Read Yucateco Esdras 8 Bible Online

Esdras 8 - Yucateco bible

Esdras 8

¹Lela' leti' u kaaba'ob u nuuquilo'ob le láaktzililo'ob, dzíibta'an tu jujun túulil, tu kiinilo'ob u ajawil Artajerjes máaxo'ob jóoko'ob Babilonia yéetel Esdras:

²Ti' u ch'i'ibal Fineese', Gersón; ti' u ch'i'ibal Itamare', Daniel; ti' u ch'i'ibal Davide', Hatús u paal Secanías; ti' u ch'i'ibal Parose', Zacarías, láakinta'an tumen ciento cincuenta j xiibo'ob dzíibta'an u kaaba'ob te ju'uno';

⁴Ti' u ch'i'ibal Pahat-moab, Elioenai, u paal Zeraías láakinta'an tumen doscientos j xiibo'ob;

⁵Ti' u ch'i'ibal Zatue', Secanías, u paal Jahaziel láakinta'an tumen trescientos j xiibo'ob;

⁶ti' u ch'i'ibal Adine', Ebed, u paal Jonatán, láakinta'an tumen cincuenta j xiibo'ob;

⁷ti' u ch'i'ibal Elame', Jesaías, u paal Atalías, láakinta'an tumen setenta j xiibo'ob;

⁸ti' u ch'i'ibal Sefatíase', Zebadías, u paal Micael, láakinta'an tumen ochenta j xiibo'ob;

⁹ti' u ch'i'ibal Joabe', Obadías u paal Jehiel, láakinta'an tumen doscientos dieciocho j xiibo'ob;

¹⁰ti' u ch'i'ibal Banie', Selomit, u paal Josifías, láakinta'an tumen ciento sesenta j xiibo'ob;

¹¹Ti' u ch'i'ibal Bebaie', Zacarías, u paal Bebai, láakinta'an tumen veintiocho j xiibo'ob

¹²Ti' u ch'i'ibal Azgade', Johanán, u paal Hacatán, láakinta'an tumen ciento diez j xiibo'ob;

¹³Ti' u xuul u ch'i'ibal Adonicame', Elifelet, Jeiel yéetel Semaías, láakinta'an tumen sesenta j xiibo'ob máaxo'ob j suunajo'ob cu máan kiin.

¹⁴Ti' u ch'i'ibal bigvai, Utai, yéetel Zabud, láakinta'ano'ob tumen setenta máaco'ob.

¹⁵Teen Esdrase', tin much'quintajo'ob tu jáal u beecanil le ja' cu bin jóokol tu áalcab ja'il Ahava, ca je'elo'on te'elo' óox p'éel kiin. Le ca tin xocaj le máaco'ob yéetel le aj kiino'obo', ma' tin wilaj mix jun túul j levitaobi'.

¹⁶Le beetic tin túuxtaj Eliezer, Ariel, Semaías, Elnatán, Jarib, Elnatán, Natán, Zacarías yéetel Mesulam máaxo'ob aj nu'uctajo'ob, yéetel xan le aj ca'anbesajo'ob Joiarib yéetel Elnatán,

¹⁷yéetel u t'aanil u bino'ob u xíimbalto'ob Ido, u náacom le cúuchil cu kaaba'intic Casifia, ca tin wa'alaj ti'ob tuláacal ba'ax bíin u ya'alo'ob ti' Ido yéetel u yéet nuuquilo'ob, u aj meeyjulo'ob yano'ob ca'ach Casifiae', u ti'al u taasico'ob máaco'ob u ti'al u yáantico'on tu kulnaj c Ku.

¹⁸C dzáic xan nib óolal ti' Ku, tumen tu taasajo'ob Serebías, jun túul aj nu'uc, ti' u ch'i'ibal jun túul j levita cu kaaba'intic Mahli, pa'ate' yéetel u paalal yéetel u sucu'uno'obe', tuláacalo'obe' dieciocho'ob.

¹⁹Taasa'ab xan Hasabías yéetel Jesaías, u ch'i'ibalo'ob Merari', pa'ate' yéetel u paalal yéetel u sucu'uno'ob veinte máaco'ob.

²⁰Le u aj meeyjulo'ob le kulnaj dzaabo'ob tumen David yéetel tumen le u nuuquilo'ob u aj meyajo'ob le j levitaobo', yaan ca'ach doscientos veinte'ob, tuláacal j dzaabo'ob je'el bix u kaaba'obe'.

