Read Yucateco Esdras 6 Bible Online

Esdras 6 - Yucateco bible

Esdras 6

¹Ajaw Darío túune', tu ya'alaj ca caxta'ac le ju'uno', tu'ux cu ta'aca'al u dzíibil ju'unilo'ob sen yaan u biilalo'ob Babiloniae';

²ti' le jalach naj Ec-batana yaan tu lu'umil Mediao', caxta'ab jun p'éel dzíibil ju'un cu ya'alique':

³Tu yáax ja'abil u ajawil, ajaw Ciroe' tu dzáa le t'aana': Wa tu yo'olal u kulnaj Junab Ku yaan Jerusalene': Dza'abac u chun pakilo'ob, ca líik utzquinta'ac u najil, u ti'al ca ku'ubuc te'elo' quíimsbil ba'alche'ob. U naj u yantal veintisiete metros ca'analil yéetel veintisiete metros u cóochil;

⁴bey xan óox p'éel u tzoolol póolbil tuunich, u láake' beeta'an yéetel túumben che'. ti' u taakin ajawe' bíin bo'ota'ac.

⁵Wa tu yo'olal u nu'uculo'ob oro yéetel plata tu jo'oksaj Nabucodonosor tu kulnaj Junab Ku tu caajil Jerusalén ca tu taasaj Babiloniae', ca su'utuc u ti'al bisbil Jerusalén, u ti'al ca dza'abac tu cúuchil, tu kulnaj Junab Ku.

⁶Ajaw Darío túune' tu ya'alaj ti' Tatnai, u méektáan u chikin u lu'umil u yáalcab ja'il Éufrates, yéetel ti' Setar-boznai yéetel u yéet nojchil le lu'umo': Náachcunsaba'ex tu caajil Jerusalén

⁷p'ate'ex ca líik utzquinta'ac u kulnaj Junan Ku tu cúuchil tumen u méektáan le j judíob yéetel xan le máaxo'ob ilic le meyajo'.

⁸Quin wa'alic xan bix bíin a wáantique'ex le judiób u ti'al ca u líik utzquinto'ob u kulnaj Junab Ku: yéetel u taakinil le patan cu dza'abal ti' ajaw tu lu'umil u chikin u ja'il Éufrates, ma' u máan kiin u bo'ota'al le meyaj cu beeta'alo', tu yo'olal ma' u jáawal u meeyajo'.

⁹Sáamsamal xane' ca ku'ubuc ti' le aj kiino'ob caja'ano'ob Jerusalene', je'el bix bíin u ya'alo'obe', tuláacal le buca'aj kabéet ti'obe', wa túun mejen wacaxo'ob, wa mejen j tamano'ob u ti'al láaj tóocbil ba'alche'ob ti' u Kuil ca'an; wa trigo, ta'ab, vino wa aceite,

¹⁰u ti'al u kubico'ob qui'iboc quíimsbil ba'alche'ob ti' u Kuil ca'an, yéetel xan ca káat óolnaco'ob tu yo'olal u cuxtal le ajawo' yéetel tu yo'olal u paalal.

¹¹Quin túuchi' t'antic xane', wa yaan máax ma' tu dzo'ocbesic le t'aana', ca luksa'ac jun p'éel u che'il u yotoch cu ka'axal ti' le che'o' cu u ja'adzale' ca ju'utul u yotoch.

¹²¡Ku máax tu yéeyaj Jerusalén u ti'al u cajtal u kaaba'e', ca u xu'uls je'el máaxac ajawe', wa je'el ba'alac múuch' caajil wa ca táabac kascunt wa ca u wa ba'ax ti' u kulnaj Yuumtzil yaan Jerusaleno'! Ten Darío quin dzáic le t'aana'. Dzo'ocbesa'ac jach je'el bix dzíibta'anile'.

¹³Tatnai, u méektáan u lu'umil u chikin u yáalcab ja'il Éufrates, yéetel Setar-boznai yéetel u yéet nuuquile', tu beetajo'ob je'el bix tu ya'alaj u dzíibil ju'unil ajaw Daríoe'.

¹⁴Bey túuno' le judíob cu nu'uctico'ob le meyajo'ob páatji' u líik utzquintico'ob je'el bix tu ya'alaj ca'ach aj bóobato'ob Hageo yéetel Zacarías, u paal Ido. Le meyajo' dzo'ocbesa'ab je'el bix tu tzol t'antilac u Ku Israel, bey xan je'el bix tu ya'alajilac Ciro, Darío yéetel Artajerjes, u ajawo'ob Persia.

¹⁵Le j israelitaob, le j levitaob, le aj kiino'ob yéetel tuláacal le máaxo'ob j bisa'abo'ob táanxel lu'umilo', cu kiinbesico'ob ca'ach yéetel qui'imac óolal u jun páycunajil u kulnaj Junab Ku.

¹⁶Le j israelitaob, aj kiino'ob, j levitaob yéetel tuláacal le j bisa'abo'ob táanxel lu'ume', tu kiinbesajo'ob yéetel qui'imac óolal u ku'ubul u kulnaj Junab Ku.

¹⁷Ti' le kiinaco' tu kubajo'ob quíimsbil ba'alche'ilo'obe' cien mejen wacaxo'ob, doscientos j tamano'ob, yéetel cuatrocientos mejen j tamano'ob bey xan doce j yuuco'ob, jun túul tu yo'olal jujun p'éel u múuch' cajtalilo'ob u láaktzililo'ob le israelitaobo', bey u ti'ibil óolalil tu yo'olal u keban tuláacal Israel.

¹⁸Cu dzo'ocole' ca j t'oox ti' le aj kiino'obo' u kiinilo'ob u meyajo'ob, le j levitaobo' j dzaabo'ob tu cúuchilo'ob, u ti'al u kultajil Junab Ku Jerusalén, je'el bix dzíibta'an tu dzíibil ju'unil Moisese'.

¹⁹Le máaxo'ob bisa'abo'ob ca'ach táanxel lu'ume' le j suunajo'obe' tu beetajo'ob u kiinbesajil táadz Máanbal tu kiinil catorce tu yáax winalil.

²⁰Le aj kiino'ob yéetel le j levitaobo', tu yutzquintaj yanilo'ob je'el bix u ya'alic u tzol t'aanil le kultajo', beyo' tuláacalo'obe' utz yanilo'ob. Ca tu kubajo'ob túun u quíimsbil ba'alche'ilo'ob Táadz Máanbal tu yo'olal tuláacal le j bisa'abo'ob ca'ach táanxel lu'umilo', tu yo'olal u yéet aj kiino'ob, bey xan tu yo'olalo'ob.

²¹Tuláacal le j israelitaob bisa'abo'ob táanxel lu'umile' táacpajo'ob tu janlil le Táadz Máanbalo', pa'ate' yéetel le máaxo'ob dzo'oc u p'áatico'ob u kaakas cuxtal le u lu'umo'ob le j ma' ocsaj óolo'obo', ca tu nupajuba'ob ti' u kultajil Yuumtzil, u Ku Israel.

²²Siete kiino'ob tu kiinbesajo'ob yéetel qui'imac óolal, u kiinbesajil le waajo'ob x ma' levadurao', tumen Yuumtzile' tu dzaj qui'imac óolal, tu yo'olal tu péecsaj u pucsi'ikal u ajawil Persia u ti'al u beetic utz ti'ob yéetel u yáantico'ob u ti'al yutzquinajil u kulnaj Junab Ku, u Ku Israel.