin wa'alaj ca xakalt ila'ac. Dzo'oc u yila'al jach jaaj, le caajo' ti' le ja'abo'ob maanalo'obo' líik u ba'atelt le ajawo'obo', ti' cu nu'ucta'al x wo'oquino'ob' yéetel j ma' u'uyaj t'anto'obi',

²⁰yanchaj xan Jerusalén ajawo'ob mu'ukano'ob, tu jalachto'ob u múuch' caajilo'ob tu chikin u áalcab ja'il Éufrates, cu bo'ota'al ca'ach patano'ob ti'ob.

²¹Le t o'olal, a'ale'ex ti' le máaco'obo' ca ch'éenec le meyajo', tac le quéen in wa'ale', wa ma'e', ma' bíin utzquinta'ac le caajo'.

²²Ma' a p'atique'ex chéen beyo' tu yo'olal ma' u ya'abtal le kaas cu páajtal u loobiltic le ajawa'.

²³Le dzíibil ju'un tu túuxtaj ajaw Artajerjese' xo'oc tu táan Rehum, Simsai aj dzíib, yéetel u yéet meyajo'ob, tuláacalo'obe' tu séeblaquil j bino'ob Jerusalén, yéetel u muuko'obe' tu beetajo'ob u p'atico'ob le judíob le meyajo'.

²⁴Bey jáawic u líik utzquinta'al u kulnaj Junab Ku Jerusalén, tac tu ca'a p'éel ja'abil u ajawil Darió tu lu'umil Persia.