Read Yucateco Nehemías 3 Bible Online

Nehemías 3 - Yucateco bible

Nehemías 3

¹Eliasib nojoch aj kiin yéetel u yéet aj kiino'ob túune' tu líik utzquintajo'ob u jool najil le j Tamano'obo'. Tu dzajo'ob u póolbil che'ilo'ob, cu dzo'ocole' ca tu dzajo'ob u jool najilo'ob ca xan tu yutzquintajo'ob u tuulumil, líikbal tu witzil Hameae', tac tu witzil Hananeel.

²Tu tzéel le tuulumo' j beeta'ab tumen u cajnáalilo'ob Jericó, tu láak jun tzéele' tu beetaj Zacur, u paal Imri.

³U ch'i'ibalo'ob Senaae' tu yutzquintajo'ob u jool najil cu kaaba'intic Cayo'ob, tu dzajo'ob u póolbil che'ilo'ob yóokole', ca tu dzajo'ob u jool najilo'ob yéetel u wáawasal u kalabil.

⁴U láak jun t'o'ol le tuulumo' u muuk pakile' j beeta'ab tumen Meremot, u paal Urías yéetel u yáabil j Cos; tu tzéele' meyajnaj Mesulam, u paal Berequías yéetel u yáabil Mesezabeel; u láak jun t'o'ole' Sadoc u paal Baana j utzquintej.

⁵Tu tzéel Sadoc meyajnajo'ob le j Tecoaob; quex tumen le máaxo'ob nu'uctico', ma' j áanta'abo'ob tumen u nuuquilo'obi.

⁶Joiada, u paal Paseah, yéetel Mesulam, u paal Besodíase' tu yustzquintajo'ob le jool najil cu kaaba'intic Jesana, tu dzajo'ob u muuk che'ilo'ob, tu dzajo'ob xan u kalabilo'ob.

⁷U láak jun t'o'ol le tuulumo' tu yutzquinto'ob Melatías j gabaonita yéetel Jadón le j Meronoto', u cajnáalilo'ob Gabaón yéetel u cajnáalilo'ob Mizpa, le yano'ob ca'ach yáanal u páajtalil aj méektáan u chikin u yáalcab ja'il Éufrates.

⁸U láak u jun t'o'ol le tuulumo' líik utzquinta'ab tumen Uziel u paal Harhaía, jun túul máax cu meyajtic plata; u láak jun t'o'ole', utzquinta'ab tumen Hananías, jun túul aj qui'iboccunaj; leti'ob ca'a túule' tu yutzquintajo'ob u tuulumil Jerusalén tac tu cóochil le tuulumo'.

⁹U láak jun t'o'ole', tu yutzquintaj Refaías, u paal Hur, u aj chuun caajil táancoch Jerusalén.

¹⁰U láak jun t'o'ole', utzquinta'ab tumen Jedaías, u paal Harumaf, tumen cu p'áatal actáan ti' u yotoch, u láak jun t'o'ole' tu yutzquintaj Hatús, u paal Hasabnías.

¹¹Malquías u paal Harim yéetel Hasub, u paal Pahat-moab, tu yutzquintjo'ob jun t'o'ol yéetel u witzil najil le j chujcabo'obo'.

¹²U láak jun t'o'ole' utzquinta'ab tumen Salum, u paal Halohes, u aj chuun caajil ca'ach u láak táancoch Jerusalén, yéetel u x ch'upul paalal.

¹³Hanún yéetel u cajnáalilo'ob Zanoae', tu yutzquintajo'ob u jool najil le táax lu'umo'; ca j dzo'oc u beetico'obe' tu dzajo'ob xan u jool najilo'ob yéetel u kalabilo'ob, tu yutzquinto'ob cuatrocientos metros le tuulumo' tac tu jool najil tu'ux cu bisa'al j pu'ulul u ta' míis.

¹⁴Malquías, u paal Recab, u méektáan u lu'umil Bet-haquerem, tu yutzquintaj u jool najil tu'ux cu bisa'al j pu'ulul u ta' míis yéetel tu dzaj u jool najilo'ob yéetel u kalabilo'ob.

¹⁵Salum u paal Colhoze, u méektáan u lu'umil Mizpa tu yutzquintaj u jool najil le sayabo'; tu lik utzquintaj tu dzaj xan yóok najil, ca xan tu dzaj u jool najilo'ob yéetel u kalabilo'ob; bey xan tu yutzquintaj u tuulumil u ch'e'en tuunil Siloé tu tzéel u cúuchil u pakal nicte'ilo'ob jalach naj, tac tu ebtuunilo'ob tu'ux cu yúuchul éemel tu noj caajil David.

