Read Yucateco Nehemías 13 Bible Online

Nehemías 13 - Yucateco bible

Nehemías 13

¹Ti' le kiino'obo', xo'oc tu táan tuláacal le máaco'obo', u dzíibo'ob Moisés, ca j ila'ab te j dzíibo', le j amonitaob yéetel le j moabilobo', ma' u najmal u cajtalo'ob yéetel u caajal Kui'.

²(tumen leti'obe' ma' jóoko'ob u kamo'ob le j israelitaob yéetel janal mix yéetel ukuli', ba'ale' tu bo'otajo'ob Balam u ti'al u loolob t'anta'alo'ob, quex tumen Kue' tu sutaj qui' t'aanil le loolob t'aano'.)

³Bey túuno', chéen p'elac tu yu'ubilaco'ob le a'almaj t'aano', ja'atz ti' u caajil Israel tuláacal le máaxo'ob tu xa'akbesajuba'ob yéetel le j táanxel lu'umilo'obo'.

⁴Ma'ili' úuchuc lelo', aj kiin Eliasibe' leti' máax canantic ca'ach u cúuchil u ta'aca'al nu'uculo'ob u kulnaj c Ku. Tu yo'olal Eliasib u láaktzil Tobíase',

⁵tu dzaj majnil ti' jun p'éel nojoch káasabnajil, le tu'ux cu ta'aca'al ti'ibil óolalo'ob, poom, nu'uculo'ob, yéetel u diezmoil le trigoo', vino, yéetel aceite, le a'ala'an ca'ach unaj u dza'abal ti' j levitaob, ti' aj kaayo'ob, ti' aj canano'ob, yéetel le patano'ob u ti'al le aj kiino'obo'.

⁶Le ca j úuch tuláacal le ba'alo'oba' tene' mina'anen ca'ach Jerusalén, tumen tu ja'abil treinta yéetel dos ti' u ajawil Artajerjes u ajawil Babiloniae', suunajen te jalach najo'; quex tumen ca máan ya'ab kiine' tin káataj ti' ajawo' ca u cha'a in suut,

⁷ca suunajen Jerusalén, bey tin wilaj le kaas tu beetaj Eliasib iquil u dzaamail jun p'éel káasabnaj ti' Tobías tu sujuy lu'umil u kulnaj Junab Ku.

⁸Le ba'alo'ob tu beetaj in táaj p'u'ujul, ca tin láaj pulaj táancab u ba'aluba'ob Tobías.

⁹Cu dzo'ocole' tin wa'alaj ca láaj p'o'oboc ca p'áatac utz yanil, yéetel ca dza'abac tu cúuchil le nu'uculo'ob tu kulnaj Junab Ku, le ti'ibil óolalo' yéetel le poomo'.

¹⁰Bey xan tin wojéeltaj ma' j ku'ub ti' j levitaob mix ti' le aj kaayo'ob u janalo'obo' le beetic jujun túule' j púudze' ca'aj suunaj tu lu'umil.

¹¹Ca túun tin wa'alaj u nu'uc ti' u jalachilo'ob tu yo'olal tu p'atajo'ob u kulnaj Junab Ku. Cu dzo'ocole' tin much'quintaj le aj kiino'ob, j levitaob ca tin dzajo'ob tu meyajilo'ob,

¹²tuláacal Judá tu taasaj te tu'ux cu ta'aca'al nu'uculo'ob, u diezmos trigo, vino, yéetel aceite.

¹³Cu dzo'ocole' u ti'al u canantico'ob le u najilo'ob u ta'acbesa'al ba'alo'obe', tin dzaj aj kiin Selemías, aj dzíib Sadoc, yéetel jun túul j levita cu kaaba'intic Pedaías, tin dzaj xan bey u yáantaje', Hanán u paal Zacur u yáabil xan Matanías, tumen leti'obe' ma'alob wíinico'ob. Leti'ob cu j bin t'oxic ti' u yéet meyajo'obo'.

¹⁴¡In Ku: kam le ba'ax quin beetica'; yéetel ma' a tu'ubsic tuláacal le ba'ax utz dzo'oc in beetic tu yo'olal u kulnaj in Ku yéetel tu yo'olal u kultajil!

¹⁵Ti' le kiino'obo' tin wilaj tu caajil Judá, yaan ca'ach máaxo'ob tu kiinil sábadoe' cu yedzico'ob ca'ach uva u ti'al u beetico'ob vino, cu púutico'ob ca'ach u chúuchuch káaxilo'ob trigo, cu dzáico'ob vino u cuch u burro'ob, yéetel u ch'úuyul uva, higos yéetel tuláacal jejeláas cuuch, yéetel xan tu kiinil sábadoe' cu bisico'ob Jerusalén. Ca túun tin keyajo'ob tu yo'olal u conico'ob u jocho'ob le kiino'.