²¹Cu dzo'ocole' tin wa'alaj ca beeta'ac jun p'éel su'ukin naadz ti' u yáalcab ja'il Ahava, u ti'al c kaj óoltic c kebano'ob tu táan Ku, u ti'al c káatic ti' ca u biso'on yéetel utzil, pa'ate' yéetel c láaktzililo'ob yéetel ba'ax yaan to'on.

²²Tumen tin ch'a'aj subtal in káatic ti' ajaw, j nat' tzíimino'ob u ti'al ba'atel ca u cananto'ono'ob te j bejo' ti' c aj p'eeco'ob, tumen dzo'oc a'alic ti' ajawe', Kue' cu canantic le máaxo'ob caxtique', ba'ale' cu láalic u p'u'ujul tu yóokol tuláacal máaxo'ob xúunp'ajtic.

²³Bey túuno' su'ukinajo'on yéetel payalchi'inajo'on ti' Ku tu yo'olal le ba'alo'oba', Leti'e' tu núucaj c payalchi'.

²⁴Cu dzo'ocole' ca tin jóokesaj doce u nuuquil aj kiino'ob: Serebías, Hasabías yéetel diez u yéet aj kiino'ob,

²⁵cu dzo'ocol in p'isic plata, yéetel oroe', yéetel mejen nu'uculo'ob tu kubajo'ob bey ti'ibil óolal u ti'al u kulnaj c Ku le ajawo', u aj tzol xiquino'ob, yéetel u nuuquilo'ob, yéetel tuláacal le israelitaob yano'ob te'elo'.

²⁶tin p'isaj ca tin kubaj veintiun mil cuatrocientos cincuenta kilos plata, cien nu'uculo'ob plata u ca'ajo'ob yéetel tres mil trescientos kilos oro;

²⁷yéetel veinte luucho'ob oro u ca'ajo'ob, ocho kilos u aalil, yéetel u nu'uculo'ob bronce u ca'ajo'ob yúulta'an ma'alob co'ojtaco'ob bey oroe'.

²⁸Cu dzo'ocole' tin wa'alaj ti'ob: Te'exe' jun páaycunta'ane'ex u ti'al Yuumtzil je'el bix le nu'uculo'obo'. Le platao', le oro u ti'al u Ku c taataob yéetel c na'ob.

²⁹Utzil canante'ex tac quéen p'i'isic tu táan u nuuquilo'ob aj kiino'ob levitaobo', yéetel u nuuquilo'ob u láaktzililo'ob Israel, tu káasabo'ob u kulnaj Yuumtzil Jerusalén.

³⁰Le aj kiino'ob yéetel le j levitaob túuno', tu kamajo'ob le plata le oro, yéetel le nu'uculo'ob dzo'oc ca'ach u p'i'isilo', ca tu bisajo'ob Jerusalén tu kulnaj Junab Ku.

³¹Tu kiinil doce u yáax winalil lukuco'on tu jáal u yáalcab ja'il Ahava u ti'al c binbal Jerusalén, c Kue' tu yáanto'on, ca tu toco'on ti' c aj p'eeco'ob yéetel ti' máanalbe'en máaco'ob te j bejo'.

³²Le ca j kucho'on Jerusalene' je'elo'on óox p'éel kiin,

³³tu can p'éel kiine' j p'i'is le platao' le oro, yéetel le nu'uculo'ob tu kulnaj c Ku, ca j ku'ub tuláacal ti' aj kiin Meremot, u paal Urías. Ti' yaan xan ca'ach Eleazar, u paal Finees, bey xan le j levitaob Jozabad, u paal Josué yéetel Noadías, u paal Binuy.

³⁴Láili' le ti' kiino' j p'i'ise' j xo'oc tuláacal ca j dzíibta'ab buca'aj.

³⁵Cu dzo'ocole' le j bisa'abo'ob ca'ach j táanxel lu'umo', tu kubajo'ob u ti'al le láaj tóocbil ba'alche'o' ti' u Ku Israel, yéetel tu kaaba' tuláacal le j israelitaobo', doce mejen wacax, noventa yéetel seis j tamano'ob, setenta yéetel siete mejen j tamano'ob yéetel doce j yuuco'ob u ti'al u ti'ibil óolal keban. Tuláacal u ti'al láaj tóocbil ti' u tzicbe'enil Yuumtzil.

³⁶Cu dzo'ocole' tu kubajo'ob u dzíibil ju'un le ajaw ti' le u j méektáano'ob le ajawilo', yéetel ti' u méektáano'ob le lu'um yaan tu chikin u áalcab ja'il Éufrates, máaxo'ob tu yáantajo'ob le caajo' yéetel le u kulnaj Junab Kuo'.