¹⁶Nehemías u paal Azbuc, u méektáan táancoch u lu'umil Bet-sur, tu yutzquintaj u láak jun t'o'ol le tuulumo' tac actáan u mucnal David tac tu nu'ucul u chu'upul ja', tac tu najil le aj ba'atelo'obo'.

¹⁷U láak jun t'o'ole' j utzquinta'ab tumen le levitaob: Rehum, u paal Bani, cu dzo'ocole' Hasabías, u méektáan táancoch u lu'umil Keila, tu beetaj tu kaaba' le caajo'.

¹⁸U láak jun t'o'ole' utzquinta'ab tumen u yéet nuuquilo'ob: Bavai, u paal Henadad, u méektáan le u táancoch u lu'umil Keila;

¹⁹yéetel Ezer, u paal Josué, u méektáan u lu'umil Mizpa, tu yutzquintaj jun t'o'ol actáan ti' u na'acalil tu'ux cu ta'aca'al u nu'uculo'ob ba'atel yaan ti' jun ti'itz.

²⁰Tu tzéele' meyajnaj Baruc u paal Zabai, tu yutzquintaj líikbal jun ti'itz tac tu jool najil u yotoch Eliasib, nojoch aj kiin,

²¹Meremot u paal Urías, u yáabil Cose' tu yutzquintaj jun xóot' le pako' líikbal tu jool najil u yotoch Eliasib tac tu xuul le najo'.

²²U láak jun xóot' le tuulumo' utzquinta'ab tumen le aj kiino'ob cajacbalo'ob tu táax lu'umil Jordán.

²³Tu tzéelo'obe', Benjamín yéetel Hasube', tu yutzquintajo'ob jun xóot' le tuulum yaan actáan ti' u yotocho'obo'. Cu dzo'ocol leti'obe' Azarías, u paal Maasías u yáabil Ananíase' tu yutzquintaj le yaan tu tzéel u yotocho'.

²⁴U láak jun t'o'ole' utzquinta'ab tumeno'ob Binuy, u paal Henadad, líikbal tu yotoch Azarías tac tu xu'uk u ti'itzil.

²⁵Tu tzéele' Palal, u paal Usai, tu yutzquintaj le tuulum yaan actáan ti' le ti'itzo', tu yutzquintaj xan le ca'anal witzil naj cu píit máansic u ca'anali le jalach najo', le yaan tu táancabil u cúuchil le aj canano'obo'. U láak jun xóot' le tuulumo' tu yutzquintaj Padaías, u paal Faros,

²⁶tac actáan ti' u jool najil le ja'o', tu lakin, je'el bix chica'anil le ca'anal le witzil najo'. (U cajnáalilo'ob Ofelo' u j meeyjulo'ob le kulnajo'.)

²⁷Le j Tecoabo' tu yutzquintajo'ob u láak jun t'o'ol, líikbal actáan ti' le noj witzil naj cu yila'al tac tu tuulumil Ofel.

²⁸Le aj kiino'obo' tu jujun túulilo'ob yutzquintajo'ob le tuulum yaan actáan ti' u yotocho'ob líikbal tu jool najil le Tzíimino'obo'.

²⁹Tu tzelo'obe' Sadoc u paal Imere', tu yutzquintaj jun xóot' le tuulum yaan actáan ti' u yotocho'; tu tzéel Sadoque' meyajnaj Semaías u paal Secanías, máax u canan ca'ach u jool najil j lakin.

³⁰Tu tzéele', utzquinta'ab jun xóot' tumen Hananías u paal Selemías, yéetel Hanún, máax u seis paal ca'ach Salaf; tu tzéelo'obe', Mesulam u paal Berquíase', tu beetaj jun xóot' le tuulum yaan actáan ti' u yotocho'.

³¹Malquías, le aj meyaj platae', tu yutzquintaj jun xóot' le tuulumo' tac tu yotocho'ob u aj meeyjulo'ob kulnaj, yéetel le yaan actáan ti' u yotocho'ob le j coonolo'ob tu táan ti' u jool najil xot kiin tac tu xu'uk u najil tu'ux cu yúuchul canan.

³²Le aj meyaj plataob yéetel le j coonolo'obo' tu yutzquintajo'ob jun t'o'ol le tuulum líikbal tu ti'itz tu'ux yaan le j canano'obo', tac tu jool najil le j Tamano'obo'.