Read Yucateco Nehemías 2 Bible Online

Nehemías 2 - Yucateco bible

Nehemías 2

¹Jun p'éel kiin ti' u winalil Nisán tu ja'abil veinte ti' u ajawile', ca'aliquil táan in dzáic u yuk vinoe', ajawe' tu yilaj jach okom in wóol.

²Ca tu káat chi'itaj ti' teen: Quin wilic jach okom a wóol. ¿Ba'ax cu yúuchul ti' teech? Ma' chica'an wa koja'anechi', min yaan wa ba'ax cu káatal ta beel. Ti' le súutuco' seten sajacchajen,

³ca tin wa'alaj ti' ajaw: ¡Tzicbe'enil, cuxlaquech u ti'al mináan u xuul! ¿Bix ma' a wilic okom in wóol wa le noj caaj tu'ux muca'ano'ob in taata yéetel in maamae' chéen x tocoy caaj, u jool najilo'obe' láaj tóoca'ano'ob?

⁴Ajawe' tu káat chi'itaj: ¿ba'ax je'el u páajtal in beetic ta wo'olale'? Ca túun tin kubentajimba ti' u Kuil le ca'ano',

⁵ca tin núucaj ti' ajaw: Wa a tzicbe'enil cu tucultic ma'alobe', yéetel wa quin najmaltic a beetic teen utze', quin káatic ti' a tzicbe'enil ca u túuxten tu lu'umil Judá, le noj caaj tu'ux muca'an in taata yéetel in maama u ti'al ca in lik utzquíinte'.

⁶Tu tzéel ajawe' culucbal ca'ach x ajaw, ca tu núucaj ti' teen ajaw: ¿Jay p'éel kiin bíin xaanaquech? ¿Ba'ax kiin quéen suunaquech? Tene' tin wa'alaj ti' ba'ax kiin; leti'e' tu éejemtaj in binbal.

⁷Tin wa'alaj xan ti', wa cu tucultic ma'alobile', ca dza'abac ti' teen jun p'éel dzíibil ju'un u ti'al le méektáano'ob yaano'ob tu chikin u yáalcab ja'il Éufrateso' u ti'al ca cha'abac in máan tac quéen kuchuquen tu lu'umil Judá;

⁸yéetel u láak dzíibil ju'une' u ti'al Asaf, u j canan káax ajaw, u ti'al ca u dzáa ti' teen che' u ti'al in pixic u jool najilo'ob u káasab pakil kulnaj, bey xan u ti'al u tuulumil le noj caajo', yéetel u ti'al le naj tu'ux bíin cajlaqueno'. Ajawe' tu dzaj ti' teen tuláacal ba'ax tin káataj ti', tumen Kue' táan u yáantiquen yéetel u yutzil.

⁹Le ca j kuchen tu táan u méektáano'ob u chikin Éufratese', tin kubaj le dzíibil ju'uno'ob tu túuxtaj le ajawo', máax tu dzaj xan u ti'al u láakintene' jun múuch' aj canano'ob u nat'majo'ob tzíimino'ob yéetel u náacomo'ob u aj ba'atelo'ob.

¹⁰Ba'ale' ca tu yojéeltaj Sanbalat le j Horonil yéetel Tobías le j amonile', sen kuuxilnajo'ob tumen dzo'oc ca'ach u kuchul máax u dzaamaj u yóol u ti'al u yáantic le j israelitaobo'.

¹¹Kuchen Jerusalén. Tu óox p'éel kiin cóojoquene',

¹²j líiken yéetel áakab, láakinta'anen tumen dze'edzec máaco'ob, ma' tin wa'alaj ti' mix máac ba'ax tu dzaj Ku tin tuucul ca in beet tu yo'olal Jerusaleni'. Ma' tin bisaj u láak tzíimini', chéen le in nat'majo'.

¹³Láili' ti' le áakabo' jóoken te jool naj cu kaaba'intic Táax Lu'um tu tojil le sayab ja' cu kaaba'intic Ku'uki' caan yéetel tu jool naj le cu ya'ala'al Tu'ux cu Pu'ulul ta' Míiso', ca tin wilaje' láaj ju'uju'ut u tuulumil, u jool najilo'obe' tóoca'antaco'ob.

¹⁴Cu dzo'ocole' ca j binen tu jool najil le sayab ja' yéetel tu ch'e'en tuun ajaw; ba'ale' in tzíimine' ma' j páatji' u máani'.

¹⁵Láili' tu áakabile' j binen tu chowaquil le t'o'ol ja'o', cu dzo'ocol in wilic bix yanil le tuulumo', suunajen ca j ooquen tu jool najil cu kaaba'intic táax lu'ume'.

¹⁶Le j méektáano'obo' ma' tu yojéeltajo'ob tu'ux bineni', mix ba'ax quin máan in beeti'. Mix xan tin dzaj u yojéelt le judiobo', in káat in wa'ale' le aj kiino'obo', dzuulo'obo', le j méektáano'obo' mix xan ti' le u chuca'an máaco'ob bíin meyajnaco'obo'.

¹⁷Ca túun tin wa'alaj ti'ob: Te'exe' a wojele'ex ma'alob, talam kaas yanilo'on, tumen Jerusalene' ju'uju'ut u tuulumilo'ob u jool najilo'obe' tóoca'antaco'ob, muuch'aba'ex tin wéetele' u ti'al ca c utzquinte'ex, beyo' ma' bíin che'ejta'aco'oni'.

¹⁸Le ca tin tzicbaltaj ti'ob bix áanta'abiquen tumen u yutzil Kue', yéetel le ba'ax tu ya'alaj ajawe', leti'obe' tu núucajo'ob: ¡Cone'ex chu'unbesic c utzquintic! Yéetel utzil óolale' tu baatzilo'ob tu ch'a'ajo'ob muuk.

¹⁹Le ca tu yojéeltajo'ob Sanbalat le j Horonile', Tobías le aj meyaj amonile', yéetel Gesem le j árabe, tu p'a'asto'on ca tu ya'alajo'ob yéetel p'a'as: ¿Ba'ax ca beetique'ex beya'? ¿Ca tucultique'ex a lik óoltique'ex a j ma' u'uyaj t'antique'ex le ajawo'?

²⁰Ba'ale' tene' tin núucaj: U Kuil le ca'ano' bíin u yaanto'on, to'on u j palitzilo'obe', binel ca'aj chu'unbes ca'a líiksic le pako', te'exe' mina'an mix ba'al a wile'ex Jerusalén.