Read Yucateco Esdras 5 Bible Online

Esdras 5 - Yucateco bible

Esdras 5

¹Aj bóobato'ob Hageo yéetel Zacarías u paal Ido, tu dzajo'ob u yojéelto'ob ti' u sijnalilo'ob Judá yéetel Jerusalén le péectzilo'ob dzab ti'ob tumen Yuumtzil u Ku Israel.

²Zorobabel túun u paal Salatiel, yéetel Josué, u paal Josadaque', tu ca'a dzajuba'ob meyaj ti' u líik utzquinajil u kulnaj Junab Ku yaan Jerusalén, táan u yáanta'alo'ob tumen u aj bóobato'ob Ku.

³Ba'ale' Tatnai u méektáan u caajilo'ob u chikin u áalcab ja'il Éufrates yéetel Setar-boznai yéetel u yéet nuuquilo'obe', j bino'ob u ya'alo'ob ti'ob: ¿Máax a'al ti' te'ex ca a líik utzquinte'ex le kulnaja', yéetel ca a pixe'ex yéetel che'ob? ¿Bix u kaaba' le máaco'ob cu líik utzquintico'ob le naja'?

⁵Ba'ale' Kue' cu canantic ca'ach le judiób cu nu'ucbesico'ob le meyajo', bey túuno' ma' páatchaj u wa'acunta'al u meeyjulo'obi', tumen yanchaj u pa'ata'al u túuxta'al jun p'éel t'aan ti' Darío yéetel tac quéen ka'amac u núuquil.

⁶Lela' jun p'éel u x ca'a dzíibil ju'unil tu túuxtaj ti' ajaw Darío Tatnai u méektáan u lu'umil u chikin Éufrates, yéetel Setar-boznai yéetel u yéet aj meyajo'ob, le u nuuquil u méektáan u lu'umil u chikin Éufrates,

⁷bey cu ya'alica': C dzíboltic ca yanac tooj óolal yéete utzil yanil, táan c dzáic a wojelte' dzo'oc xíimbaltic u lu'umil Judá, yéetel u kulnaj nojoch Ku, le kulnajo' táan u líik utzquinta'al yéetel nucuch póolbil tuunicho'ob. Bejela'e táan u pixico'ob u pakilo'ob yéetel jaajay póolbil che'ob, séeba'an u meyajo'ob let o'olal seba'an u bíin u dzo'ocol.

⁹T káat chi'itaj ti' le judiób máaxo'ob nu'uctic le meyajo', máax a'al ti'ob ca u líik utzquinto'ob le kulnajo' yéetel ca u tako'ob che' tu pakilo'ob,

¹⁰yéetel bix u kaaba'ob ca'ach le máaxo'ob nu'uctic le meyajo', u ti'al c dzíibtic u kaaba'ob ca c a'al ti' a tzicbe'enil.

¹¹Le ti'obe' tu núucajo'ob to'one', cu kultico'ob bin u Kuil ca'an u Kuil xan lu'um, táan xan líik utzquintico'ob bin le kulnaj, yáax beeta'ab tu túulisil tumen jun túul u nojoch ajaw Israel.

¹²Tu ya'alajo'ob xane', u máanja'an ch'i'ibalo'obe' tu beetajo'ob u p'u'ujul u Kuil le ca'ano', le t o'olal j ku'ubo'ob tu kab Nabucodonosor u ajaw u lu'umil Babilonia caldeo ca'achi', le ti'e' tu xiixcuntaj le kulnajo' ca tu bisajo'ob kala'ano'ob Babilonia.

¹³Cu dzo'ocol u máan ja'abo'obe', tu yáax ja'abil u ajawil Ciro Babiloniail, tu ya'alaj ca líik utzquinta'ac u kulnaj Junab Ku.

¹⁴Tu ya'alajo'ob xane', ajaw Ciroe' tu jóokesaj tu kulnajil Babiloniae', le nu'uculo'ob oro yéetel plata tu ch'a'aj Nabucodonosor tu kulnaj Junab Ku tu caajil Jerusalene' ca tu bisaj Babilonia, ca bin tu kubaj ti' jun túul máac cu kaaba'intic Sesbasar, máax tu dzaj u ti'al ca u méektáant le lu'umo'.

¹⁵Ciroe' tu ya'alaj ti' Sesbasar ca u mol tuláacal le nu'uculo'obo' ca u sut tu kulnaj Junab Ku tu caajil Jerusalén, bey xan ca u líik utzquint tu'ux yaan ca'ach u kulnaj Junab Ku.

¹⁶Bey úuchic u kuchul Sesbasar ca tu dzaj u chun pakilo'ob u kulnaj Junab Ku tu caajil Jerusalén; bey chu'unpajic túun u lik utzquinta'al, ba'ale' ma' dzo'ocoqui'.

¹⁷Ba'ale' wa utz u yilic túun a tzicbe'enile', c káatic ca caxta'ac tu úuchben dzíibilo'ob u ajawilo'ob Babiloniae', ca ila'ac wa jaaj ajaw Ciroe' tu ya'alaj ca líik utzquinta'ac u kulnaj Junab Ku tu caajil Jerusalén, bey xan ca dza'abac ojéelt ba'ax cu tuclic a tzicbe'enil tu yo'olal tuláacal le ba'alo'oba'.