Read Yucateco Nehemías 11 Bible Online

Nehemías 11 - Yucateco bible

Nehemías 11

¹U méektáano'ob le lu'umo', cajlajo'ob Jerusalén; u yalab le caajo' tu beetajo'ob jun p'éel buul, u ti'al u yila'al máaxo'ob bíin xi'ico'ob cajtal Jerusalén, le quili'ich caajo', ti' diez u múuch'ul láaktzilo'obe', jun múuch' bíin cajlaqui', le u láak nueveo' cu p'áatalo'ob cajtal ti' u mejen caajilo'ob,

²cu dzo'ocole', le caajo' tu qui' t'antaj tuláacal le máaxo'ob tu yóoltajo'ob bin cajtal Jerusalén.

³Tu paacho'obe' u kaaba'ob u nucuch chuun najilo'ob le suunajo'ob tu lu'umo'ob; ca j p'áato'ob cajtal Jerusalén. Tu noj caajilo'ob Judae' cajlajo'ob le j israelitaob, le aj kiino'ob, le j levitaob, u aj meeyjulo'ob le kulnajo', yéetel u ch'i'ibal u aj meyajo'ob Salomón, jujun túule' tu caajal yéetel tu lu'um.

⁴Dze'edzec judailo'ob yéetel Benjaminilo'ob cajlajo'ob Jerusalén, ti' u ch'i'ibal Judae'; Ataías u paal ca'ach Uzías, u paal Amarías, u paal Sefatías, u paal Mahalaleel, u ch'i'ibal Fares;

⁵yéetel Maasías, u paal Baruc, u paal Colhoze, u paal Hazaías, u paal Adías, u paal Joiarib, u paal Zacarías, u paal Siloni.

⁶Tuláacal u ch'i'ibal Fares j p'áato'ob cajtal Jerusalén cuatrocientos sesenta yéetel ocho, tuláacalo'obe' j xiibo'ob aj ba'atelo'ob.

⁷Ti' u ch'i'ibal Benjamine': Salú, u paal Mesulam, u paal Joed, u paal Pedaías, u paal Colaías, u paal Maasías, u paal Itiel, u paal Jesaías;

⁸yéetel u sucu'uno'ob Gabai, yéetel Salai. Tuláacale' novecientos veintiocho.

⁹U nojchile' Joel, u paal Zicri; yéetel Judá, u paal Senúa, leti' xan u ca'a túul nácom le noj caajo'.

¹⁰Ti' aj kiino'obe': Jedaías, u paal Joiarib, Jaquín,

¹¹yéetel Seraías, u paal Hilcías, u paal Mesulam, u paal Sadoc, u paal Meraiot, u paal Ahitob, u nojchil u kulnaj Junab Ku.

¹²Bey xan u yéet meyajo'ob kulnaj, lelo'oba' ochocientos veintidós ca'achi; yéetel Adaías, u paal Jeroham, u paal Pelalías, u paal Amsi, u paal Zacarías, u paal Pasur, u paal Malquías.

¹³U láaktzilo'ob u nuuquilo'ob le j láaktzililo'ob, tuláacalo'obe' doscientos cuarenta yéetel ca'a p'éel; yéetel Amasai, u paal Azareel, u paal Azai, u paal Mesilemot, u paal Imer.

¹⁴U láaktzilo'obe', aj ba'atelo'ob ca'achi, tu pa'ate'ilo'obe' ciento veitiocho j xiibo'ob, u nácomo'ob ca'achi Zabdiel, u paal Gedolim.

¹⁵Ti' le j levitaob: Semaías, u paal Hasub, u paal Azricam, u paal Hasabías, u paal Buni;

¹⁶Sabetai, yéetel Jozabad u nuuquilo'ob ca'ach le levitaob, cu yilico'ob meyajo'ob tu bakpach u kulnaj Junab Ku;

¹⁷Matanías, u paal Micaía, u paal Zabdi, u paal Asaf, leti' máax nu'uctic ca'ach u ka'ayal qui'iqui' t'aano'ob yéetel le nib óolal le quéen úuchuc le payalchi'o'; Bacbuquías, leti' ca'ach u j ca'a paal u yotochnáalo'ob, yéetel Abda, u paal Samúa, u paal Galal, u paal ca'ach Jedutún.

¹⁸Tu pa'ate'il le j levitaob p'áato'ob cajtal te quili'ich caajo' doscientos ochenta yéetel cuatro.

¹⁹Le aj canan jool najo'obo': Acub, Talmón, yéetel u láaktzilo'obe' cu canantico'ob le jool najo'obo', ciento setenta yéetel dos.

²⁰U yalab le j israelitaob, yéetel u yalab le aj kiino'obo', yéetel le j levitaob, cajlajo'ob tu láak u caajilo'ob u lu'umil Judá, jujun túule' tu lu'um;

²¹quex tumen u aj meeyjulo'ob le kulnajo', le máaxo'ob nu'uctico'ob ca'ache', Ziha yéetel j Gispae' cajlajo'ob Ofel.

²²U nuuquilo'ob ca'ach le j levitaob tu caajil Jerusalene' j Uzi, u paal Bani, u paal Hasabías, u paal Matanías, u paal Micaía, ti' u ch'i'ibal Asaf, máaxo'ob nu'uctic ca'ach u kaayilo'ob u kulnaj Junab Ku,

²³tumen ajawe' tu ya'alaj ba'ax úuchac u beetic le aj kaayo'obo'.

²⁴Le máax cu bin ocol j t'aan yéetel ajaw tu yo'olal je'el ba'ax ca úuchuque', Petaías, u paal Mesezabeel, leti' ca'ach u ch'i'ibal Zera, u paal Judá.

²⁵Yaan wa jay túul u ch'i'ibal Judae' cajlajo'ob Quiriat-arba, Dibón, Jecabseel,

²⁶Josué, Molada, Bet-pelet,

²⁷Hazar-sual, Beerseba,

²⁸Siclag, Mecona,

²⁹En-rimón, Zora, Jarmut,

³⁰Zanoa, Adulam, Laquis yéetel Azeca, u mejen caajilo'ob yéetel u káaxilo'ob. J cáajo'ob líikbal Beerseba tac u táax lu'umil Hinom.

³¹U ch'i'ibalo'ob Benjamine' cajlajo'ob Geba, Micmas, Aía, Betel, yéetel u x péet caajilo'ob,

³²Bey xan ti' Anatot, Nob, Ananías,

³³Hazor, Rama', Gitaim,

³⁴Hadid, Seboim, Nebalat,

³⁵Lod, Ono, yéetel tu táax lu'umil le j meyaj jadzutz ba'alo'obo'.

³⁶Bey xan ti' dze'edzec levitaob dzaab lu'um ti'ob tu lu'umilo'ob Judá yéetel Benjamín.