Read Yucateco Nehemías 5 Bible Online

Nehemías 5 - Yucateco bible

Nehemías 5

¹Ti' le kiino'obo' yanji' jun p'éel nojoch chi'ichnaquil ichil le x co'olelo'ob tu yo'olal u yéet caajalo'ob le judiobo',

²tumen dze'edzeque' tu ya'alaj ya'ab ca'ach u j xibil paalal yéetel u x ch'upul paalal, tu yo'olal lelo' kabéet u caxtico'ob trigo u ti'al ma' u quíimilo'ob yéetel wi'ij;

³u láako'obe' cu ya'alico'ob ca'achi', tu yo'olal mina'an mix ba'al u jaanto'obe' yanchaj u majan conico'ob u lu'umo'ob, u x péetpachil u pakal uvaob, yéetel u yotocho'ob,

⁴u láako'obe' tu ya'alajo'obe' u ti'al u bo'otico'ob pátan ti' le ajawo' yanchaj u káatico'ob taakin majnil, tu yo'olale' yanchaj xan u dzáico'ob lu'umo'ob, yéetel u x péetpachil u pakal uvaob. U láak ba'ale':

⁵C éet lu'umilo'ob, je'el bix to'one', ti' jun p'éelili' ch'i'ibal c taal; u paalal leti'ob, yéetel c paalale' ma' yaanal máanco'obi'; chéen ba'ale' to'one' yaan c dzáic c j xibil paalal yéetel c x ch'upul paalal u ti'al palitzilil. Bejela'e' yaan dze'edzec x ch'upul paalal x palitzilo'ob, ma' tu páajtal c beetic mix ba'al u ti'al ma' u yúuchul beyo', tumen c lu'umo'ob yéetel u x péetpachil c pakal uvaobe' ti' yaan tu yaanal kabo'obe'.

⁶Teen Nehemías le ca tin wu'uyaj u tacpoolo'ob, yéetel jaaj xan le ba'ax cu ya'alico'obo' seten j p'u'ujen.

⁷Cu dzo'ocol in tucultic ma'alobe', tin keyaj u nuuquilo'ob yéetel u méektáano'ob tumen, cu dzáico'ob jun p'éel cuuch beyo' tu yóokol u yéet lu'umilo'ob. Ca túun tin much'quintaj tuláacal le caajo' u ti'al ca c a'al ba'ax kabéet u beeta'al tu yo'olal le ba'ala'.

⁸Ca tin wa'alaj ti'ob: to'one', tac tu'ux páatchajo'one' c tocaj éet judiob j co'ono'ob ca'ach ti' le caajo'ob j manba'al caajo'obo'; ¿Ba'ale' bejela'e' te'exe' táan a ca'a conique'exo'ob u ti'al ca yanac c manico'ob tu ca'a téen? Leti'obe' ma' j t'aanajo'obi', tumen ma' u yojelo'ob ba'ax bíin u núuco'obi'.

⁹Tene' ca tin ca'a a'alaj: Le ba'ax ca beetique'exo' ma' ma'alobi'. Unaj we'esique'ex a tziiquile'ex tu yo'olal Ku, beyo' ca maquique'ex u chi'ob le c aj p'eeco'ob cu p'a'astico'ono'obo'.

¹⁰In láaktzilo'ob, in wáantajo'ob bey xan tene', dzo'oc dzáic taakin u majanto'ob, bey xan trigo; bey túuno', ¡cone'ex sa'atsic ti'ob le p'aaxa'!

¹¹Quin káat óoltic ti' te'ex xane' ca a sute'ex ti' le kiina', u lu'umo'ob, u x péetpachil u pakal uvaob, u pakal olivo'ob yéetel xan u yotocho'ob, tu'ubse'ex u p'aaxo'ob, taakin, wa vino, wa aceite.

¹²Leti'obe' tu núucajo'ob: Je'el c sutic tuláacal je'el bix dzo'oc a wa'alico', ma' táan tzáic mix ba'al ti'obi'. Ca túun tin t'aanaj aj kiino'ob, tu táano'obe' tin beetaj ca u jalach t'anto'ob le ba'ax tu séeb chi'itajo'obo'.

¹³Tin tíitaj in nook, ca tin wa'alaj: Bey ca tíita'ac tumen Ku náach ti' u yotoch yéetel náach ti' u ba'aluba'ob, tuláacal le máax ma' táan u dzo'ocbesic le ba'ax dzo'oc u ya'alic u beetico', ca lukesa'ac tuláacal ba'ax yaan ti' bejela'e'. Tuláacal le caajo' tu núucaj: Ca béeyac ca tu qui' t'aantajo'ob Yuumtzil. Le máaco'obo' tu beetajo'ob le ba'ax tu séeb chi'itajo'obo'.

¹⁴Ichil doce ja'abo'obo', u káat ya'ale', líikbal le kiino', u veinte ja'abil dzaabiquen aj méektáanil tumen ajaw Artajerjes tu múuch' lu'umilo'ob Judá tac tu ja'abil treinta yéetel ca'a p'éel u ajawile', mix teen, mix in wáantajo'ob t ch'a'aj le taakin c náajaltic bey méektáane'.

¹⁵Ma' bey le máaxo'ob méektáanajo'ob táanil ti' teno', aal cuuchchajo'ob u ti'al le caajo', tumen sáamsamale' cu dza'abal ti'ob cuarenta u taakinil plata u ti'al janal yéetel u ti'al vino. Bey xan u aj meyajo'obe' cu yedzico'ob le caajo' ba'ale' tene' ma' tin beetaj beyo', tu yo'olal in tziiquiltic ti' Ku.

¹⁶Ba'ale' tin dzo'ocbesaj u tuulumil u bakpach le caaja', ma' tin ch'a'aj lu'umo'obi'. Wa tu yo'olal in wáantajo'obe', tuláacalo'ob j táacpajo'ob ti' le meyajo'.

¹⁷In wéet janalo'obe' tu chucaj tac ciento cincuenta máaco'ob, bey judiob chéen cajnáalo'ob, bey xan u aj meeyjulo'ob le j méektáano', ma' tin xoquic le j táanxel lu'umilo'ob cu taalo'ob u xíimbalto'ono'.

¹⁸Le ba'ax quin dzáic j máakanta'al u ti'al jaantbil sáamsamalo': jun túul wacax yéetel seis u ma'alobil j tamano'ob, yéetel ch'íich'o'ob; yéetel ti' jujun diez kiino'obe' yaan ca'ach ya'ab vinoo. Quex túun beya', mix jun téen tin káataj le taakin unaj in najmaltic beyen méektáane', tumen jach nojoch le cuuch yaan ca'ach tu yóokol le caajo'.

¹⁹¡Ma' a tu'ubsiquen in Ku, tuláacal ba'ax tin beetaj ti' le caaja' suut utzil tin wóokol!