¹⁶U láak ba'ale' dze'edzec ti' le máaxo'ob sijnalo'ob Tiro, cajacbalo'ob ca'ach te'elo', cu bisico'ob cay yéetel tuláacal jejeláas ba'alo'ob u ti'al u cono'ob ti' le judiob Jerusalenilo'ob tu kiinil sábado.

¹⁷Ca túun tin keyaj u nuuquilo'ob Judá, ca tin wa'alaj ti'ob: ¿Ba'ax kaasilo'ob ca beetiquex iquil a manba'alcuntique'ex sábado?

¹⁸Jach bey tu beetilac le a máanja'an ch'i'ibale'exo'obo' tu yo'olale' c Kue' tu túuxtaj ya'ab núumyail yóokol le caaja'. ¿A káate'ex wa a seten beete'ex p'u'ujul Ku u ti'al ca u beet loob ti' Israel tu yo'olal a manba'alcuntique'ex sábado?

¹⁹Ca túun tin wa'alaje' chéen p'el u ye'esame'entale' ca dza'abac ojéeltbile', sábado, ca ka'alac u jool caajilo'ob Jerusalén, yéetel ma' u je'ebel tac u máan sábado. Tin dzaj xan tu jool caajilo'obe', dze'edzec in palitzilo'ob u ti'al ma' u cha'ico'ob u yocsa'al mix jun p'éel cuch sábado.

²⁰Le j kax coonolo'ob yéetel le j con chuucho'obo', ya'ab u téenel j p'áato'ob u máanso'ob áakab tu paach caajil Jerusalén,

²¹ba'ale' tene' sacach t'aanajen yéetelo'ob ca tin keyo'ob tu yo'olal u p'áatalo'ob u máanso'ob áakab actáan ti' le tuulumo', ca tin wa'alaj ti'obe' wa cu suut p'áatalo'obe', quin beetic u ka'alalo'ob, líikbal ti' le kiino' ma' j suunajo'ob sábadoi'.

²²Cu dzo'ocole' tin wa'alaj ti' le j levitaob ca u yutzquinto'ob yanilo'ob u ti'al ca xi'ico'ob u cananto'ob u joolo'ob le caajo' u ti'al ma' u manba'alcunta'al sábado. ¡In Ku: ka'ajquen teech tu yo'olal xan le ba'alo'oba', ca a ch'a'a teen óotzilil je'el bix a wutzil óolale'!

²³Tin wilaj xan ti' le kiino'obo' yaan dze'edzec le judiob j dzo'oc ca'ach u dzo'ocol u beelo'ob yéetel u co'olelilo'ob Asdod, Amón yéetel Moab;

²⁴yéetel táancoch u paalalo'obe' cu t'anico'ob u t'aanil Asdod, yéetel u t'aano'ob u láak lu'umo'ob, ba'ale' u t'aan le judiobo' ma' u yojelo'ob ca'achi'.

²⁵Tutucchi'inajen yéetelo'ob ca tin loolob t'antajo'ob. Yaan dze'edzeque' tin loxaj ca tin jocaj u tzo'otzel u poolo'ob, ca tin beetaj u jalach t'antico'ob tu kaaba' Junab Kue', ma' bíin u cha'ob u dzo'ocol u beelo'ob u x ch'upul paalal, mix u j xibil paalal yéetel táanxel caajilo'obi', mix u yóoltico'ob u ti'al u yatanto'ob u paalal wa u yatano'ob leti'ob u x co'olelo'ob le máaco'obo'. Ca xan tin wa'alaj:

²⁶¡Lela' leti' le u keban Salomón, u ajawil Israel! Quex beyo' ichil le ya'abcach lu'umo'obo' ma' j anchaj jun túul ajaw je'el bix leti'e', yaabilta'ab xan tumen Ku, ca tu dzaj bey u ajawil tuláacal Israele', le x táanxel lu'umil co'olelo'obo' tu beetajo'ob u kebanchajal.

²⁷Le beetique' ma' tu bin j p'atbil a talam kebanchajle'ex tu táan c Ku, tu yo'olal u dzo'ocol a beele'ex yéetel x táanxel lu'umilo'ob.

²⁸Ti' jun túul u paal Joiadae', u paal nojoch aj kiin Eliasib, leti' xane' u ja'an ca'ach Sanbalat le j horonitae', tin tojolch'intaj tin táan.

²⁹¡In Ku: ka'ajac ti' teech máaxo'ob tu manba'alcuntajo'ob u meeyjul le aj kiinilo' yéetel a nup t'aanil le aj kiinilo' yéetel le j levitailo!

³⁰Bey tin púutilaco'ob ti' tuláacal ba'ax táanxel caajil, ca tin t'oxaj u meyaj tu jujun túulil, le aj kiino'ob, le j levitaob jujun túul tu'ux u najmal u meyaje';

³¹bey xan le janalo'ob yéetel le si'o', tu kiinilo'ob úunchac u ku'ubulo'obo', yéetel u taasa'al u yáax yich pakal. ¡In Ku: Ka'ajac ti' teech a beetic utz!