Read Yucateco Esdras 7 Bible Online

Esdras 7 - Yucateco bible

Esdras 7

¹Cu dzo'ocol u máan kiine', ichil u ajawil Artajerjes, u ajawil Persiae', yanchaj jun túul máac tu kaaba'intaj ca'ach Esdras, u taatae' jach ti' u taal ti' u ch'i'ilancabo'ob Seraías, Azarías, Hilcías,

²Salum, Sadoc, Ahiraías,

³Amarías, Azarías, Meraiot,

⁴Zeraías, Uzi, Buqui,

⁵Abisúa, Finees, Eleazar yéetel Aarón, le yáax aj kiino'.

⁶Esdras ca'ache' jun túul aj ca'anbesaj canbalnaja'an ti' le a'almaj t'aan tu dzaj Yuumtzil, u Ku Israel ti' Moisés, cu xooc xan yéetel u yáantaj Yuumtzil, tu yo'olal lelo' ajaw Artajerjes tu dzaj ti'e' tuláacal ba'ax tu káataj. Bey úuchic u jóokol Esdras Babiloniao',

⁷ca j suunaj Jerusalén tu siete ja'abil u ajawil Artajerjes yéetel jun múuch' israelitaob, ichilo'obe' yaan ca'ach aj kiino'ob, j levitaob, aj kaayo'ob, aj canan jool najo'ob yéetel u meeyjulo'ob kulnaj.

⁸Yéetel u yáantaj Kue' Esdrase' jóok Babilonia tu yáax kiinil u yáax winalil tu siete ja'abo'ob u ajawil Artajerjes, ca j kuch Jerusalén tu yáax kiinil u cinco winalil láili' ti' le ja'abo'.

¹⁰Esdrase' u jedzmaj tu tuucul u dzáicubáa u xoc u ya'almaj t'aan Yuumtzil yéetel u dzo'ocbesic, bey xan u ca'ansic ti' le j israelitaob u ya'almaj t'aanilo'ob, yéetel u ca'ansajilo'ob.

¹¹Lela' leti' u x ca'a walak dzíibil ju'unil tu dzaj ajaw Artajerjes ti' Esdras, aj kiin, aj ca'anbesaj canbalnaja'an, ti' u nu'ucbe'en t'aano'ob yéetel ti' u ya'almaj t'aano'ob Yuumtzil, u ti'al Israel:

¹²Noj ajaw Artajerjese' cu te'escuntic Esdrás, aj kiin yéetel aj ca'anbesaj canbalnaja'an ti' u ya'almaj t'aan u Kuil ca'an.

¹³Dzo'oc in wa'alic ti' tuláacal le israelitaob yaan tin ajawile' wa u káato'ob j suut Jerusalén ta wéetele', je'el u páajtal u beetico'obe' mixba'al ti' wa levita wa aj kiin.

¹⁴Tumen le ajaw yéetel u siete aj tzol xiquino'obo', cu túuxtiquecho'ob a xakalt il bix u cuxtal Judá yéetel Jerusalén, wa bey cu ya'alic u ya'almaj t'aan a Ku, le u dzaamaj ta kabo'.

¹⁵Bis le plata yéetel le oro cu síijil tu pucsi'ikal u dzáico'ob ajaw yéetel u tzol xiquino'ob ti' u Ku Israel, cajacbal Jerusalén,

¹⁶yéetel tuláacal le oro bey le plata ca páatchajac a kamic tu múuch' caajilo'ob Babilonia, yéetel le siibalo'ob cu síijil tu pucsi'ikal le cajnáalo'ob yéetel le aj kiino'ob u kubico'ob u ti'al u kulnaj Junab Ku yaan Jerusaleno'.

¹⁷Yéetel le taakino' u najmal a manic mejen wacaxo'ob, j tamano'ob, yéetel mejen j tamano'ob, pa'ate' yéetel u ti'ibil óolalil janalbe'en neeko'ob yéetel vino, u ti'al a kubic tu yóokol u multuunil kultaj tu kulnaj a Junab Kuex yaan Jerusalén.

¹⁸Wa tu yo'olal u yalab le oro yéetel le platao', teech yéetel a wéet caajalo'obo' beete'ex je'el ba'axac ca tucultique'ex u asab ma'alobile', je'el bix u káat Kue'.

¹⁹Ba'ale' le nu'uculo'ob dzo'oc u ku'ubul ti' teech u ti'al u kultajil u kulnaj a Junab Kuo', teech bíin a kub ti' u Kuil Jerusalén.

²⁰Je'el ba'axac kabéet u najmal a kubic tu kulnaj a Junab Kue', cu páajtal a káatic tu ajaw najil ta'acunbil ba'alo'ob.

²¹Teen ajaw Artajerjes quin wa'alic ti' tuláacal u aj canan taakino'ob yano'ob tu chikin u áalcab ja'il Éufrates, ma' u tu'ubul u kubico'ob ti' Esdras aj kiin, aj ca'anbesaj xan, canbalnaja'an ti' u ya'almaj t'aan u Kuil ca'an, tuláacal ba'ax bíin u káate'.

²²Tac tres mil trescientos kilos plata, veintidós mil litros trigo, dos mil doscientos litros vino, dos mil doscientos litros aceite yéetel je'el buca'aj ta'ab u káate'.

²³Tuláacal ba'ax ca u káat u Kuil ca'an u ti'al u kulnaje', unajmal u ku'ubul tu séeblaquil, u ti'al ma' u taal mix jun p'éel jadz yóokol u paalal ajaw yéetel tu yóokol u ajawil.

²⁴Unaj xan a wojeltique'ex ti' mix jun túul ti' le aj kiino'ob, mix ti' le j levitaob, mix ti' aj kaayo'ob, mix ti' aj canano'ob, mix ti' u aj meeyjulo'ob kulnaj, wa u láak máaco'ob cu meyajo'ob tu kulnaj Junab Ku bíin tza'abac patan mix bo'olalo'ob tu yo'olal máano'ob wa tu yo'olal conolo'ob.

²⁵Wa ta wo'olale' Esdras, yéetel le na'at dza'an ti' teech tumen a Kuo', dzáa a aj p'is o'olo'ob yéetel jalach wíinico'ob ca u beeto'ob toj p'is óol ti' u cajnáalilo'ob le lu'um yaan tu chikin u áalcab ja'il Éufrates, tuláacal tu'ux kaj óolta'an u ya'almaj t'aan a Ku; máaxo'ob ma' u kaj óolo'obe', ca'anbes ti'ob.

²⁶Tuláacal le máax ma' tu dzo'ocbesic u ya'almaj t'aan a Kue', yéetel u t'aan ajawe' xot kinta'ac u ti'al j quíimil, wa tojolch'inta'ac táanxel lu'umil, wa u bo'ot jun p'éel nojoch taakin, wa bisa'ac kalbil.

²⁷Esdras túune' payalch'inaj beya': Qui'iqui' t'anta'ac Yuumtzil, u Ku in taata yéetel in maama, tumen tu dzaj tu yóol ajaw u tziiquiltic u kulnaj Yuumtzil tu caajil Jerusalén,

²⁸bey xan tumen tu ye'esaj ti' téen u yutzil tu táan ajaw, u aj tzol xiquino'ob yéetel xan u nuuctaquilo'ob le jalach najo', tu líikesaj xan in wóol, tumen yéetel u yáantaje' páatchaj in much'quintic u nuuquilo'ob Israelitaob u ti'al ca suunaco'ob tin wéetel.