Read Yucateco Nehemías 4 Bible Online

Nehemías 4 - Yucateco bible

Nehemías 4

¹Ca tu yojéeltaj Sanbalat táan u lik utzquinta'al le tuulumo', sen j p'u'uji', ca jo'op u che'ejtic le judiobo'

²táan u ya'alic tu táan u yéet j xiibilo'ob yéetel u aj ba'atelo'ob Samaria; ¿Ba'ax cu tucultic le judiob quimeno'ob yéetel wi'ij? ¿Cu tucultico'ob je'el u cha'abal u kubico'ob quíimsbil ba'alche' tu ca'a téene'? ¿Wa je'el u páajtal u dzo'ocsbesico'ob le meyaj ichil jun p'éel kiine'? ¿wa ichil u tucubilo'ob le pak juutulo', Je'el wa u páajtal u jóokesico'ob túumbentac le tuunicho'ob j eelo'obo'?

³Tobías le j amonile', tu nupajubáa xan yéetel, ca tu ya'alaj: Ile'ex le tuulum cu beetico'obo' ¡tac jun túul ch'omac je'el u jenic wa ca na'acac tu yóokole'!

⁴Teen túune' payalchi'inajen: In Ku: u'uy bix c che'ejta'al. Beet u lúubul tu yóokolo'ob le u ya'alaj ba'alo'obo', ca lúubuco'ob tu kab aj p'eeco'ob u ti'al ca bisa'aco'ob kala'ano'ob táanxel lu'umil.

⁵Ma' a sa'atsic u si'ipilo'ob, mix a p'atic x ma' jaadzil u kebano'ob, tumen táan u poch'ico'ob le máaxo'ob cu líik utzquintico'ob le tuulumo'.

⁶Ma' t p'ataj c líik utzquintic le tuulum dzo'oc ca'ach u chuquic táanchumuco'. Le máaco'obo' chich u bin u meyajo'ob.

⁷Ba'ale' le ca tu yojéeltajo'ob Sanbalat, Tobías, le j árabeob, le j Amonitaob, yéetel le j Asdodob, táan u beeta'al le tuulumo', yéetel dzo'oc u tzu'utzul le jool bejo'obo', seten j p'u'ujo'ob,

⁸ca tu much'ajuba'ob u jok jo'olto'ob bix bíin u ba'atelto'ob Jerusalén u ti'al ca u xiixcunto'ob.

⁹Ca túun j payalchi'inajo'on ti' c Ku, u ti'al c toquicbáa ti'obe', j dzaj aj canano'ob bul kiin yéetel bul áakab.

¹⁰U cajnáalilo'ob Judae' táan u ya'alico'ob: Táan u lúubul u muuk le aj cuuch tu yo'olal u sen ya'abil le pak juutulo', mina'an to'on xan u muukil u ti'al c lik utzquintic le tuuluma'.

¹¹C aj p'eeco'obe' táan u tucultico'ob ca'ach ma' bíin c ojéelti' mix bíin c ojéelt u yocolo'ob ichilo'oni', u ti'al ca u quíimso'on, beyo' cu jáawal le meyaja'.

¹²Ba'ale' le ca j taalo'ob le judiob cajacbalo'ob náadz ti'ob u ti'al u babal a'alo'ob ti' to'on, le aj p'eeco'ob bin u ca'aj u ba'atelto'on tuláacal c tzéelo'obe',

¹³ca tin wa'alaj ca u dzáuba'ob le máaco'ob jujun múuch'il yéetel u paalal tu paach le tuulumo', ti' le kóomo'obo', ti' le jool bejo'obo', yéetel u táadz máascabo'ob, u julubo'ob yéetel u p'úun che'ob.

¹⁴Le ca tin wilaj sajaco'obe', j wa'alajene' ca tin wa'alaj ti' le dzuulo'ob, ti' le aj méektáano'ob yéetel ti' u yalab le caajo': Ma' a cha'iquex sajaquil, ka'ajac ti' te'ex Yuumtzile' nojoch yéetel sajbe'entzil, ba'atelnene'ex tu yo'olal a wéet caajale'ex, a paalale'ex, a watane'ex yéetel xan a wotoche'ex.

¹⁵Le ca j ojéelta'ab tumen le aj p'eeco'ob táan c pa'atico'ob, yéetel dzo'oc u pa'abal u jok jo'olo'ob tumen Kue', tuláacalo'on suunajo'on te j tuulumo', ca t ca'a ch'a'a jo'oltaj c meyaj.

¹⁶Líikbal ti' le kiinaco' táancoch ti' in j pakbalo'ob cu meyajo'ob te j tuulumo', u láak táancoche', u machmajo'ob u nu'ucul u ba'atelo'ob u chimalo'ob yéetel u p'unche'ob. U nuuquilo'obe' táan xan u yáantico'ob u cajnáalilo'ob Judá

¹⁷u ti'al ca lik utzquinta'ac le tuulumo'. Le aj cuucho'obo' láili' táan u meyajo'obe', chéen ba'ale' yéetel jun dzíit u kabe' cu meyajo'ob, yéetel u láak jun dzíite' u machmajo'ob u nu'ucul u ba'atelo'ob.

¹⁸Tuláacal le máaxo'ob cu meyajo'ob te j tuulumo' u kaxnaktmaj u máascabo'ob, yéetel tin tzéele' ti' yaan ca'ach le máax dza'an jóopsic u paaxil le ba'atelo',

¹⁹tumen in wa'almaj ti' le dzuulo'obo', yéetel ti' le aj méektáano'obo', bey xan ti' u yalab le caajo'; Le meyajo'oba' sen nuuctac jach chowactac xan, to'one' jatzláanta'ano'on tu bakpach le tuulumo'.

²⁰Le t o'olale' le quéen a wu'uye'ex u juum u jóopsa'al le paaxo', nupaba'ex t éetel, tumen c Kue' bíin ba'atelnac t tzéel.

²¹Bey túuno' bul kiin taan meyaj, táancoch ti' le máaco'obo' u machmajo'ob u julte'ob.

²²Ti' le kiinaco' tin wa'alaj xan ti' le máaco'obo', bey xan ti' tuláacal le j áantajo'obo', unaj u máansico'ob áakab ichil u caajil Jerusalén, yéetel kiine' ca meyajnaco'ob, yéetel áakabe' ca u cananto'ob.

²³Cu dzo'ocole' mix teen, mix in láako'ob, mix in j áantajo'ob mix le j canano'ob láakintiqueno', c pitic c nook, jujun túule' u machmaj u julte'.